[Lona]

Shtypi huaj për dështimin e negociatave për Kosovën

Londër/Uashington, 29 nëntor - Gazeta britanike "Gardian" konstaton në numrin e sotëm se dy vjet negociatash për zgjidhjen e statusit të Kosovës përfunduan me dështim, ndërkohë që bashkësia ndërkombëtare ka bërë thirrje për ruajtjen e paqes në këtë rajon të brishtë, kurse Uashington ka nënvizuar se shtetësia e Kosovës do të vendoset së shpejti, pavarësisht nga kundërshtimi i ashpër i Serbisë dhe Rusisë. Gazeta rikujton se dështimi nuk ka qenë i befasishëm. Por, fundi i këtyre bisedimeve ka hapur një rrugë të rrezikut të lartë, të dominuar nga konfrontimi serbo shqiptar, që mund të përshkallëzojë në dhunë dhe të sforcojë hendekun midis Rusisë dhe Perëndimit. Ndërsa Kosova përgatitet të shpallë pavarësinë e koordinuar me Shtetet e Bashkuara dhe Bashkimin Evropian, Serbia po përgatit "planin aksional" për ta penguar këtë pavarësi, me bllokada të ndryshme, mbyllje kufijsh, hakmarrje kundër vendeve që e njohin shtetësinë e Kosovës dhe me pamje në ekranet televizive me serbë të Kosovës të shndërruar në refugjatë, shkruan "Gardian". E përditshmja tjetër "Independent" shkruan se të gjitha palët e përfshira në bisedimet e Badenit janë ngutur të thonë se përjashtohet mundësia e çdo lëvizjeje që mund të çojë në dhunë, por megjithtë ka shqetësime se Ballkani sërish është i kërcënuar. Edhe kjo gazetë shkruan se dështimi i bisedimeve nuk ka qenë fare i befasishëm dhe përkundër zotimeve për të shmangur dhunën, udhëheqësit serbë nuk e kanë fshehur zemërimin e tyre, duke premtuar se do të shfrytëzojnë masat ligjore për të shmangur shpalljen e pavarësisë. Një nga hapat e mundshëm të autoriteteve serbe në këtë drejtim është ndalimi i eksportit të energjisë në Kosovë, por, nuk ka ndonjë mënyrë që këto veprime të mos e prekin pakicën serbe e cila jeton në Kosovë, pohon "Independent". Ndërkaq gazeta amerikane "Uashington tajms" shkruan për 500 trupat shtesë që Gjermania do t'i dërgojë në Kosovë në kuadër të forcave paqeruajtëse të KFOR it, për të siguruar stabilitet pas dështimit të bisedimeve në Baden të Austrisë. Gazeta shkruan se Kosova pritet ta shpallë pavarësinë në tre muajt e ardhshëm. "Shtetet e Bashkuara e mbështesin fuqishëm planin e Martti Ahtisaarit dhe e konsiderojnë pavarësinë e plotë me mbikqyrje ndërkombëtare si të vetmin opsion", citon "Uashington tajms" zëdhënësen e Departamentit Amerikan të Shtetit, Nikol Thompson. Ajo gjithashtu ka thënë se Shtetet e Bashkuara, megjithatë ftojnë të dyja palët që të përmbahen nga deklaratat që mund të dëmtojnë stabilitetin në rajon. "Nëse Kosova shpallë pavarësinë në muajt e ardhshëm, pjesa më e madhe e vendeve anëtare të Bashkimit Evropian së bashku me Shtetet e Bashkuara do ta njohin atë në gjashtë muajt e pare", thotë Xhems Lajën, nga Grupi Ndërkombëtar i Krizave. Edhe pse nuk mund të përjashtohet si opsion, Lajën megjithatë nuk mendon se Serbia do të bëjë ndërhyrje ushtarake.