[Llapjani_HH]

Patrullimet e përbashkëta Shqipëri- Kosovë, në vështirësi

Patrullimet e përbashkëta të policisë së Shqipërisë dhe të Kosovës në territorin e Shqipërisë si duket janë përballur me problemet e para.

Disiplina në zbatimin e orarit të punës, gjobat, por edhe mungesa e kualifikimit të policëve vendas, janë disa nga problemet pas një periudhe dyjavore patrullimesh.

Në një takim të përbashkët në Kukës të drejtuesve të Policisë së Prizrenit dhe asaj të Kukësit është analizuar puna e përbashkët dyjavore e patrullimeve të ndërthurura.

Me këtë rast janë evidentuar problemet si disiplina në zbatimin e orarit të punës, diferencat e mëdha të gjobave në mes Kodit Rrugor në Shqipëri dhe atij në Kosovë, si dhe mosnjohja e teknikës bashkëkohore nga Policia shqiptare, shkruan "Koha ditore".

"Kemi rezerva për sa i përket zbatimit të orarit, pasi policët nga Kosova po vijnë me vonesë dhe po ikin më herët se sa orari i përcaktuar", është shprehur shefi i Njësisë së Policisë së Qarkullimit Rrugor për Qarkun e Kukësit, Alejdin Omuri.

Ndërkaq, Komandanti i Policisë së Qarkullimit Rrugor për rajonin e Prizrenit, Lulzim Shala, ka deklaruar se policia vendase ka mangësi në njohjen e teknikës bashkëkohore në përdorim të Policisë së qarkullimit rrugor.

Në patrullimet e përbashkëta gjatë këtyre dy javëve është vënë re epërsia e Policisë së Kosovës në automjete dhe mjete të tjera logjistike.

Kjo polici ishte e pajisur me radarë laser, ndërkohë që Policia e qarkullimit rrugor të Kukësit nuk dinte të përdorte radarët.

Gjithashtu, edhe nga ana profesionale është vënë re epërsia e Policisë së Kosovës.

Shumë nga rregullat formale që zbatoheshin nga policët kosovarë me rastin e ndalimit të automjetit, policët e Shqipërisë nuk i kishin aplikuar ndonjëherë.

Për sa i përket vendosjes së gjobave, është vendosur që ato të vendosen në bazë të Kodit Rrugor të Republikës Shqipërisë ku gjobat minimale janë të papërfillshme krahasuar me ato të Kosovës.

Gjoba minimale në Shqipëri për kundërvajtësit është rreth 8 euro, ndërkohë që në Kosovë është 35 euro.

Patrullimet e ndërthurura të Policisë së Qarkullimit rrugor në mes Shqipërisë e Kosovës në territorin e Shqipërisë kanë filluar më 16 qershor, pas një marrëveshjeje të nënshkruar në Morin të Kukësit.

Për periudhën dyjavore, patrullimet e përbashkëta kanë vijuar vetëm në aksin rrugor nga Morini në tunelin e Kalimashit, ndërsa në ditët në vazhdim me shtimin e fluksit të turistëve që parashikohet të arrijë shifra të lartë në muajt korrik gusht, patrullimet do të vazhdojnë në të gjitha akset kombëtare të Shqipërisë.
QIK-u