[Vera]

Më në fund, Majkëll Shumakeri ka marrë frymë lirisht. Hajmalinë që i kishte dhuruar bashkëshortja e tij, Korina, e cila i kishte humbur në garën e Silverstonit, ai e ka gjetur. "Një punonjës i Formulës 1 e ka gjetur dhe e ka lënë mënjanë. Ditën e hënë, ai ka lexuar gazetat sportive dhe ka marrë vesh lajmin. Menjëherë ka kontaktuar me Ferrarin. Me sa duket, ky ka qenë lajmi më i mirë i asaj dite. Isha vërtet i mërzitur që kisha humbur dhuratën e Korinës," - ka thënë Majkëll Shumakeri. Që ditën e enjte, kampioni gjerman ka shkuar në Jerez, ku ka filluar testimet për garën e radhës, që do të zhvillohet në Gjermani. Në këtë garë, Majkëlli do të kërkojë fitoren e tij të 11-të për këtë sezon. Çmimi i Madh i Hokenhaimit është gara e 12-të e këtij sezoni. "Tashmë hajmalia është sërish me mua në testimet e Jerezit. Këto janë provat e fundit përpara garës së radhës. Jemi përqendruar më shumë në testimin e gomave dhe të aerodinamikës," - ka shtuar piloti gjerman i Ferrarit. Nga ana tjetër, Shumi vazhdon të luajë edhe futboll. Pasioni i tij për këtë sport tjetër tashmë nuk është sekret. Të hënën e shkuar ai mori pjesë në një ndeshje bamirësie, ku luajti përkrah nmesfushorit portugez Luis Figo. Kampioni i botës i Formulës 1 do të marrë pjesë edhe në një ndeshje tjetër bamirësie, që do të zhvillohet ditën e mërkurë në Manhaim. "Mezi pres që të marr pjesë në atë ndeshje. Jam i bindur që do të argëtohem shumë. Do të ketë shumë yje të futbollit dhe, për më tepër, trajneri ynë do të jetë i madhi Otmar Hitcfeld.