[hasanmehmeti]

ES-SELAMU ALEJKUM UE RAHMETULL-LLAHI UE BERAKATUHU.

Falënderimi i takon All-llahut. Atë e falënderojmë dhe prej Tij falje dhe ndihmë kërkojmë. Kërkojmë mbrojtje nga All-llahu prej të këqijave të vetvetes dhe të veprave tona. Kë e udhëzon All-llahu s'ka kush e lajthit dhe kë e largon nga rruga e vërtetë, s'ka kush e udhëzon. Dëshmoj se s'ka te adhuruar tjetër përveç All-llahut , i Cili është Një dhe dëshmoj se Muhammedi është rob dhe i dërguar i Tij.
"O ju që keni besuar, keni frikë All-llahun me një frikë të denjë dhe mos vdisni, pos duke qenë muslimanë!" (Ali Imran: 102)
"O ju njerëz! Keni frikë Zotin tuaj që ju ka krijuar prej një veteje dhe nga ajo krijoi palën e saj, e prej atyre dyve u shtuan shumë burra e gra. Dhe keni frikë All-llahun që me emrin e Tij përbetoheni, ruajeni farefisin, se All-llahu është Mbikqyrës mbi ju." (En-Nisa:1)
"O ju besimtarë, keni frikë All-llahun dhe thuani fjalë të drejta. Ai (All-llahu) ju mundëson të bëni vepra të mira, jua shlyen mëkatet e juaja,e kush respekton All-llahun dhe të Dërguarin e Tij, ka shpëtuar me një shpëtim të madh." (El-Ahzab:70:71)
Thënia më e vërtetë është thënia e All-llahut, kurse udhëzimi më i mirë - udhëzimi i Muhammedit sal-lall-llahu 'alejhi ue ala alihi ue sel-lem.Veprat më të këqia janë ato të shpikurat, ç`do shpikje është bid'at dhe ç`do bid'at është lajthitje, e ç`do lajthitje çon në zjarr.


KËRKIMI LLOGARI NDAJ VETES

Falenderimet i takojnë Allahut, Zotit të Tokës dhe qiejve, Atij që i falenderon mirësitë, Atij që i fal të këqijat, Atij që gjithkujt i llogarit veprat e pastaj shpërblen për të mirat e ndëshkon për të këqijat dhe nuk bën padrejtësi as sa një grimcë. "... e nëse ajo vepër është e mirë, Ai e shumëfishon atë dhe vetë Ai i jep shpërblim të madh." (En-Nisa: 40) Dëshmoj se nuk ka të adhuruar tjetër përveç Allahut, të adhuruarit të krijesave, dhe dëshmoj se pejgamberi dhe zotëria ynë Muhammedi është rob dhe i dërguar i Tij. O Allah, fale, përshëndete dhe begatoje robin dhe të Dërguarin Tënd, Muhammedin, familjen dhe shokët e tij.


Frikësojuni Allahut dhe bindjuni Atij, frikësojuni asaj dite kur askush nuk mund të shlyejë gjë për asnjë tjetër por janë vetëm punët me të cilat vuan i keqi dhe gëzon i lumturi.

O robërit e Allahut! Allahu i Madhëruar dërgoi tek ju robin e tij Muhammedin alejhis-selam si përgëzues dhe paralajmërues, si thirrës në rrugën e Allahut dhe si pishtar ndriçues. Ai i zbriti atij Kur`anin e Nderuar si dritë e qartë. Nuk ka ndonjë mirësi veçse na ka lajmëruar dhe na ka urdhëruar për të e nuk ka ndonjë të keqe veçse ka ndaluar prej saj. Allahu i Madhëruar ka thënë: (ky është komentimi i ajetit) "Asgjë nuk kemi lënë pas dore në libër nga evidenca." (El-En`am: 38 ) dhe "Ne ty të shpallëm librin sqarim për çdo send, udhëzim, mëshirë dhe përgëzim për myslimanët." (En-Nahl: 89)
Pejgamberi sal-lallahu alejhi ue sel-lem ka thënë: "Me të vërtetë hallalli është i qartë dhe harami është i qartë ndërsa mes tyre ka çështje të dyshimta të cilat nuk i dinë shumë njerëz. Kush i ruhet atyre me të vërtetë e ka mbrojtur fenë dhe nderin e tij ndërsa kush bie në to veçse ka rënë në haram si ai çobani që i kullot bagëtitë rreth një zone të ndaluar e nga çasti në çast mund t`i futen brenda. Çdo mbret ka zonat e tij të ndaluara ndërsa zonat e ndaluara të Allahut janë haramet. Me të vërtetë në trup ndodhet një copë mishi e cila kur është e saktë bën që edhe i gjithë trupi të jetë i saktë ndërsa kur ajo prishet edhe i gjithë trupi prishet. Ajo është zemra."
Transmetoi Buhariu dhe Muslimi nga Nu`man ibn Beshijr (Allahu qoftë i kënaqur prej tij!)
Ndërsa në hadithin tjetër: "Allahu i Madhëruar ka caktuar detyra prandaj mos i humbisni ato, caktoi kufij prandaj mos i shkelni ato, bëri haram disa gjëra prandaj mos i veproni ato dhe pushoi ndaj disa të tjerave si mëshirë për ju prandaj mos pyesni për to."

Nëse mësove o musliman se cilat janë detyrat e Allahut ndaj teje dhe se çfarë të drejtash kanë të tjerët ndaj teje atëherë e ke detyrë t`i kërkosh llogari të fortë vetes, të vazhdueshme që të të lehtësohet llogaria në Ahiret. Ai që e ndien se Allahu është mbikqyrës i tij dhe i frikësohet Atij në gjithçka që vepron ose lë, do të ketë më pak mangësira në detyrat e tij, do t`i largohet të këqijave dhe do t`i kryejë si duhet të drejtat e të tjerëve ndaj tij. "Vërtet, ata të cilët ndaj madhërisë së Zotit të tyre kanë frikë. Ata të cilët u besojnë argumenteve të Zotit të tyre. Dhe ata të cilët nuk i përshkruajnë shok Zotit të tyre. Dhe ata të cilët japin (sadaka-zekat) nga ajo që u është dhënë dhe zemrat u dridhen sepse e dinë se do të kthehen te Zoti i tyre. Të tillët janë ata që shpejtojnë drejt të mirave dhe të parët do t’i arrijnë ato." (El-Mu`minun: 57-61)

Atij që ndien mbikqyrjen e Allahut, i frikësohet Atij dhe vepron ato gjëra që e afrojnë tek Ai dhe e largojnë nga gjynahet dhe haramet, do t`i qartësohet mendja, do t`i rregullohet gjendja dhe përfundimi i tij.
Allahu i Madhëruar ka thënë: (ky është komentimi i ajetit) "E kush iu frikësua paraqitjes para Zotit të vet dhe ndaloi veten prej epsheve. Me të vërtetë Xhenneti është vendkthimi i tij." (En-Naziat: 40-41) Ai që i kërkon llogari vetes dhe e bën atë durimtare në adhurimin e Allahut, duke iu bindur kështu thënies së Allahut të Madhëruar (ky është komentimi i ajeteve) "Ai është Zoti i qiejve dhe i tokës dhe ç`ka ka në mes tyre, pra Atë adhuroje, e në adhurim ndaj Tij bëhu i qëndrueshëm. A di për Atë ndonjë emnak (adash)!" (Merjem: 65), "Urdhëro familjen tënde për namaz, e edhe ti vetë zbatoje atë, sepse Ne nuk kërkojmë prej teje ndonjë furnizim (për ty as për familjen tënde), Ne të furnizojmë ty (dhe ata), përfundimi i mirë është për të devotshmit." (Ta Ha: 132) dhe "O ju të cilët besuat, bëni durim, bëhuni të qëndrueshëm kundër armikut, rrini të përgatitur dhe frikësojuni All-llahut me shpresë se do të fitoni." (Ali Imran: 200) si dhe duke marrë shembull shokët e të Dërguarit të Allahut të cilët tregoheshin të kujdesshëm ndaj namazit.

Abdullah ibn Mes`udi (Allahu qoftë i kënaqur prej tij!) për namazin me xhemat ka thënë: Ne kemi parë se nuk prezanton në të veçse ai që është munafik i njohur. Sillej personi i sëmurë duke u mbajtur mes dy të tjerëve derisa drejtohej në saf.
Ndërsa Umeri (Allahu qoftë i kënaqur prej tij!) ka thënë: O ju njerëz! Kërkojini llogari veteve tuaja para se të gjykoheni, peshojini ato para se të peshoheni dhe pregatituni për daljen e madhe përpara Allahut.

Kush i kërkon llogari vetes së tij dhe punon sipas Sunnetit, do t`i shtohen të mirat e do t`i pakësohen të këqijat, përfundimi i tij do të jetë i mirë, do ta takojë Zotin e tij e Ai do të jetë i kënaqur prej tij dhe do ta çojë në një vend të nderuar bashkë me pejgamberët, të sinqertit, dëshmorët dhe njerëzit e mirë e sa shoqëri e mirë që është ajo.

Kërkojini llogari veteve tuaja për fjalët që thoni sepse Allahu i Madhëruar thotë: (ky është komentimi i ajetit) [b]"E ai nuk thotë ndonjë fjalë e të mos jetë pranë tij një mbikqyrës i gatshëm." [/b(Kaf: 18 )
"Kurse mbi ju ka rojtarë! Shkrues të ndershëm (te All-llahu). Ata e dinë se ç`ka punoni." (El-Infitar: 10-12)
Kërkojini llogari veteve tuaja për punët që bëni se Allahu i Madhëruar thotë: (ky është komentimi i ajetit) "E kush e punoi ndonjë të mirë, që peshon sa grimca, atë do ta gjejë. Dhe kush punoi ndonjë të keqe sa grimca, atë do ta gjejë." (Ez-Zelzele: 7-8 )
Kërkojini llogari veteve tuaja për ato që fshehin në zemra se Allahu i Madhëruar thotë: (ky është komentimi i ajetit) "Dhe dijeni se All-llahu di ç`ka fshehni në vetvete, pra kini frikë prej Tij." (El-Bekare: 235)

Nëse ty o musliman nuk të bëhet i qartë gjykimi i një vepre në Sheriat atëherë pyet dijetarët për të. Allahu i Madhëruar ka thënë: (ky është komentimi i ajetit) "Pyetni pra dijetarët nëse ju nuk dini."
(En-Nahl: 43)
Nëse muslimani bëhet i lëkundur për ndonjë çështje të dyshimtë le të ketë kujdes e mos ta veprojë sepse Muhammedi alejhis-selam ka thënë: "E mira është ajo tek e cila të qetësohet zemra dhe vetja ndërsa gjynahu është ai i cili vërtitet tek vetja dhe e urren që ta dinë njerëzit." Vetja e qetësuar është ajo e cila do atë që e do edhe Allahu, urren atë që e urren edhe Allahu, është ajo e cila e ka besuar Allahun dhe është mbështetur tek Ai për gjithçka. Është ajo vete e cila e qorton të zotin e saj për mangësitë që tregon në kryerjen e detyrave dhe e qorton për veprimin e gjynaheve. Ndërsa zemra e mirë është ajo e cila ka shpëtuar nga pasimi i epsheve dhe nga dyshimet, ajo është zemra e cila di ta dallojë mirësinë nga gjynahu dhe të mirën nga e keqja kur ato ngatërrohen me njëra-tjetrën.

Ndërsa vetja e sëmurë me pasimin e epsheve dhe zemra e sëmurë me dyshime është ajo e cila nuk di të dallojë mes të mirës dhe të keqes kur ato ngatërrohen dhe nuk e do atë që e do Allahu, përkundrazi urren atë që do Allahu dhe do atë që e urren Allahu. "E ata, që në zemrat e tyre kanë anim nga e shtrembëta, ata gjurmojnë atë që nuk është e qartë për të shkaktuar fitne e kështu kërkojnë komentin e tyre. Por, përveç All-llahut askush nuk e di domethënien e tyre të saktë. Dijetarët e pajisur me dituri thonë: Ne e kemi besuar atë (që është e paqartë), të gjitha janë nga Zoti ynë!" (Ali Imran: 7)
"Por ata (idhujtarët), nuk ndjekin tjetër vetëm se paragjykime dhe ç`ka duan vetë, megjithëse prej Zotit të tyre u pat ardhur udhëzimi." (En-Nexhm: 23)
Prandaj kërkimi llogari vetvetes bashkë me pasimin e Sunnetit profetik janë rruga e vetme e shpëtimit.

Ndërsa ai i cili i plotëson vetes së tij epshet dhe e lejon atë të kullosë në lëndinat e humbjes, epsheve, shthurjes dhe e largon atë nga kujdesi për adhurimin e Allahut e largohet nga Sunneti i të Dërguarit të Allahut, ka arritur në një gjendje të keqe dhe përfundimi i tij do të jetë i keq. Allahu i Madhëruar ka thënë: (ky është komentimi i ajetit) "Ju nuk fshiheshit (kur bënit mëkate) se do të dëshmojnë kundër jush të dëgjuarit tuaj, të parit tuaj dhe lëkurat tuaja, bile ju menduat se All-llahu nuk di shumë gjëra që ju bënit. Ai është mendimi juaj i gabuar, të cilin e patët ndaj Zotit tuaj, është ai që ju shkatërroi dhe tani jeni më të dëshpruarit. Nëse bëjnë durim, zjarri është vend i tyre, e nëse kërkojnë të kthehen në atë që e dëshironë (në kënaqësinë e Zotit), atë nuk do t`a arrijnë." (Fussilet: 22-24)

O robërit e Allahut! Gjendja e muslimanëve sot bën të domosdoshëm mendimin, meditimin korrigjimin dhe rregullimin e gjendjes së tyre sepse armiqtë e Islamit janë vërsulur mbi ta, fjala e tyre është përçarë, mendimet e tyre kundërshtojnë njëra-tjetrin, mes tyre janë shtuar bidatet, e keqja u vjen prej njeri-tjetrit, janë shtuar mbi ta fatkeqësitë. Çdo musliman e di se shkaku i gjithë kësaj është mangësia që ata kanë treguar në fenë e tyre. Por nëse ata rregullojnë ç`ka mes tyre dhe Zotit të tyre, Allahu ka për të rregulluar ç`ka mes tyre dhe njerëzve të tjerë si dhe problemet mes tyre. Allahu i Madhëruar ka thënë: (ky është komentimi i ajetit) "Me të vërtetë All-llahu nuk e ndryshon gjendjen e një populli derisa ata ta ndryshojnë veten e tyre. Po, kur All-llahu vendos ta ndëshkojë një popull, atë nuk ka kush që ta zbrapsë. Ata, (njerëzit) nuk kanë mbrojtës tjetër përveç Tij." (Er-Ra`d: 11)

Hapi i parë për të rregulluar gjendjen e muslimanëve është rregullimi i personit dhe i grupeve të ndryshme e kjo duke i kërkuar çdo person llogari vetes së tij për gjithçka para se Allahu t`i kërkojë atij llogari se çfarë ka bërë për Islamin dhe a i është bindur, nënshtruar dhe e ka dashur Allahun? A i ka respektuar ndalesat e Allahut duke iu larguar atyre dhe duke i urryer ato? A e madhëron ligjin e Allahut? Allahu i Madhëruar ka thënë: (ky është komentimi i ajetit) "Pra, kështu: Kush madhëron atë që All-llahu e bëri të shenjtë, ajo është më e dobishme për të te Zoti i tij." (El-Haxh: 30)

A e madhëron muslimani Sunnetin profetik duke e mësuar dhe pasuar atë, duke urryer kundërshtimin e tij dhe bidatet që shpiken? A i plotëson muslimani të drejtat e prindërve, të afërmve dhe të muslimanëve të tjerë? A pendohet ai për gjynahet që bën dhe a qan për gabimet e tij? A shton ai çdo ditë dije, kuptim dhe punë të mira në fenë e Allahut e cila është Islami, feja të cilën e pëlqen Zoti i botëve? Zoti ynë i Madhëruar kërkon prej nesh që ta takojmë Atë në Ahiret me punë të mira e jo vetëm me pretendime. Ai na ka bërë detyrë që të jetojmë në dynja me sinqeritet në fjalët dhe veprat tona me të cilat i afrohemi Zotit tonë, e duam Krijuesin tonë. Allahu është Ai i cili nderon kë të dojë dhe poshtërron atë që poshtërron urdhërat e Tij. A mos vallë ka vuajtur ndokush për shkak të bindjes ndaj Allahut? Allahu i Madhëruar ka thënë: (ky është komentimi i ajetit) "Dhe thuaj: Veproni, All-llahu do ta shohë veprën tuaj, edhe i dërguari i Tij e besimtarët, e pastaj do të ktheheni te njohësi i të fshehtës dhe të dukshmes, e do t’ju njoftojë për atë që vepruat." (Et-Teube: 105)

Kërkimi i llogarisë që muslimani i bën vetvetes për çdo gjë të vogël ose të madhe sëbashku me kapjen fort pas Sunnetit profetik është varka e shpëtimit, rrugullatorja e jetës dhe fitorja me kënaqësinë e Allahut. Allahu i Madhëruar ka thënë: (ky është komentimi i ajetit) "O ju që besuat, frikësojuni All-llahut dhe le të shikojë secili se ç`ka ka bërë për nesër. Dhe frikësojuni All-llahut! Me të vërtetë All-llahu është i dijshëm për atë që punoni!" (El-Hashr: 18 )

Në hadith thuhet: "Ai të cilin e gëzon e mira e tij dhe e hidhëron e keqja e tij, është besimtar." Ndërsa nga Enesi (Allahu qoftë i kënaqur prej tij!) transmetohet se ka thënë: Ju po veproni disa gjëra që në sytë tuaja janë më të holla se floku ndërsa në kohën e të Dërguarit të Allahut sal-lallahu alejhi ue sel-lem i konsideronim prej gjynaheve të mëdha. Transmetoi Buhariu.

"Me të vërtetë Allahu dhe engjëjt e Tij e lavdërojnë Pejgamberin. O ju që keni besuar, lavdërojeni atë (duke bërë salavate për të) dhe përshëndeteni me selam." (El-Ahzab: 56)

Shejhu: Ali Abdurrahman El-Hudhejfi
17/11/1424H

Kerkojmi falje dhe meshire nga Allahu xh.h per vete dhe per ju andaj edhe ju bene nje gje te tille ngase Allahu xh.h eshte Fales dhe Meshirues.

Lutja jone e fundit eshte :
Falenderimi dhe i tere Suksesi i takon Allahut xh.h

Esselamualejkum musliman nga vellau juaj ne Islam