[Psikologu]

HAMITI: VARRIMI I RUGOVËS DO TË JETË KOMBËTAR DHE SHTETËROR



Prishtinë, 23 janar (MIA) - Naser Rugova, këshilltar i kryeministrit dhe i afërm i Ibrahim Rugovës, ka thënë për Kosovapress se varrimi i kryetarit të Kosovës do të bëhet në varrezat e dëshmorëve në lagjen "Velania" të Prishtinës. Roje nderi gjatë tërë ditës ka bërë Garda e Trupave Mbrojtëse të Kosovës, ndërkaq në orët e mbrëmjes rojë nderi janë duke bërë pjesëtarët e SHPK-së.

Muhamet Hamiti, koordinator i Këshillit të varrimit nuk sqaroi se në cilat varreza do të bëhet varrimi i kryetarit të vendit, Ibrahim Rugova, por vetëm ka pohuar se do të bëhet më 26 janar në Prishtinë.

Hamiti, ndërkaq, nuk dha detaje shtesë se me çfarë ritesh do të varroset Rugova, duke sqaruar se do të jetë një varrim kombëtar dhe shtetëror.

Ai tha se një pjesë e informacioneve që lidhen me ceremoninë e varrimit do të bëhen të ditura gjatë ditës së nesërme, ndërkohë ka pohuar se në ditët e ardhshme do të konfirmohet saktësisht se cilat nga personalitetet e jashtme do të marrin pjesë në varrimin e kryetarit të Kosovës, Ibrahim Rugova.

"Ne vazhdojmë të marrim konfirmime nga bota e jashtme, por ky është një proces në vazhdim dhe informacioni i plotë do të jepet gjatë ditës së nesërme", deklaroi Hamiti.

Ndryshe, qytetarë të shumtë kanë filluar të bëjnë homazhe para arkivolit të Rugovës që nga orët e mëngjesit deri në orët e mbrëmjes. Edhe pse ishte paraparë që homazhet të përfundojnë rreth orës 18.00, qytetarët kanë vazhduar të nderojnë kryetarin Ibrahim Rugova.

Arkivoli me trupin e pajetë të kryetarit Rugova, i mbuluar me flamurin e Presidencës, është vendosur rreth orës 8.30 në hollin e Kuvendit të Kosovës, ku do të qëndrojë deri në paraditen e së enjtes. Ndërkohë, që personalitete të larta vendore dhe ndërkombëtare dhe qytetarë të shumtë nga e gjithë Kosova gjatë gjithë ditës kanë bërë homazhe para arkivolit.

Ceremonia zyrtare mortore, para nisjes për në banesën e fundit të kryetarit të Kosovës, Ibrahim Rugova do të zhvillohet të enjten në sallën "1 Tetori" në Prishtinë.

Siç dihet, Këshilli ekzekutiv i ceremonive mortore për kryetarin e Kosovës ka shpallë 15 ditë zie kombëtare. Dita e enjte, më 26 janar, dita e varrimit të kryetarit, do të jetë ditë pushimi, kurse që nga sot deri të enjten nuk do të ketë mësim në të gjitha nivelet arsimore, ndërsa në ditët e tjera nuk do të ketë aktivitete kulturore dhe sportive.

Këshilli Ekzekutiv ka vendosur që përgjegjësinë për ruajtjen e sigurisë ta mbajë Shërbimi Policor i Kosovës. Strukturat e rendit, nën udhëheqjen e Shërbimit Policor të Kosovës (SHPK), konfirmuan se kanë marrë të gjitha masat në mënyrë që ceremonitë mortore të zhvillohen dinjitetshëm.

Kryetari i Kosovës, Ibrahim Rugova, vdiq të shtunën në ora 11.38 pas një sëmundjeje të rëndë. Ai ishte 61-vjeçar.