[Arb]

Mos shkruaj për Kolë Berishën se është për gjynah

Më thanë miqtë e tij të mos shkruaja për Kolë Berishën. U thashë atyre t’i thonë Kolë Berishës të mos flet më qyfyre.

S’i ka hije, si gjithnjë, që në njërën anë t’i dridhet buza e tij përherë e përvajshme, sa herë i duhet dr. Rugova dhe sa herë detyrohet për shkaqe protokolli të vizitojë varrin e tij dhe, edhe më shumë s’i ka hije, kur menjëherë, ama menjëherë, pas këtyre çasteve, harron çdo gjë dhe ia fut qyfyreve dritëshkurtra prej “burri” përjetimesh krejtësisht të lëkundura kujtimesh për Presidentin Rugova.

A është bërë, u them, ai, zotni Kola, keqpërdorues dhe interespërfitues kur mbushë fjalët e tij kopjuese me emrin e dr. Rugovës? Është bërë! A janë bërë edhe të tjerët rreth tij? Janë bërë!

A i kanë harruar premtimet dhe zotimet se do të ndjekin vizionet e dr. Rugovës, të cilat ia ka pranuar gjithë fuqia e botës? I kanë harruar! Përse atëherë flasin dhe përse përpiqen që ende, në mënyrën më boshe të vetveteve, flasin në emër të tij?

A nuk tha Kolë Berisha para nja një muaji në një emision televiziv, ku bëhej fjalë edhe për simbolet e Kosovës, se “flamuri (i Dardanisë- vërejtja jonë), të cilin e ka kompozuar Ibrahim Rugova tashmë e ka bërë jetën e vet dhe se nuk është e thënë të jetë ai”?

E tha, se nuk pritej të thoshte ndryshe, sepse edhe ai e ka bërë jetën e tij dhe nuk është e thënë të jetë më. Mos shkruaj, më thanë prapë miqtë e tij. Është plak dhe nuk ia pret mendja, nuk e di se çfarë thotë. Është e vërtetë, u them.

Ai nuk di se ç’thotë, ose bëhet të jetë i tillë. Kur ia do interesi ai futë thellë thonjtë e tij dhe gërvishtë gjithandej me shkathtësi të jashtëzakonshme njohësish.

Ai ua ndërpret edhe deputetëve fjalën, kur ata flasin për këto çaste të mëdha e historikisht të rëndësishme dhe u thotë: Nuk jemi në orën e historisë!

Pastaj, më thonë prapë të mos shkruaj për Kolë Berishën se është plak, edhe pse u ka dalë zot shumë funksioneve në emër të ripërtëritjes së LDK-së dhe të institucioneve, të cilat i shembën, dhe, nëse shkruan për këto, nuk mund të thuash asgjë të re për zotni Kolën, sepse ai ishte dhe është i tillë... për gjynah...

Sylejman ALIU, Iliria Post