[Zero Cool]

Hamiti: Bashkësia Islame pa vizion të qartë





Krejt ajo çfarë ka përjetuar Xhabir Hamiti për 15 vite si pjesë e Bashkësisë Islame të Kosovës, ka qenë preokupimi i kësaj kryesie se si ta organizojë haxhin, therjen e kurbaneve, kërkimin e donacioneve për ndërtimin e xhamive dhe objekteve mësimore. Pavarësisht se edhe për të, këto çështje kanë qenë me rëndësi, Hamiti thotë se asnjëherë nuk ka dëgjuar e parë ndonjë projekt apo agjendë të një vizioni të qartë të BIK-ut. Apo edhe ndonjë iniciativë e sinqertë dhe serioze, për të rishkruar korniza të reja të punës së BIK-së sidomos pas luftës ose pas pavarësisë së saj. Janë këto fjalë që i tha në mbledhjen pas së cilës Hamiti humbi postin e kryetarit të këshillit të BIK.


“Nuk po e kuptoj, se prej kujt po frikësohemi për një riorganizim substancial të brendshëm të BIK-së, që nënkupton një funksionim autokton kosovar dhe shqiptarë të saj, që punon për fe dhe për atdhe, e që nuk bie pre e nuk rrëshqet në animin e rrymave dhe interesave të huaja, të cilat shpeshherë veprojnë të fshehura nën petkun e fesë”, iu është drejtuar Hamiti anëtarëve të këshillit.

E numërimi i parregullsive nuk ka përfunduar me kaq. Hamiti foli edhe për problemet që janë tash e sa vite në Medresenë e mesme Alaud-din.

“Ka më shumë se 10 vite, që kuadrot fetare pranohen pa konkurs, nuk ka ndryshim të plan programeve dhe të kurrikulave për shumë subjekte mësimi, kurse disa lëndë ende gati 30 vite e më tutje, janë të njëjtat me të njëjtin tekst dhe të njëjtën përmbajtje”, thotë Hamiti.

Ai pati kritika edhe për Fakultetin e Studimeve Islame. Tha se në FSI-së që nga viti 2010, është ngulfatur autonomia akademike dhe administrative, me ndërhyrjen klasike të stafit teknik të Kryesisë së BIK-ut.

“Janë nëpërkëmbur kriteret akademike, janë dhuruar thirrje akademike nga 2 e 3 përnjëherë, vetëm për personelin e ngushtë, të cilët përveç punës në Fakultet paguhen rregullisht me paga mujore të majme nga organizata të huaja. Mbi dy vite me radhë Fakulteti udhëhiqet nga një person me status të pensionerit, që është emëruar nga Kryesia përmes nëpërkëmbjes së kritereve akademike dhe shkeljes juridike administrive të Fakultetit. Për dijeninë tuaj, Fakulteti i Studimeve Islame as pas këtyre viteve nuk është licencuar , as nga Ministria e Arsimit , por edhe nuk është pranuar inkuadrimi i tij në kuadër të Universitetit të Prishtinës. Arsyeja kryesore e mos legjitimimit dhe licencimit të Fakultetit tonë në kuadër të institucioneve tona zyrtare legjitime, edhe pas kaq shumë viteve është edhe dhënia e thirrjeve akademik të modelit ‘unë ty e ti mua’”, është shprehur Hamiti.

E nuk e la pa e përmendur edhe fenomenin e laramanive të formës se si po falet namazi nëpër xhamitë e Kosovës.

“Diku ngritën duart deri në bel, diku deri në gjokes, diku falen vetëm 8 reqate taravi, diku 20, e që në shikim të parë ndoshta nuk na duken çështje të mëdha, mirëpo nëse kështu vazhdon edhe në të ardhmen, kjo do të jetë fillimi i poliralizimit dhe ndarjes së madhe të besimtarëve mysliman në Kosovë, që nuk do t`i bënte nder as komunitetit mysliman e as të ardhmes së vendit tonë”, ka pohuar Hamiti duke thënë se ata që falen nuk janë fajtor, por që sipas tij i vetmi fajtor këtu janë punonjësit e BIK-së, të dekretuar nga kjo kryesi, të cilët xhematit po ju prijnë e po i mësojnë jashtë vijës institucionale të BIK-së, e po lihen të lirë pa kurrfarë përgjegjësie.

/Express/