[Zero Cool]

Obama kërkon hetime deri në fund


Uashington, 20.04.2013

“Do të zbulojmë se çfarë ndodhi dhe do të bëjmë gjithçka për të siguruar popullin tonë.” Kështu u shpreh presidenti i Shteteve të Bashkuara të Amerikës, Barack Obama, pas arrestimit të Dzhokhar Tsarnaev, të dyshuarit të dytë për atentatet e së hënës në maratonën e Bostonit.

Në një komunikim me mediet në Shtëpinë e Bardhë, Obama falënderoi trupat e angazhuara në këtë operacion dhe theksoi se autorët e atentatit dështuan në objektivin e tyre pasi “amerikanët nuk pranojnë të terrorizohen”.

“Familjet e viktimave dhe të plagosurve meritojnë përgjigje. Me këtë arrestim është mbyllur një kapitull i kësaj tragjedie”, theksoi Obama, i cili shtoi se populli amerikan duhet të qëndrojë larg paragjykimeve të nxituara ndaj të huajve që vijnë në SHBA duke qenë se atentatorët e Bostonit ishin nga Ceçenia.

“Është e rëndësishme që të vazhdojmë të mirëpresim të huajt që vijnë në vendin tonë nga e gjithë bota. Shpirti amerikan përfshin diversitetin dhe duhet ta ruajmë këtë karakteristikë që na bën më të fortë”, tha presidenti.

Obama kujtoi edhe viktimat e shpërthimit në një fabrikë të Teksasit, të cilët i siguroi se nuk do të harrohen edhe pse ngjarja në Boston ka tërhequr më shumë vëmendje: “Ka qenë një javë e vështirë për ne, por edhe një herë tjetër treguam karakterin e kombit tonë.”