[Domira]

KOHA DITORE
Publikuar: 11.10.2012 - 13:31

Nobeli për letërsi, shkrimtarit kinez Mo Yang
Stockholm, 11 tetor – Shkrimtari i njohur kinez, Mo Yang është fitues i çmimit “Nobel” për letërsi të këtij viti, ka kumtuar akademia mbretërore e Suedisë.

Shkrimtari kinez, i cili në fakt këtë emër e ka pseudonim që do të thotë “Mos fol”, ka lindur në vitin 1955. Është një nga shkrimtarët më të njohur dhe më të ndaluar në Kinë.

Është i njohur edhe për faktin se veprat e tij mbretërojnë n tregun letrar pirateresk ndërsa shpesh herë e quajnë edhe si “Kafka kinez”.

__________________________

VOA Zeri i Amerikes

10.10.2012

Çmimi Nobel i vitit 2012 për kiminë

Shkencëtarët Robert Lefkowitz dhe Brian Kobilka e fituan çmimin për kërkimet e tyre mbi receptorët e qelizave, që janë përgjegjëse për absorbimin e ilaçeve farmaceotike

Amerikanët Robert Lefkowitz dhe Brian Kobilka u shpallën fitues të çmimit Nobel në kimi për vitin 2012.

Akademia Suedeze e Shkencave në Stokolm i njoftoi sot fituesit e çmimit prestigjoz.
Shkencëtarët Lefkowitz dhe Kobilka e fituan çmimin për kërkimet e tyre mbi receptorët e qelizave, të cilët janë përgjegjëse për mënyrën se si ilaçet farmaceotike absorbohen nga trupi.

Zoti Lefkowitz, profesor në Universitetin Duke në Karolinën e Veriut, tha se ishte "tronditur dhe habitur" kur dëgjoi lajmin, i cili, shtoi ai, i erdhi ndërsa po flinte.

Zoti Kobilka është profesor në Universitetin Stanford në Kaliforni.

Njoftimet për çmimet Nobel filluan të hënën me çmimin në mjekësi, i cili u fitua nga studiuesit e qelizave embrionale, John Gurdon nga Britania dhe Shinya Yamanaka nga Japonia. Amerikani David Wineland dhe francezi Serge Haroche u shpallën dje fitues në fizikë për kërkimet e tyre në fizikën kuantike, në veçanti në optikën kuantike, që merret me kapjen dhe manipulimin e grimzave të dritës.

_______________________________

TEMA

Çmimin Nobel në fizikë e merr një francez e një amerikan

9 Tetor, 2012 |


David Wineland
Këtë vit çmimin Nobel në fizikë e kanë marrë dy kërkues, për punën që kanë bërë me dritën dhe materien në nivelin më themelor.

Sipas BBC, Serge Haroche i Francës dhe David Wineland i SHBA, do të ndajnë çmimin me vlerë 1.2 milion dollarë.

Puna e tyre merret me fotonet dhe jonet, njësitë themelore të dritës dhe të materies.

Arritjet e tyre mund të çojnë në mënyra më të avancuara të komunikimit dhe të llogaritjes.

Në njoftimin e Nobel-it thuhet se çmimi u jepet për “metodat e rëndësishme eksperimentale që mundësojnë matjen dhe manipulimin e sistemeve kuantike individuale”.

Të punoje me dritën dhe materien në këtë nivel do ishte e pamendueshme përpara se ata të dy të gjenin zgjidhjen për të marrë, manipuluar dhe më pas matur në mënyrë individuale fotonet dhe jonet.

Puna e tyre mund të ketë shumë ndikim tek orët atomike, që vendosin orën precize kudo, nga satelitët GPS tek bankat dhe tek përllogaritja kompjuterike, që mund të revolucionojë kompjuterët tanë.

Profesor Haroche tha se kur e mori lajmin, për fat ishte pranë një stoli dhe u ul.

“Po shëtisja me gruan kur pashë prefiksin e Suedisë në telefonin tim,” tha ai i lumtur.

Çmimet Nobel jepen që prej vitit 1901, duke mbuluar fushat e mjekësisë, fizikës, kimisë, letërsisë, paqes dhe ekonomisë.

Çmimi i parë Nobel për fizikën ka shkuar për Wilhelm Roentgen, nga Gjermania, për zbulimin e rrezeve X. Në total deri tani 194 njerëz e kanë marrë këtë çmim.