[Dilaver]

- Kush përfiton nga ky projekt?


I pari që përfiton jashtëzakonisht shumë nga ky projekt është vendi pritës i tij. Favoret e shtetit shqiptar janë si të drejtpërdrejta, ashtu edhe të tërthorta nga zbatimi i këtij projekti. Në përfitimet e drejtpërdrejta pikë së pari renditet e drejta për të blerë energji në koston e prodhimit dhe shumë herë nën çmimin e tregut ndërkombëtar, për sasinë e kërkuar që plotëson nevojat e brendshme të vendit. Investitorët besojnë se qeveria e Shqipërisë do të mund të blejë rreth 200 MW energji për një periudhë të pakufizuar, aq sa janë sipas ekspertëve edhe nevojat e vendit. Po ashtu, lidhja me rrjetin ndërkombëtar të energjisë krijon në këtë rast mundësinë që Shqipëria të importojë drejtpërdrejt nga Italia në orët e natës, kur çmimi i energjisë është shumë herë më i ulët, sesa në orët e pikut të përdorimit.
Ndërsa Shqipëria sot ka një humbje të rëndësishme në rrjetin e saj kombëtar të energjisë për shkak të prodhimit të energjisë vetëm në Veri të vendit, ndërtimi i kësaj pike të prodhimit të energjisë në JJug, përmes ballancimit të rrjetit, ndërpret humbjet e energjisë, duke kursyer gjithashtu një vlerë të rëndësishme financiare. Në pikëpamjen e ndikimit social dhe fiskal, gjatë 3 viteve të ndërtimit të veprës rreth 3500 persona do të punësohen, duke respektuar thellësisht legjislacionin shqiptar për trajtimin me dinjitet të punonjësve. 300 specialistë do të jenë të punësuar në kohë të plotë pas kompletimit të veprës për operimin e saj. "Synimi ynë është të përgatisim dhe trajnojmë të rinj të talentuar shqiptarë dhe staf inxhinierik, që dëshiron të punojë në këtë sektor të bukur dhe jetik", shpjegon më në detaje Gjinali. Ai nënvizon etikën e lartë të kompanisë, që synon të sjellë në Shqipëri bashkë me investimin jo vetëm teknologjinë e fjalës së fundit, por edhe një nivel të ri të respektit ndaj ligjit, mjedisit, në mbështetje të zhvillimit të qëndrueshëm të rajoneve me potenciale kaq të dukshme, si Fieri, përmbylli ai.