[Lona]

Rrëmbyesit e kryepeshkopit në Irak kishin kërkuar një milion dollarë

Mosul, 14 mars – Rrëmbyesit e kryepeshkopit katolik në Irak, Paulos Faraj Raho, i gjetur ditë më parë i vdekur në qytetin irakian Mosul, 390 kom në veri të Bagdadit, kishin kërkuar shpërblesë në këmbim të tij në shumën prej një milion dollarësh, ka bërë të ditur sot (e premte) një zyrtar i lartë policie, njofton Rojter. Ai ishte rrëmbyer më 29 shkurt pas një sulmi, në të cilin ishin vrarë shoferi dhe dy truproje të tij.

Austria i kërkon Al Kaidës lirimin e pakusht të 2 turistëve

Bruksel, 14 mars – Kancelari austriak, Alfred Gusenbauer, i ka bërë thirrje sot (e premte) krahut të Afrikës së Veriut të Al Kaidës për lirimin e pakusht të dy turistëve austriakë të rrëmbyer në Tunizi, por ka thënë gjithashtu se ai nuk ka ndërmend të përmbush kërkesat e rrëmbyesve, njofton Rojter. Kancelari Gusenbauer ka thënë gjithashtu se Austria është në kontakt me autoritetet vendëse për lirimin e tyre. Al Kaida ka vënë afat tri ditësh për përmbushjen e kërkesave të tyre.

Aeroporti Hitrou hap terminalin e pestë

Londër, 14 mars – Aeroporti Hitrou, më i ngarkuari në botë, sot e hap terminalin e tij të pestë. Terminali Pesë synon t'i zbutë tollovitë e mëdha në aeroportin Hitrou, dhe për 50 për qind të rritë numrin e përgjithshëm të udhëtarëve, të cilët e shfrytëzojnë këtë aeroport ndërkombëtar. Pritet që me terminalin e ri, numri i përgjithshëm i udhëtarëve të arrijë në rreth 100 milionë në vit. Hapja e terminalit nga ana e Mbretëreshës Elizabet shoqërohet me protesta të ambientalistëve për shkak të trafikut të madh ajror.

Në Peru zbulohet një tempull i ri i Inkëve

Limë, Peru 14 mars – Kërkuesit kanë zbuluar mbeturinat e një tempulli të lashtë të Inkëve, i cili ishte ndërtuar për ceremonitë fetare në malet e Andeve. Tempulli u zbulua në rajonin e pasur me trashëgimi arkeologjike në jug të Perusë, ku ndodhet edhe Maçu Piçu. Tempulli me sipërfaqe prej 800 metra katrorë, ka në vete 11 dhoma me madhësi të ndryshme dhe ka formën e Çakana, e cila paraqet simbolin e vjetër fetar të inkëve.
Aktivizohen sërish sulmet mes palestinezëve dhe izraelitëve

Gazë, 14 mars - Militantë palestinezë kanë qëlluar me 12 raketa nga Rripi i Gazës mbi qytetin izraelit Sderot. Sipas të dhënave të ushtrisë, ka dëmtime në materiale, por nuk ka të plagosur. Si kundërprgjigje ndaj këtij aksioni, forcat ajrore izraelite kanë sulmuar bazat e radikalëve palestinezë në Rripin e Gazës. Së fundi nga dhuna e ushtruar përsëri nga shkëmbimi i armëve, u vranë në Jordanin perëndimor pesë palestinezë militantë.

India arreston protestues tibetianë të mërgimit

Nju Delhi, 14 mars - Policia në Indi ka bllokuar një marshim protestues të tibetianëve në mërgim kundër lojërave olimpike në Pekin. Më shumë se 100 pjesëmarrës të kësaj demonstrate janë arrestuar në afërsi të qytetit Dehra në veri të shtetit federal të Himalajeve, Pradesh. Ky lajm u bë i ditur nga dëshmitarët. Qeveria në Nju Delhi kishte ndaluar demonstruesit e shqetësuar për marrëdhëniet me Republikën Popullore të Kinës. Protesta kishte nisur të hënën, në përvjetorin e kryengritjes së tibetianëve kundër sundimit kinez në vitin 1959. Marshimi protestues për pavarësinë e Tibetit do të vazhdojë për gjashtë muaj duke ecur deri në kufirin kinez.

Iranianët votojnë në zgjedhjet e përgjithshme

Teheran, 14 mars - Kanë filluar votimet në zgjedhjet parlamentare në Iran me thirrjet nga autoritetet që të ketë një pjesëmarrje të madhe si sfidë ndaj Shteteve të Bashkuara dhe vendeve të tjera që Irani i quan armiq. Reagimi i shume iranianëve ndaj mungesës së zgjedhjeve të mirëfillta do të jetë mosdalja në votime. Pjesëmarrja thuhet se do të jetë shumë më e ulët se 50 për qind, ndërsa në Teheran edhe më ulët. Prapa skenës fitues kryesor do të jetë garda revolucionare, e cila secilën herë po bëhet më e fuqishme. Konservatorët pritet të konsolidojnë kontrollin e tyre në parlamentin iranian, ndërsa shumë kandidatë liberal reformist janë diskualifikuar nga zgjedhjet për shkak, si] thonë ata, të mungesës së besnikërisë ndaj vlerave islamike.

Çmimi i arit kapërcen nivelin e 1000 dollarëve

Londër, 14 mars - Çmimi i arit ka kapërcyer për herë të parë nivelin e 1000 dollarëve. Për një oncë të hollë të metalit të çmuar në Londër u ofruan ndërkohë 1000,45 dollarë. Në muajt e fundit, çmimi i arit është rritur pa ndërprerë. Investitorët përdorin prej kohësh arin, sepse ky metal për shkak të pasigurive nga kriza e gjerë financiare konsiderohet si investim i sigurt. Përveç kësaj, për shkak të dobësisë së dollarit ky investim bëhet më interesant për investuesit nga zona e jo dollarit.