[Lona]

Qëndrimi i SHBA rreth statusit i pandryshuar
e martë , 30 tetor 2007
Zyrtarët amerikanë në Washington nuk janë marrë dhe as kanë komentur shkrimet e mediave në Kosovë për mundësinë e shtyrjes apo siç u tha ngrirjes së zgjidhjes së statusit të Kosovës për 13 vjetët e ardhshme, deri më 2020.
Cdo përpjekje për të marrë ndonjë deklaratë lidhur me shkrimin që bëri lajm, ishte ose 'nuk dimë', 'nuk jemi të informuar', ose i referoheshin deklaratës së shefes së Zyrës Amerikane n Prishtinë, Tina Kaidanow, se qëndrimi amerikan është artikuluar tashmë shumë herë nga
zyrtarët më të lartë amerikanë. Një burim, i cili foli me kushtin që të mos i përmendim emrin, tha se nuk përjashtonte mundësinë e ideve të tilla që 'mund të
qarkullojnë, qoftë edhe në Departmentin e Shtetit', megjithatë shtoi se kjo mund të ishte 'një spekulim', dhe ritheksoi qëndrimin se 'mendimi mbizotërues dhe vijë zyrtare e politikës amerikane ndaj Kosovës, e pandryshuar, mbetet që pas përfundimit të negociatave shtesë statusi i saj të zgjidhej sa më shpejtë'. Këtë qëndrim e ka theksuar zëdhënësi politikës së jashtme amerikane nga podiumi zyrtar të paktën tri herë gjatë muajit tetor, duke nënvizuar se 'nëse deri në fund të periudhës së vendosur për negociata nuk do të ketë një marrëveshje midis palëve, ajo që presim të ndodhë është vendimi për ecje përpara me pavarësinë e mbikëqyrur që do të jetë në përputhje me propozimin e planit të Ahtisaarit'. Padyshim se zgjidhja më e dëshirueshme, siç kanë thënë shumë herë zyrtarët amerikanë, është një marrëveshje midis palëve e cila do të ishte e pranueshme për të gjithë, mirëpo në mungesë progresit duhet të pasojë një vendim sepse, 'ka një kufi sa mund t'i jepet kohë negociatave'.