[Zero Cool]

Postimi origjinal është bërë nga Zero Cool

Buja i përgjigjet LDK-së për historinë






10:45 / 13.09.2011
Lidhja Demokratike e Kosovës ka kritikuar ashpër Qeverinë e Kosovës, duke vlerësuar se po e ndryshon historinë e popullit shqiptar. Por, Ministri i Arsimit, Ramë Buja, thotë se nuk ekziston asnjë marrëveshje me shtetin turk, përveç se ministria ka krijuar komision ekspertësh për analizimin e teksteve të historisë.
“Janë akuza, janë trillime, janë shpifje, gjithçka ka ngelur me formimin e komisionit të ekspertëve, asgjë më shumë”, ka thënë Buja për Express.

“MASHT njofton të gjithë opinionin publik se as Qeveria e Kosovës, e as MASHT nuk ka nënshkruar asnjë marrëveshje që nënkupton ndryshimin e teksteve të historisë. Për më tepër, Qeveria e Kosovës dhe as MASHT nuk ndryshojnë historinë, sepse ajo është çështje e studiuesve”.

Zyrtarë të MASHT-it kanë thënë se kjo ministri mbetet e përkushtuar që të eliminojë gjuhën e urrejtjes dhe pasaktësisë shkencore nga të gjitha tekstet shkollore dhe jo vetëm në atë të historisë. /Telegrafi/

LDK, Bujës: U dëshmua se falsifikimi i teksteve ka filluar





Lidhja Demokratike e Kosovës vlerësoi të martën se ministri i Arsimit, Shkencës dhe i Teknologjisë, Ramë Buja, në frymën e sjelljes së Qeverisë së tij dhe me gjuhën e saj, ditën që reagoi kjo parti, ka provuar se falsifikimi i teksteve të historisë tanimë ka filluar.
Ai i ka quajtur “akuza, trillime, shpifje” raportimet e medieve dhe reagimin e LDK-së, por vetë ka dëshmuar se Komisionet për ndryshimin e teksteve tanimë janë formuar.

Sipas kësaj partie, LDK-ja nuk ka thënë në asnjë rast se Qeveria e Kosovës ka nënshkruar ndonjë marrëveshje me Qeverinë e Turqisë për ndryshimin e teksteve shkollore të lëndës së historisë. “LDK-ja ka thënë se Qeveria, tinëzisht dhe për interesa politike, po tenton ta falsifikojë historinë, gjë që provohet nga vetë deklarata e ministrit Buja. Ministri i Arsimit, duke dashur t’i demantojë të tjerët, e zbulon vetë të vërtetën”, thuhet në komunikatën e LDK-së.

Po ashtu, sipas LDK-së, dy ditë më parë, zëvendësi i tij, Nehat Mustafa, po për këtë çështje, ka deklaruar publikisht se “Kompromis do të ketë në disa pjesë ku autorët e historisë nuk kanë ditur të bëjnë dallime midis Turqisë dhe Perandorisë Turke, sepse edhe strategjia e BE-së kërkon që tekstet të lirohen nga gjuha e urrejtjes”.

Partia opozitare, LDK, thekson se kjo deklaratë totalisht konfuze e që bën bashkë gjërat që nuk rrinë bashkë në asnjë rast, vetëm një gjë e provon qartazi, tendencën politike, të përshkruar me termin e kompromisit dhe synimin e çuditshëm të një zyrtari politik që do t’ua mësojë të tjerëve dallimet që nuk i di vetë.

“LDK-ja edhe një herë kërkon nga Qeveria që të heqë dorë nga ndërhyrjet politike në fushat që nuk kanë të bëjnë më politikën dhe që Qeveria t’ua lërë punët e kësaj natyre njerëzve të dijes e të shkencës, ndërsa vetë të krijojë kushte për punë”, shprehet kjo parti.

Sipas LDK-së, një qeveri që porosit se si duhet të shkruhen tekstet, një qeveri që, nëpërmjet ministrave e zëvendësministrave, synon të korrigjojë tekstet shkollore, është e denjë vetëm për vendet me pushtet totalitar. /Telegrafi/