[Llapjani_HH]

Këngëtarët kosovarë në shënjestër të Administratës Tatimore

Këngëtarët të cilët këtë verë kanë koncerte duhet të mësohen me vizitat e inspektorëve të Administratës Tatimore të Kosovës në lokalet ku ata performojnë. “Vera 2010”, siç shkruan sot “Koha Ditore”, është plani i veprimit të cilin ATK-ja tashmë e ka hedhur në letër, sipas të cilit inspektorët e këtij institucioni e kanë vetëm një qëllim: të vizitojnë çdo lokal ku ata kanë informacione që një këngëtar mban koncert.

Por paralajmërimi i ATK-së duket që nuk e shqetëson edhe aq estradën kosovare, shumë prej të cilëve as nuk janë të regjistruar në Agjencinë Tatimore. Disa prej tyre thonë se nuk e kanë ndërmend të paguajnë. Para se shteti t’u krijojë kushte që ata të regjistrohen si këngëtarë.

Bashkim Shala, zëvendësdrejtor i ATK-së, ka thënë se me këtë plan synojnë eliminimin e çfarëdo shmangieje të obligimeve të tatimit në fitim nga këngëtarët të cilët veprojnë në Kosovë.

“Në sezonin kur këngëtarët i shtojnë aktivitetet e tyre, duke kënduar në shumë vende dhe normalisht duke fituar edhe më shumë, ne do të ndërmarrim një aksion më të intensifikuar ku do të inspektojmë lokalet në të cilat ata këndojnë dhe do të shohim çdo kontratë të lidhur ndërmjet pronarit të lokalit dhe këngëtarit”, ka thënë Shala, i cili shprehet i bindur që ky plan do të ketë sukses.

Mirëpo deri tek vizita e inspektorëve në lokalet ku mbahen koncertet e këngëtarëve është një procedurë të cilën inspektorët duhet ta kalojnë.

“Inspektorët marrin dhe ruajnë çdo publikim të aktiviteteve të këngëtarëve dhe i fusin në dosjet e tyre që ne më pas të kemi edhe fakte se ata kanë marrë pjesë në ato organizime.

Në ikje të obligimit tatimor është një rreth të cilin ATK-ja duhet ta thyejë, për të pasur sa më shumë vjelje të tatimit”, ka thënë Shala, duke shpjeguar se rrethin e përbëjnë organizatorët e ndejave, lokalet dhe këngëtarët.

Sipas tij, në bazë të analizave tatimore del se shumica e këngëtarëve në Kosovë nuk janë pagues të rregullt të tatimit.

“E para, shumica prej tyre nuk i deklarojnë të ardhurat për aq sa fitojnë, pra bëjnë zhvleftësim të të ardhurave. Më pas ata edhe atë shumë të të ardhurave që e paraqesin nuk e paguajnë tatimin për ato të ardhura.

Ka shumë prej tyre që edhe kanë borxhe në ATK”, ka thënë Shala, i cili nuk flet për emrat e borxhlinjve, pasi që këtë nuk ia lejon ligji. Mirëpo, sipas Shalës, jo të gjithë këngëtarët duhet të futen në një thes.

“Ka këngëtarë e produksione që paguajnë tatimin. Mirëpo ka prej tyre që as nuk e njohin ATK-në si institucion”, ka sqaruar Shala.

Aksioni i ATK-së nuk i brengos këngëtarët Blero dhe Dafina Zeqiri dhe Zanfina Ismajli.

Dy të parët pranojnë që nuk paguajnë tatim në Kosovë, me arsyetimin se ata janë shtetas të Suedisë, ani pse veprimtarinë e tyre fitimprurëse e zhvillojnë në Kosovë.

“Kam pasaportë suedeze dhe tatim paguaj vetëm në Suedi dhe atje jam tatimpagues i rregullt.

Mirëpo në Kosovë nuk paguaj, sepse nuk jam banor i këtij vendi”, ka shpjeguar Blero, i cili thotë se e mirëpret aksionin e inspektorëve të ATK-së dhe se shprehet i gatshëm të bashkëpunojë me ta.

Dafina Zeqiri thotë se nuk ka paguar tatim në ATK, dhe se për çdo koncert që e mban qoftë në Kosovë apo jashtë saj e paguan në Suedi.

“Nuk kam pse të paguaj tatim në Kosovë. Paguaj tatim në Suedi dhe nuk kam arsye që në dy vende të paguaj tatimin”, është shprehur Zeqiri, e cila thotë se nuk është e vetmja prej këngëtarëve që bën një gjë të tillë.

Një gjë e tillë për numrin dy të ATK-së është shkelje ligji.

“Çdo person që vepron dhe kryen veprimtari fitimprurëse në Kosovë është i detyruar të paguajë tatimin në fitim në ATK. Ne nuk i kërkojmë tatim nëse një këngëtar zhvillon aktivitet jashtë vendit”, ka thënë Shala, sipas të cilit nuk ka rëndësi se çfarë shtetësie ka një person, por ku kryhet aktiviteti ekonomik.

Në anën tjetër, këngëtarja Genta Ismaili nuk është fare e regjistruar në ATK si tatimpaguese.

“Genta nuk është e regjistruar këtu në Kosovë dhe nuk paguan tatim për fitime në koncerte që i mban në Kosovë.

Nuk ka ndonjë arsye të posaçme për këtë, por e kemi lënë në asgjë, por shumë shpejt do të regjistrohet dhe të fillojë të paguajë”, ka thënë Alie Sylejmani, menaxhere e Genta Ismailit. Ajo ka pranuar se në asnjë koncert që mban klientja e saj nuk lidh kontratë me pronarin e lokalit.

Tatimin në fitim nuk e paguan as këngëtarja Zanfina Ismaili. Ajo thotë se një gjë të tillë as që e ka ndërmend ta bëjë.

“Mua shteti nuk më garanton se albumin tim nuk do ta kopjojë çdo kujt që t’i teket, pastaj unë askund nuk jam e regjistruar si këngëtare dhe unë jam thjesht një person i thjeshtë.

E përderisa shteti nuk me jep asgjë mua, as unë nuk do ta paguaj tatimin”, është arsyetuar Ismaili, sipas së cilës i vetmi fitim që ajo ka si këngëtare janë koncertet.

Edhe Naim Abazi ankohet për qasjen që ka shteti ndaj estradës. Por për dallim nga Zanfina Ismajli, Abazi thotë se paguan tatim.

“Unë për vete nuk e di as çfarë statusi kam. Ajo çka ne bëjmë është e njëjtë me punëtorët e rrugës që presin kush po i thirr që të punojnë një ditë. Prandaj, para se të gjejmë fajtorët, institucionet e shtetit duhet të hartojnë ligjet që na mbrojnë ne si artistë”, është shprehur Abazi, duke thënë se ATK-ja i ka dërguar edhe atij edhe gruas së tij këngëtare tatim paushall.

Mirëpo, përpos kësaj Abazi ka një ide në bazë të së cilës mendon se do të zgjidhej tërë ky problem.

“Mendimi im është që duhet të formohet një institucion brenda shtetit ku të gjithë këngëtarët do të anëtarësoheshin si të tillë duke paguar për atë anëtarësim.

Pastaj ata të certifikohen si këngëtarë që mund të marrin para duke kënduar dhe do t’u ofronte atyre ndihmë. Dhe atëherë nëse një inspektor do të gjente dikë duke kënduar pa një certifikim të tillë, t’i dënojë ata”, ka propozuar Abazi.
Koha.net

Këngëtarët "patriota", mundohen me ja u marr publikut të gjitha paret pej gjepi e shtetit nuk i paguajn kurgja.
Edhe ankohen se shteti nuk po ban kurgja për ta.
Duhet me formue ni FOND PËR KËNGËTARËT sikur fondin e Fatmir Limës e me ju que ndihma se jan kah hjekin keq këta hajnat muzikant.