[krijuesiii]

Shaban Polluzha dekretohet me urdhrin Hero i Kosovës Lufta e Shaban Polluzhës bëri që shqiptarët brez pas brezi të vazhdojnë ideologjinë e tij për shtetin e Kosovës, u tha sot në akademinë përkujtimore me rastin e 64 vjetorit të rënies së heroit të Kosovës, Shaban Polluzha, i cili u vra në shkurt të vitit 1945, në luftën çlirimtare në Drenicë, e cila u mbajt nën kujdesin e Kryeministrit të Kosovës. Në akademi u lexua edhe dekreti përmes të cilit Presidenti i Kosovës, Fatmir Sejdiu, Shaban Polluzhës i jep urdhrin “Hero i Kosovës”.
Historia mund të jetë e padrejtë për një kohë ndaj individëve, ndaj gjeneratave, ndaj një populli të tërë, por e vërteta dhe përkushtimi për lirinë e atdheut nuk mund të mbyten nga asnjë diktaturë apo ideologji totalitare. Ne, sot, duke përkujtuar Shaban Polluzhën, kujtojmë gjithë brezin e bashkëluftëtarëve të tij anembanë Kosovës, kujtojmë dhe bëjmë homazh për gjithë ata njerëz që pësuan pa faj në një kohë të turbullt historike, tha mes tjerash kryeministri i Republikës së Kosovës, Hashim Thaçi, në fjalën e tij mbajtur në Akademinë Përkujtimore, me rastin e 64 – vjetorit të rënies së komandantit Shaban Polluzha dhe shpalljes së tij Hero i Kosovës.

“Në gjysmën e dhjetorit të viti 1944 një njëri autoritativ në popull, shumë vizionar dhe i sprovuar, trim dhe strateg njëkohësisht, Shaban Polluzha vendos që të del në mbrojtje të popullatës së Kosovës. Në Drenicë kundër të keqes serbo- komuniste luftoi e gjithë Kosova. Shaban Polluzha bashkoi Kosovën që atëherë kundër Serbisë, Jugosllavisë”, ka thënë kryeministri Thaçi.

Kryeministri Thaçi tha e se lufta që udhëhoqi Shaban Polluzha ishte luftë e përmasave historike, ndërkaq drejtësinë e veprimeve të tij e vërtetoi historia jonë.
“Shaban Polluzha nuk i besonte as fashizmit as komunizmit, partia dhe ideologjia e tij ishte Kosova dhe shteti që po gëzojmë ne”, ka theksuar Thaçi.

Ndërkaq zëvendëskryeministri i Kosovës, Ramë Manaj, ka lexuar Dekretin e Presidentit të Republikës së Kosovës, Fatmir Sejdiu, përmes të cilit Shaban Polluzhës i jepet urdhri “Hero i Kosovës”, për punën dhe kontributin e tij për lirinë dhe pavarësinë e Kosovës.

Ndërkaq, veprimtari i njohur Adem Demaçi, tha se gjithmonë gjatë historisë duhet ta edukojmë popullin dhe t’i tregojmë se nuk ishim vetëm ne që luftuam, por pati edhe tjerë para nesh, siç ishte Shaban Polluzha.

“Shteti që duam ne ta krijojmë, duam ta krijojmë në themele të forta, në themele të vërteta, jo të krijojmë heronj të rrejshëm, të krijojmë idhuj të rrejshëm, s’kemi nevojë për heronj të rrejshëm, ne kemi aq shumë heronj të vërtetë”, ka theksuar veprimtari Adem Demaçi.

Edhe Profesor Agim Zogaj, tha se themelet e shtetit të Kosovës i gjejmë në rezistencën e komandant Shaban Polluzhës dhe bashkëluftëtarëve të tij, të cilët u bënë frymëzim për brezat që e vazhduan luftën për lirinë e Kosovës.
Kryeministri Hashim Thaçi me bashkëpunëtor sot bëri homazhe te varri i heroit të kombit, Shaban Polluzha, në fshatin Polluzhë të Drenasit.



rtk


19 shkurt 2009 - 13:54:30