[munti]

DEKLARATË E MYFTINISË SHKODËR

NË LIDHJE ME VENDOSJEN E BUSTIT TË SHENJTORES KATOLIKE
NËNË TEREZA NË AMBIENTET PUBLIKE NË SHKODËR

Myftinia Shkodër del sot me këtë deklaratë për median pas
kërkesave dhe peticioneve që i janë drejtuar asaj nga
besimtarët myslimanë dhe në veçanti nga një bashkësi
qytetare të lagjes Xhabije për mos vendosjen e bustit të
Shenjtores Nënë Tereza në pronat publike apo në Xhabije, si
dhe për të dhënë qëndrimin zyrtar të Institucionit tonë.

Nga ana tjetër habitemi nga disa komente dhe interpretime
tendencioze të disa mediave ndaj deklaratës të dalur para
disa ditëve nga shoqatat Islame.

Ne pa mëdyshje nderojmë dhe respektojmë figurat kombëtare
dhe humane. Gjithashtu vlerësojmë çmimet, shërbimet dhe
kontributin e Nënë Terezës për të varfërit, jetimët dhe të
sëmurët. Në thelb figura e saj është fetare dhe si e tillë
thelbi i misionit që ajo ka luajtur ka qenë propogandimi i
katolicizmit.

Ndërkaq, informojmë ata që nuk e dinë se Nënë Tereza është
shenjtëruar nga Papa Gjon Pali i II për kontributin e saj
si misionare katolike për propogandimin e misionit fetar.
Po ashtu ai që lexon literaturën mbi jetën, veprimtarinë
dhe biografinë e Nënë Terezës vëren në thelb misionin e saj
fetar.

Nënë Tereza duke sqaruar përkatësinë e saj thotë: “Përsa i
përket fesë jam murgeshë katolike, sipas thirrjes i përkas
botës, por zemra ime i përket plotësisht Jezu Krishtit”.
Ndërsa Dom Ndoc Nogaj në kryeshkrimin e botuar në revistën
“Mbas Teje” të muajit tetor 2003, duke vlerësuar figurën e
saj ndër të tjera thotë se: ajo është Lavdi e kishës
katolike botërore, krenari e kombit shqiptar.

Është e padrejtë që figura e saj të vlerësohet në mënyrë të
njëanshme dhe të harrohet me qëllim apo paqëllim misioni i
saj fetar për të cilin ajo shkriu jetën.

Prandaj mendojmë se cënohet tolerance fetare në Shkodër në
rast të vendosjes së bustit të saj në pronat publike apo në
lagjen Xhabije.

Emërimeve masive të padrejta të pjesës katolike në postet
kyçe në pushtetin lokal apo kryqeve të paligjshme të
vendosura ne vende publike i bëjmë thirrje anëtarëve të
Këshillit Bashkiak të mos i shtojnë një provokim tjetër
i cili cënon tolerancën ndërfetare në Shkodër.

Për këto arsye kërkojmë nga anëtarët e organit vendimarrës
të këtij Këshilli të mos miratojë vendosjen e këtij busti
në pronat publike apo në lagjen Xhabije, por po qe se
vendoset, të vendoset në ambientet fetare katolike.



Shkodër më, 25.03.2006
MYFTINIA SHKODËR