[Shpat]

Urimi i Imzot Dodë Gjergjit për Pashkët

Ipeshkvi i Kosovës, Imzot Dodë Gjergji, iu është drejtuar besimtarëve dhe vullnetmirëve të vendit me një urim me rastin e Pashkëve.

Ipeshkvi i Kosovës në urimin me rastin e Pashkëve ndër të tjera shkruan “Ne, të cilët besojmë, me zemër plot gëzim, falënderojmë Zotin e Ringjallur, i cili, na bashkon në dashurinë e Tij të përkryer dhe jetëdhënëse. Dashuri kjo, të cilën, Zoti e ka manifestuar në forma të ndryshme dhe e ka vulosur me gjakun e Qengjit të pafajshëm, në flijimin e Kalvarit”.

“Sot, ditën e Pashkëve, me gëzim-plotë dhe me shpresë dëshmojmë se: Zoti ynë Jezu Krishti, e ka mundur vdekjen dhe me ngjalljen e Tij, të gjithë ne jemi ftuar, të jemi të bijtë e Atit tonë në Qiell”, thuhet në urim.


Myftiu Tërnava përgëzon Ipeshkvin Dodë Gjergji

Me rastin e Festës së Pashkëve, kryetari i Bashkësisë së Fesë Islame të Kosovës, Naim Tërnava i ka dërguar një telegram urimi Ipeshkvit Dodë Gjergj.

“I nderuari Ipeshkëv, zotëri Dodë Gjergji, me rastin e festës së Pashkëve kam nderin dhe kënaqësinë që në emrin tim personal dhe në emër të bashkëpunëtorëve të mi, si dhe në emër të besimtarëve të besimit Islam t’u përcjell Juve personalisht, bashkëpunëtorëve tuaj, si dhe të gjithë besimtarëve të besimit katolik urimet e mia më të sinqerta, duke u dëshiruar gjithë të mirat e begatitë e Zotit.

Uroj që mesazhet dhe porositë që dalin nga festa e Pashkëve të jenë në funksion të fisnikërimit të popullit tonë dhe gjithë popujve anembanë globit.Festat tona janë rast i mirë për të përkujtuar dhe shprehur respektin ndaj Krijuesit të përbashkët. Shfrytëzoj rastin që për këtë festë të përgëzojë edhe të gjithë përfaqësuesit ndërkombëtarë, që veprojnë në Kosovë”, thuhet pos tjerash në urimin e myftiut Tërnava.