[Zero Cool]

Borg Olivier: Qeverinë e formon ai që i ka numrat



Edhe eksperti i çështjeve ligjore, ish-shef i Zyrës Ligjore të UNMIK-ut, tani avokat ndërkombëtar në Kosovë, Alexander Borg Olivier, thotë se Kushtetuta e Kosovës e thotë qartë se Qeverinë e themelon ai që e ka shumicën e që në këtë rast Hashim Thaçi edhe pse ka dalë i pari në zgjedhje, nuk mundet ta themelojë me numrat që i ka.

Përndryshe, ajo që tani duhet të pritet dhe do të pritet është certifikimi i zgjedhjeve të 8 qershorit,
certifikimi i të gjithë deputetëve të Kuvendit të Kosovës dhe të bëhen llogaritjet se cila parti sa numra i ka.

”Në rastin që kemi sot, nëse opozita vazhdon të jetë e bashkuar me një koalicion Nisma, LDK dhe AAK, por edhe me përkrahjen e “Vetëvendosjes”, atëherë asaj i bëhen numrat për qeverisje.

Me ç’rast presidentja më pas propozon kandidatin për kryeministër të dalë nga ai koalicion”, tha Olivier. Kjo është ajo që do të ndodhë, në të kundërtën nëse edhe ky version dështon në mungesë të numrave, nëse eventualisht “Vetëvendosje” nuk përkrah opozitën, atëherë presidentja i jep edhe një mundësi Thaçit.

“Nëse edhe me rastin e dytë Thaçi nuk mund t’i bëjë numrat, tek pas dy dështimeve presidentja detyrohet të shpallë zgjedhjet e tjera”, tha më tej Olivier. Sa i përket LVV-së, Olivier tha se është e mundshme dhe ligjore që ajo të ofrojë përkrahje tri partive opozitare, por vetë të mos hyjë në Qeveri.