[Dilaver]

Milot-Rrëshen, BB jep “ok” për 59 mln dollarë


Julian Llupo
05-12-2006
TIRANË-Banka Botërore ka miratuar projektin e parë, për një segment të rrugës Durrës-Kukës-Morinë. Projekti i përket segmentit Milot-Rrëshen, me një gjatësi prej 26-kilometrash dhe financimi shkon në 59 milionë dollarë. Marrja në shqyrtim për financimin e segmentit Milot-Rrëshen, është bërë i ditur rreth 2 muaj më parë nga përfaqësuesi i Bankës Botërore në Shqipëri, Nadir Mohamed. Banka Botërore ka bërë të ditur gjithashtu, se qeveria shqiptare ka kërkuar mbështetje financiare për këtë projekt. Ndërkohë që kanë filluar punimet në 7 lotet e aksit Kalimash-Morinë, kanë filluar dhe financimet që shkojnë në rreth 60 milionë euro, që janë dhënë nga buxheti shtesë i këtij viti. Ndërsa qeveria ka lidhur kontratën edhe me konsorciumin amerikano-turk “Betchel-Enka”, për ndërtimin e mbi 57 kilometrave të tjera Rrëshen-Kalimash, ku përfshihet edhe tuneli, me një vlerë prej 418 milionë eurosh. Autoritetet shqiptare, kanë pohuar se rruga e re që do të lidhë Tiranën me Prishtinën, do të nisë nga funksionimi në qershor të 2009, por nga ana tjetër, nuk është zbardhur ende skema e financimit prej 418 milionë eurosh, për ndërtimin e aksit te ri.

Milot-Rrëshen
Projekti për ndërtimin e këtij segmenti, ka si objektiv që të ulë kostot në operimin e rrugës Milot-Rrëshen, pjesë e korridorit Durrës-Milot-Morinë. Projekti përfshin ndërtimin e rrugës Milot-Rrëshen, 26 kilometër, duke i ardhur në ndihmë edhe popullsisë që jeton në këtë zonë dhe që është edhe nga më të varfrat në vend. Njëkohësisht, ky projekt do të jetë edhe në funksion të sigurisë rrugore.

Projektit
Ndërtimi i rrugës Milot-Rrëshen, sipas vlerësimeve, shkon në rreth 59 milionë dollarë. Financimi i kësaj pjese të rrugës Milot-Rrëshen, do të realizohet nga disa institucione financiare. Banka për Ndërtim dhe Zhvillim, do të financojë 20 milionë dollarë për këtë segment, Shoqata Ndërkombëtare për Zhvillim, 5 milionë dollarë dhe Fondi OPEC, do të financojë 15 milionë dollarë. Huamarrësi, që në këtë rast është qeveria shqiptare, do të financojë këtë projekt me 19 milionë dollarë.


Financimi
Qeveria Shqiptare 19 milionë USD
BERZH 20 milionë USD
IDA 5 milionë USD
Fondi OPEC 15 milionë USD
Totali59 milionë USD



Projekti do të konsistojë në katër komponentë Ndërtimi
Për ndërtimin e rrugës Milot-Rrëshen, me një vlerë prej 44.4 milionë dollarësh, banka financoi 15.8 milionë dollarë. Ky përbërës përfshin punën civile, konsulencën supervizore dhe ndërtimin e tri loteve të seksionit prej 26 kilometrash, Milot-Rrëshen, si pjesë e korridorit Milot-Morinë. Rruga e propozuar, gjendet kryesisht në zonën e Mirditës, zonë ku niveli i varfërisë ekstreme ka sunduar pothuaj 40 për qind të popullsisë, dhe përmirësimi i infrastrukturës në këtë zonë, është prioritet i qeverisë. Rruga e re e propozuar, është e dizenjuar si një superstradë me dy korsi 7.5 metra e gjerë, me një gjerësi prej 11.1 metrash, 9.3 metra trotuar anësor, ku makinat do të lëvizim me shpejtësi 80 km në orë. Banka Botërore do të bashkëfinancojë Lotin e I-rë dhe të II-të, së bashku me GoA, ndërkohë që Loti i III-të, pritet që të financohet nga fondet e OPEC.

Prezantimi i kontratës së prodhimit dhe mirëmbajtjes
Me një vlerë prej 11.5 milionë dollarësh, banka ka financuar 5.87 milionë dollarë. Përbërësi i dytë përfshin prezantimin në rang pilot të performancës, bazuar në kontratën e mirëmbajtjes së rrugës në dy rajonet pilot dhe konsulencën ligjore.

Investimi për sigurinë
Siguria në rrugë, ka kapur një vlerë prej 1.2 milionë dollarësh, ku banka ka financuar 1.2 milionë dollarë. Kjo do të përfshijë pajisjen me ndihmën teknike të nevojshme, për të ndihmuar në zbatimin e Planit Kombëtar Aksion, ku bën pjesë edhe një kontroll për sigurinë në rrugë, të autostradës Tiranë-Durrës.

Asistenca teknike
Për asistencën teknike të nevojshme dhe materialet, me një vlerë prej 2.08 milionë dollarësh, Banka ka financuar 2.08 milionë dollarë. Përbërësi i fundit do të përfshijë pajisjen me asistencën e nevojshme teknike, për Ministrinë e Punëve Publike.

Shekulli