[Bajlozi i Zi]

Donika Gërvalla: Demaçi, një figurë tragjike

Unë nuk kam qenë në Berlin në vitin 1992, në takimin mes Tahir Zemajt dhe Adem Demaçit. As atëherë nuk i kam përkrahur qëndrimet e Demaçit.

Kam qenë përkrahëse e vijës së presidentit Rugova. Gani Dobrunaj në deklaratën e tij ka folur për praninë e një Donike në këtë takim, por jo të Donika Gërvallës, shkroi në një sqarim për portalin Koha.net, Donika Gërvalla.

“Harresa në pleqëri i falet gjithkujt, gënjeshtra e qëllimshme jo. Manipulimet e vazhdueshme nuk duhet t'ia lejojnë vetes as ata që kanë paguar një çmim të lartë për lirinë e Kosovës. Adem Demaçi, nga simbol i rezistencës, çdo ditë e më tepër po kthehet në një figurë tragjike. Do të duhej t'i tregojë dikush se nuk i bën nder as vetes dhe as Kosovës duke vazhduar strategjinë e akuzave të pavërteta”, përfundon sqarimi dhe reagimi i Donika Gërvallës.

Dobrunaj: Fotografitë e Demaçit me Zemajn janë origjinale

Gazeta “Bota Sot” e ka demantuar Demaçin i cili në një prononcim për një media online tha se ai asnjëherë nuk është takuar me Tahir Zemaj dhe se fotografitë janë të falsifikuara.

Reagimi i Demaçit kishte ardhur pas një deklarate të LDK-së në lidhje me një deklaratë të Adem Demaçit ku ai e kishte cilësuar Zemajn si kontrabandistë droge.

“Lidhja Demokratike e Kosovës shpreh indinjatën e thellë ndaj deklaratave të z. Adem Demaçi lidhur me kolonel Tahir Zemajn, ish-komandant i UÇK-së në Zonën Operative të Dukagjinit dhe drejtues e fitues i betejave të Loxhës, i vrarë pas luftës, së bashku me djalin Enisin dhe kushëririn Hasanin, nga autorë të panjohur edhe sot. Deklaratat e tilla fyejnë rëndë familjen Zemaj, bashkëluftëtarët e Tahir Zemajt dhe qytetarët e Kosovës”, ishte thënë në reagim e LDK - së.

Adem Demaçi i është përgjigjur reagimit t lidhur me deklaratat për Tahir Zemajn.

Në një prononcim për ORAinfo, Demaçi ka thënë momentalisht nuk e ka ndërmend të kërkoj falje për ato që i ka thënë për Zemaj.

“Kërkoj falje vetëm nëse ndryshojnë rrethanat. Nëse ata japin dokumente që ai nuk ka qenë i dënuar asnjëherë si trafikant droge në gjyqin e Prishtinës, nëse ai nuk e ka lëshuar frontin për me ik në Shqipëri, atëherë unë kërkojë falje, por përderisa këto nuk ndryshojnë unë nuk kërkoj falje”, ka thënë Demaçi.

Adem Demaçi, për fotografit ka thënë se “Ato janë fotografi të falsifikuara nga gazeta “Bota sot”.

“Unë kurrë në jetë nuk e kam takuar atë (Zemajn). Fotografinë e kanë falsifikuar, unë kurrë s’kam pasur rast të takohem me të dhe s’kam pasur mundësi të takohem. Ata Zoti i shpërbleftë dhe i pagoftë për ato falsifikime. Me pas shtet, unë i kisha paditur për këtë falsifikim, mirëpo nuk kemi shtet që merret me këto punë, kështu që vetëm po i shikoj për karshi”.

Por, fotografi i kësaj fotografie Gani Dobrunaj ka thënë se është i gatshëm të jap përgjegjësi të plotë, qoftë edhe juridike.

“Me përgjegjësi të plotë personale, morale e juridike deklaroj se fotografitë e botuara në gazetën “Bota sot” janë origjinale dhe të vërteta. Këto fotografi janë bërë në vitin 1992, në Berlin. Adem Demaçi, Tahir Zemaj, Donika Gërvalla e të tjerë kanë qenë mysafirë për tri ditë dhe janë takuar në restorantin Sani Pietro në Berlin me pronar Rexhep Dobrunajn, vëllanë tim të madh”, ka thënë “Botën sot” Gani Dobrunaj i cili po ashtu duket në fotografi.

Sipas Gani Dobrunajt, në fotografinë përbashkët janë këta persona: lart është Tahir Zemaj, Xhavit Haliti, një femër gjermane që angazhohej për të drejtat e njeriut, Gani Dautaj (me mustaqe) Rexhep Dobrunaj, pronar i restorantit “San Pietro” ku kanë qëndruar për tri ditë në Berlin dhe ku janë bërë këto fotografi dhe personi me emrin Ethem nga Mitrovica (me mustaqe). Ndërkaq në rendin poshtë, ulur, janë: Haki Kuçi (me 2 gishta të ngritur lart – simbol i rezistencës paqësore të presidentit historik Ibrahim Rugova), Gani Dobrunaj, Burim Dobrunaj e të tjerë.