[LaDy_Diaspora]

Harrestar? Një sqarim ndihmon më tej!

Sa më të moçëm në moshë, aq më shumë njerëz sëmuren nga alchajmeri ose sëmundje të tjera dementive. Në rastin e demencës përshkallëzohet dëmtimi i indit trunor, duke përkeqësuar kështu kapacitetin e trurit. Sot demenca mund të zbulohet që në fazën e hershme. Një sqarim tek mjeku ose specialisti ndihmon për të kuptuar se si t’i qasemi asaj dhe se si ta trajtojmë drejt atë.

Demenca - Një çrregullim i trurit:
Një person vuan nga një demencë, po qe se kapacitetet e trurit të tij zvogëlohen shumë në raport me gjendjen e mëhershme. Sipas rregullit, cenohet memorja ( kujtesa ). Kësisoj, një person i sëmurë nga demenca e ka të vështirë për t’i vënë re gjërat e reja ose për të kujtuar gjërat e njohura. Mirëpo janë të cenuara edhe fusha të tjera, si p.sh. gjuha, veprimi, njohja e njerëzve dhe e gjësendeve si dhe planifikimi dhe organizimi i gjërave të përditshme. Për një demencë mund të flitet në rast se personi i prekur nuk ia del të gjendet dot i pavarur në jetën e përditshme.


Shkaqet e ndryshme:
Për një demencë mund të jenë përgjegjëse shumë shkaqe. Në disa raste truri nuk është i dëmtuar definitivisht, dhe një trajtim mjekësor mund ta rikuperojë tërësisht ose pjesërisht demencën. Mirëpo të shumtën e rasteve bëhet fjalë për sëmurjen direkte të trurit dhe për shkatërrimin progresiv të indeve trunore. Ndër sëmundjet më të shpeshta dementive llogariten sëmundja e alchajmerit dhe demenca e kushtëzuar nga enët e gjakut. Të dyja sëmundjet përbëjnë së bashku rreth 70% të të gjithë shkaktarëve të demencës. Në anën tjetër, ekzistojnë edhe rreth 150 shkaqe të tjera, kryesisht më të rralla.

Demenca mund të prekë çdokënd:
Sot akoma nuk dihet se cila është arsyeja e saktë që dikush të sëmuret nga demenca. Duke qenë se sëmundja dementive është komplekse, shkenca merr në konsideratë shumë faktorë. Një faktor me rëndësi është mosha: para moshës 60-vjeçare sëmundjet e demencës janë të rralla. Më vonë incidenca dyfishohet për çdo 5 vjet. Midis moshave 85 dhe 90 vjeç çdo i katërti person vuan nga demenca. Kështu që demenca mund të prekë këdo, sidomos në moshën e shtyrë. Në Zvicër aktualisht jetojnë rreth 100.000 të sëmurë nga demenca. Kësaj shifre për çdo vjet i shtohen dhe 25.000 raste të reja të sëmundjes.

S'ka shërim por terapi efektive:
Sëmundjet e demencës zgjasin mesatarisht 10 vjet. Në organizimin e jetës së tyre të sëmurëve nga demenca u shkaktojnë telashe të përshkallëzuara çrregullimet e mëdha në kujtesë dhe një sjellje e transformuar. Në një stad të përparuar të sëmurët nga demenca duhen trajtuar natë e ditë. Një demencë as mund të ndërpritet dhe as të shërohet, mirëpo terapitë efektive përmirësojnë cilësinë e jetës së të sëmurit dhe të familjarëve kujdestarë.