[niemand]

Prishtinë, 18 mars - Kompania ajrore EasyJet ka vendosur të ketë vetëm 4 udhëtime në javë nga Zvicra. Saktësisht 2 nga Gjeneva dhe 2 nga Bazeli. Çmimi i biletave do të startojë me 31.99 euro për një udhëtim me gjithë taksa. Aktualisht s`ka plane të zgjerohet me relacione prej shteteve të tjera për në Kosovë. Deri tash kanë shitur rreth 15 për qind të biletave.

"Ne do të operojmë në fillim me katër fluturime në javë, dy nga Gjeneva dhe dy nga Bazeli…" Pa filluar ende zyrtarisht operimet, kanë shitur rreth 15 për qind të biletave për sezonin veror. Fluksi i rezervimit të biletave edhe tash vazhdon të jetë shumë i madh. Këtë tollovi nuk po e realizon ndonjë agjenci ajrore e Kosovës, por kompania ajrore angleze, EasyJet, e cila më në fund plotësoi dëshirën e kosovarëve dhe mërgimtarëve për të udhëtuar shpesh dhe lirë.

EasyJet u licencua me zor para disa ditësh nga autoritetet kosovare. Avioni i parë me udhëtarë do të aterrojë më 16 qershor në Aeroportin e Prishtinës. Kosovarët këtu, e edhe në Zvicër, po nguten me rezervime vetëm që të mos u bien në dorë agjencive ajrore në Kosovë, të cilët tash sa vjet i kanë vjelë me çmimet e tyre astronomike.

Në një intervistë për gazetën Express, Peter Voets, menaxher i marketingut në EasyJet për Zvicër, Austri dhe Evropë Lindore, shprehet i befasuar me këtë masë të madhe të kërkesës për rezervime. Kjo, si duket, do t`i shtyjë ata që të rrisin numrin e udhëtimeve nga katër në më shumë brenda jave.

“Ne do të operojmë në fillim me katër fluturime në javë, dy nga Gjeneva dhe dy nga Bazeli”, tha Voets. Ai tregoi se edhe biletat janë mjaft të lira.

Oferta e tyre primare është me rreth 31.99 euro. Ky çmim, sipas tij, përfshin edhe të gjitha taksat. Çmimet do të lëvizin në nuanca të vogla në saje të kërkesave për bileta. Sipas tij, ndryshimet në çmime, nuk nënkuptojnë vetëm ngritje, por edhe ulje.