[Neferta]

Në tender me zyrtarët institucionalë
Pas njoftimit për dhënie të kontratës kompanisë “Intershped”, “Geo Info”, e cila fillimisht ishte shpallur fituese, depoziton ankesën në OSHP, ku zbulon një mal shkeljesh të kompanisë “Intershped”.
“Geo Info”, e cila është e specializuar në fushën e gjeodezisë, pasi që kishte fituar tenderin e komasacionit të tokave bujqësore në komunën e Vushtrrisë në vitin 2009 dhe në komunën e Gjakovës në vitin 2008, ankohet se “Intershped-it” i ka skaduar kontrata më 31 dhjetor 2010 dhe ka vërtetim vazhdimi deri më 30 qershor 2011, ndonëse bartësi i licencës së kompanisë Ruzhdi Aliu deklaron se nuk është punëtor i kompanisë “Intershped”.
“Intershped” po ashtu ka prezantuar një kontratë me Ministrinë e Financave për “rianketim të pronave” më 28 maj 2010, e cila, sipas kompanisë “Geo Info” është e pavlerë, pasi që nuk ka të bëjë me punë kadastrale.
Edhe kontrata tjetër për hartimin e planeve menaxhuese të pyjeve nuk ka të bëjë me punë kadastrale dhe si dëshmi është e pavlerë.
Në ankesën dërguar në OSHP, kompania “Geo Info”, të cilën ankesë e posedon edhe “Zëri, potencon se “Intershped” ka kontratë mbi vepër me z. Tomor Çela në projektin “Komasacioni i Gjakovës”, ku data e fillimit dhe e përfundimit të kontratës është 10.10.2010, përkatësisht në të njëjtën datë fillon dhe përfundon kontrata.
Çela, sipas kompanisë që ka bërë ankesë, njëkohësisht është i punësuar si drejtor i Drejtorisë së Sistemit Informativ Mjedisor në Agjencinë për Mbrojtjen e Mjedisit të Kosovës. Për të njëjtin projekt kompania “Intershped” ka angazhuar edhe një zyrtar tjetër të institucioneve, përkatësisht Bajram Kafexhollin, i cili është udhëheqës i sektorit të GIS-it në Agjencinë për Mbrojtjen e Mjedisit të Kosovës.
Kompania “Intershped” madje ka prezantuar disa persona se mbështesin me pajisje gjeodezike këtë kompani, apo janë pjesë e stafit, të cilët më pas kanë depozituar deklaratë me shkrim në Ministrinë e Bujqësisë, ku i mohojnë deklarimet e fituesit.

Izjah Zariqi nga Ferizaj ka depozituar një deklaratë më 17 tetor 2011 në Ministri, të cilën deklaratë e posedon gazeta, ku bën të ditur se është pronar i kompanisë “Geo-Office” dhe me përgjegjësi materiale dhe penale deklaron se nuk e mbështet me pajisje gjeodezike dhe staf profesional kompaninë “Intershped” nga Ferizaj në projektin komasacioni në komunën e Gjakovës.
Një deklaratë të tillë në Ministri e ka depozituar edhe Ruzhdi Aliu nga fshati Greme, ku bën të ditur se nuk është pjesë e stafit të kompanisë fituese, etj.

Zogiani: OSHP favorizon kompanitë e caktuara
Pavarësisht këtyre fakteve me parregullsi të mëdha në tenderin e fituesit, në vendimin e OSHP-së të datës 18 nëntor 2011 refuzohet si e pabazuar ankesa e kompanisë “Geo Info” dhe autorizohet Ministria e Bujqësisë që të vazhdojë procedurën e mëtutjeshme të prokurimit me këtë tender.
Eksperti shqyrtues madje kishte deklaruar se operatori “Inteshped” ka pasur çmim prej 105 mijë euro më të lirë se “Geo Info”. Dhe çmimi më i lirë, sipas ekspertit shqyrtues, kishte bërë që “Intershped” të fitojë më shumë pikë në tender, ndonëse në këtë tender kishte edhe oferta për 100 mijë euro më e lirë se fituesi.
Në anën tjetër, Avni Zogiani nga organizata për dinjitet dhe antikorrupsion “Qohu” thotë se Organi Shqyrtues i Prokurimit (OSHP) me vendimet që ka marrë shpeshherë ka qenë i njëanshëm.
Zogiani thotë se në shumë raste kur është dashur të reagohet OSHP-ja i ka mbyllur sytë, ndërkaq në raste kur thuajse gjithçka ka qenë në rregull OSHP-ja ka ndërhyrë dhe ka ndarë drejtësi në favor të kompanive të caktuara.
“Korporata Energjetike e Kosovës një pjesë të madhe të tenderëve i ka pasur njëburimor dhe OSHP-ja asnjëherë nuk ka ndërhyre për të anuluar, apo kthyer në rivlerësim ndonjë tender të këtij lloji”, tha ai.
Zogiani nga organizata “Çohu” thotë se Organi Shqyrtues i Prokurimit thuajse nuk ka anuluar asnjë tender, ku pronar të atyre kompanive kanë qenë anëtarë të Partisë Demokratike të Kosovës(PDK), e të cilat kanë financuar partinë në fushatë parazgjedhore.
Sipas tij, vetë përbërja e OSHP-së është politike, kështu që edhe vendimet që i merr kjo janë politike, pasi që janë në favor të kompanive të caktuara.
“OSHP-ja nuk ndan drejtësi, por në disa raste i konfirmon padrejtësitë e zyrave të prokurimit të institucioneve të ndryshme që shpenzojnë para nga arka e shtetit”,tha ai.
Veprimtaria e fituesit: Zoologjia dhe botanika
Në Agjencinë Kosovare për Regjistrim të Bizneseve(AKRB), “Intershped AK”- Ferizaj figuron se ka aktivitet kryesor tregtinë me pakicë në shitoret jo të specializuara, veprimtaritë e agjencive të transportit, prodhimi i ujit mineral dhe pijeve freskuese, shërbimet plotësuese në pylltari (prerjen e drunjve), veprimtaritë e kopshteve zoologjike dhe botanike e të rezervateve natyrore, tregtia me shumicë e artikujve shtëpiakë, etj.