[Urata]

Shqiptarë katolikë e muslimanë u lutën në Grac të Austrisë për Presidentin Rugova
Grac, 2 shkurt - Të dielën e kaluar në kishën St. Leonhard në Grac të Austrisë, u mbajt një meshë e përshpirtshme e quajtur "Mesha e dritës" në gjuhën shqipe për Presidentin e Kosovës Dr. Ibrahim Rugova. Në kishën e përmbushur me besimtarë katolikë e muslimanë, të gjithë i kishin të drejtuar sytë ka qielli duke e lutur Zotin për shpirtin e Presidentit dhe duke e lutur Zotin për të ardhmen e Kosovës me qytetarët e saj.
Meshën e celebroi Don Kolë Gjergji, prift në famullinë Bruck an der Mur dhe njëkohësisht përgjegjës për shqiptarët që jetojnë në Steirmark me seli në Graz.
Në aspektin muzikor të kësaj meshe u përkujdesën motrat e nderit, shqiptare që jetojnë në Grac: Rita Marjakaj me kitare, Lumnie Frrokaj, Angjelina, si edhe Agneza Marjakaj dhe shumë besimtarë që iu bashkangjitën këngëve kishtare.
Besimtarët katolikë dhe qytetarët e pranishëm ishin nga gjithë Kosova, Shqipëria dhe nga Maqedonia. Fotografia e të ndjerit President ishte vënë para altarit në kishë me plot lule e stolisur dhe më një qiri të ndezur duke u shkrirë sikur që e shkriu jetën e me punë vetë Presidenti.
Meshtari Don Kolë Gjergji ndër të tjera theksoi Presidenti Rugova ishte njeri i durimit, njeri i paqes, që i tregoi botës përkufizimin se ç'është paqja dhe si ajo duhet të jetohet; njeri i qëndresës, i trimërisë, i tolerancës, i guximit, i urtisë, i butësisë, i mençurisë, i maturisë dhe i konstruktivitetit njerëzor, kulturor, letrar e politik. Pra ishte një Njeri universal për të gjithë, me të gjithë dhe i të gjithëve. Miku më i madh i miqësisë dhe dashurisë gjithënjerëzore.
Njeriu që me kohë e mësoi mirë atë fjalën e urtë popullore se "miqtë janë krahët e njeriut!" dhe të cilën e bëri bazament dhe filozofi të jetës dhe të veprimtarisë së tij. Njeriu që fliste pak, por jehona e tij njerëzore e kulturore për paqe, shpresë e dashuri arriti te të gjithë njerëzit e rruzullit tokësor, tha ai. Kosova e humbi Rugoven, por fitoi miq, tash e pamë se kush ishte Ai, sepse e gjithë bota ishte me ne për të.
Kur vdiq Nënë Tereze, një kardinal hungarez thoshte për të: "Populli shqiptar nuk mund të jetë një popull i vogël që i dha botës një nënë kaq të madhe"! Dhe sot: "Populli shqiptar nuk mund të jetë një popull i vogël që i dha botës një njëri, një babë kaq të madh të ditëve tona"!, tha meshtari Don Kolë Gjergji.