[Albanian eX|PerT]

FJALA E AUTORIT

Falënderimi i qoftë All-llahut që e ka dërguar Pejgamberin e vet me Shpalljen e fesë së vërtetë, e cila do të ngritet mbi të gjitha fetë tjera. Falënderimi i qoftë All-llahut që e ka dërguar atë të dëshmojë, të përgëzojë, të porositë dhe të ftojë te Sunduesi i vet, duke bartë fenerin ndriçues. Falënderimi i qoftë All-llahut që na dhuroi Pejgamberin tonë e ta kemi si shembull të bukur për të gjithë ata, të cilët e duan shumë dhe e lavdërojnë shumë All-llahun dhe i shpresojnë Ditës së gjykimit.
All-llahu im i dashur, bekoje dhe sjelli salavat dhe selam atij, familjes së tij, farefisit dhe shokëve të tij dhe atyre, të cilët e pasojnë atë në veprat e mira gjer në Ditën e Gjykimit. Dhuroju atyre nga buri­met e mëshirës Tënde, nga burimet e kënaqësive Tua dhe nga burimet e furni­zimit Tënd.
E, pastaj: Jam i lumtur që liga botërore islame - Rabita shpalli konkursin për "Es-Siren" më të mirë, në Kongresin Es-sire, të mbajtur në Pakistan, në muajin rebiul-evvel të vitit 1396 h.
Konkursi ka qenë i tipit publik për të gjithë myslimanët e botës, ndërsa tema ka qenë "Es-Siretun-Nebevijjetu", e mbi ata që e kanë dhënë idenë për këtë studim shkencor, një mijë mijëra herë le të jetë salavati dhe shpëtimi.
Ka qenë kjo nxitje e madhe për të gjithë shkrimtarët dhe shken­cëtarët e kësaj fushe për të bërë përpjekje maksimale për t'u paraqitur në konkurs. Besoj se kjo përpjekje do të jetë e frytshme dhe me vlerë të madhe për gjeneratat e ardhme. Me të vërtetë, jetëshkrimi i Resu­lull-llahut a.s. është i jashtëzakonshëm. Sepse është jetëshkrim pej­gamberik ku paraqitet shëmbëlltyra Muhammedane që ndryshon nga të gjitha jetëshkrimet tjera. Salavati dhe selami qoftë mbi ty, o Pej­gamber i All-llahut!
Kur të vështrojmë më me përpikëri, vërejmë se Sira është burim i vetëm nga i cili rrjedhin çështjet praktike të jetës sipas Islamit, me vlera të jashtëzakonshme për lumturinë e tërë gjinisë njerëzore.
Jam i lumtur për miratimin e vendimit që të marr pjesë në këtë konkurs fatlum, por i bëj vetes pyetje: ku gjendem unë këtu, dhe kush jam unë këtu, që do të mund të hedhë një rreze drite në jetën e më të zgjedhurit dhe për All-llahun më të dashurin nga të gjithë Pejgamberët, Resulull-llahut a.s. Unë jam njeriu i cili kam fat të madh dhe përjetojë kënaqësi të madhe kur gjendem në "shoqëri" me Resu­lull-llahun a.s.
Dashuria ndaj tij ngroh zemrën time dhe më jep shtytje, vullnet për të jetuar, më jep kurajo që të mos humbë guximin e të mos ligë­shtohem dhe të mos rrëshqas në ambiset e errësirës. Më mëson të jetojë në mënyrë të denjë dhe të vdes në mënyrë të denjë si anëtar i popullit më të zgjedhur, ummetit të Resulull-llahut a.s.
Lus All-llahun xh.sh. që me shef'atin e tij, të mi falë mëkatet.
Në fund do të them diç shkurtimisht për mënyrën e punës time në këtë libër:
Para se të filloja ta shkruaj këtë punim, kam pasur në konsideratë se kjo duhet të jetë e një volumi të mesëm. I kam ikur detajizimeve të gjerësishme sikurse edhe shkurtimeve të pavlefshme. Në shumë vepra burimore të "Sires" kam lexuar gjerësinë e madhe për gjërat jo aq të rëndësishme, përkatësisht për ndodhitë epizodike, si dhe radhitje dhe renditje të llojllojshme të betejave, andaj në raste të tilla jam për­pjekur të jem i përpiktë me qëllim që të arrijë gjer tek e vërteta e saktë. Ngjarjet dhe ndodhitë i kam vështruar nga shumë aspekte të ndryshme, përderisa nuk vendosa që në konturet e punimit tim të përfshihet ajo që është më e qarta dhe, sipas mendimit tim, më e sakta.
I kam ikur komentimit të argumenteve, sepse kjo shpien gjer tek gjerësia e panevojshme, por ndoshta i kam theksuar disa prej tyre, atëherë kur frikësohesha se lexuesi do të habitej, ose kur kam vërejtur se të gjithë autorët, përkundër të vërtetës, kanë ndjekur rrugë tjetër.
O All-llahu im, më përcakto për të mira në këtë botë dhe në botën tjetër. Ti vërtetë je Ai i cili falë, i cili meriton dashuri. Ti je Sundues i Arshit të lavdishëm.
Më 24. 07. 1396 h./ 23. 07. 1976
Safijju-R-Rahman El-Mubarekfuri