[Llapi]

Hashim Thaçi, personalitet i shekullit

Publikuar: E premte 29 Korrik 2011, 14:48
Shkruan

Reshat SAHITAJ


Lidhur me figurën dhe veprimtarinë e Hashim Thaçit, analistët tanë dhe botërorë kanë shkruar herë pozitivisht e herë duke bërë spekulime dhe kalkulime nga më të ndryshmet. Ndonjë analist yni për interesa të panjohur për opinionin tonë i ka bërë lajka, duke e ngritur figurën e tij në superlativ, ndonjë tjetër i paguar nga ndonjë shërbim, po ashtu i panjohur për ne ka shkruar negativisht për figurën e Hashim Thaçit. Gjer më tani nuk më ka rënë rasti të lexoj diçka objektive dhe realiste dhe pa inate personale e partiake, ku nuk ngrihet e nuk zbehet asgjë nga veprimtaria e këtij personaliteti tanimë të konfirmuar, si në skenën ndërkombëtare, po ashtu edhe në atë kombëtare.

Shqiptarët vetëm të vdekurit i respektojnë

Historikisht shqiptarët të paguar nga shërbimet sekrete armiqësore gjithnjë na i kanë vrarë veprimtarët më të devotshëm të atdheut. Bazuar në studimet shkencore të Dr. prof. Eqrem Zenelajt, duket se Rusia Cariste dhe satelitët e saj vëllazërorë Serbia dhe të tjerët përreth, kanë përhapur dezinformata kundër patriotëve tanë, duke i etiketuar ata si të shitur, ku në këtë mënyrë i kanë "legjitimuar" aktet terroriste të tyre. Kush i vrau: Isa Boletinin, Hasan Prishtinën, Bajram Currin....?! Përgjigja nuk do koment, sepse edhe fëmijët e dinë, shqiptarët e paguar nga Serbia. Veprimtarët e çështjes kombëtare asnjëherë nuk u respektuan nga masat tona popullore, sepse kundër tyre dhe prapa tyre ekzistonte dhe ende ekziston një makineri propagandistike serbe, që asnjë shqiptar nuk na del i pastër. Dikur popullsia jonë mendonte se Avdyl Frashëri ishte i paguar nga Turqia për të themeluar "Lidhjen Shqiptare të Prizrenit", sepse si pretekst merrnin vëllanë e tij, të cilin nuk ia kishin ndërprerë të ardhurat. Propaganda kundër patriotëve të mirëfilltë vazhdon edhe në ditët e sotëm, dhe nuk është aspak e rastësishëm kur një ish-ministër i kulturës sonë deklaronte se Adem Demaçi po të kishte qenë atdhetar Serbia do e kishte vra! Mirëpo as kundër Hashim Thaçit nuk kanë munguar të flitet e sidomos në opinionin popullor. Lufta psikologjike kundër atdhetarëve të devotshëm është më e suksesshme kur ajo dezinformatë plasohet si e saktë në masat e gjëra të popullit, gjë që për këtë Serbia është tepër e sofistikuar.
Nga propaganda e tillë armiqësore, ne gjithnjë kemi pasur dyshime se personalitetet tona politike janë në shërbim të armikut. Kjo ka ndikuar që ne kurrë të mos tregojmë respekt për veprimtarët e gjallë. Pas vdekjes së tyre, ne ngrisim në qiell veprat e tyre, por kjo është vonë.
Si dikur edhe sot, Serbia e ka të fuqishëm shërbimin e saj kundër shqiptarëve, madje, një pjesë e tyre janë përvjedhur dhe punojnë në struktura tona shtetërore, detyra e të cilëve është për të marrë informata dhe të përhapin dezinformata kundër gjithçkaje shqiptare.

Hashim Thaçi dhe aksioni i tij historik

Të gjithë shqiptarët e dinë rolin e Hashim Thaçit gjatë luftës, mirëpo në shumë qarqe gjatë luftës është folur e përfolur se si ai tërë kohën ka qëndruar në "Rogner" dhe se po të mos ishte Hashim Thaçi dhe luftëtarët e UÇK-së, Serbia nuk do kishte bërë masakra në popullin shqiptar. Kjo ishte propaganda që Serbia e zhvillonte aso kohe vetëm e vetëm që luftës çlirimtare të mos t'i përgjigjeshin masovikisht.
Pikërisht kur flitej se Hashim Thaçi qëndronte në "Rogner", aso kohe Hashim Thaçi kishte vizita sekrete në Paris e nga Parisi në kufirin belgo-francez e prisja unë me shokët tjerë për takime sekrete në NATO me Velsi Karkun mbante konferenca për medie internacionale në Bruksel, ku qëndroi disa ditë në vilën shtetërore të organizuar nga mikja jonë senatorja Ane Marie -Lizin dhe në cilën vilë "sekrete" Thaçi e vizitonin edhe luftëtarët tjerë si "Daja" e shumë të tjerë. Nga Brukseli shkoi në udhëtimin më sekret për Londër te Robin Kuku, i shoqëruar nga Ekrem Krasniqi e në Aeroportin e Londrës i përcjellë me vetura banale që askush të mos dyshonte se aty gjendej Hashim Thaçi. Bilall Sherifi dhe stafi i Hashimit dëshironte që këto takime të bëheshin publike, mirëpo do i kujtohet tani Hashimit dhe tjerëve se Vesli Klarku i kishte këshilluar që takimi të mbetej top sekret për arsye që mos ta zemëronte Rusinë dhe t'i sulmonte në mënyrë kirurgjike forcat serbe. Takimi në Paris, Bruksel dhe Londër nuk ishte bërë rastësisht dhe nga Zoti, por prej nesh që asnjëherë nuk e ngritëm zërin as për t'u lavdëruar e as për t'i bërë lajka Hashimit dhe tjerëve, të cilët me veturën time personale shkuan edhe në vilën shtetërore amerikane te Ollbrajti, që gjendet në periferi të Brukselit.
Edhe pse me Hashimin jam takuar dy apo tri herë, dhe nuk kam asnjë përfitim qoftë vend pune apo material nga Qeveria dhe partia që e drejton Hashim Thaçi, nuk kam menduar kurrë se ai personalisht punon kundër interesave kombëtare.
Aksioni i së hënës ë kaluar, Hashim Thaçin do ta ngrit në piedestalin e çështjes kombëtare. Vendosmëria e tij për ta vë nën kontroll pjesën veriore është hapi historik.

Hashim Thaçi
personalitet ndër më të çmuarit e shekullit

Në medie të Shqipërisë viteve të fundit janë zhvilluar një seri debatesh lidhur me atë se cilët do mbesin dhe konsiderohen baballarë të kombit shqiptar. Natyrisht, për shkaqe ende të errëta ideologjike sociologët, psikologët, filozofët dhe analistët nuk po arrijnë të gjejnë një figurë historike që do mbetej ikonë e përhershme kombëtare. Debatet televizive vazhdojnë ta intrigojnë opinionin tonë, duke mos pasur guxim të përcaktohen për Skënderbeun, apo Ali Pashë Tepelenën ose Isamil Qemailin, e madje as për të tretë bashkë. Për secilën nga këto figura të rëndësishme kombëtare, analistët dhe historianet gjejnë "gabime" se njëri kishte zhvilluar luftëra për Vatikanin, tjetri kishte qenë vetëm një pirat që ishte shndërruar në figurë politike, tjetri kishte grua greke dhe anonte nga Greqia. Me profka të tilla merren analistët, historianet dhe ndonjë filozof e sa për figurat tjera, si: Avdyl Frashëri, Ymer Prizreni, Hasan Prishtina... as që bëhet fjalë. Inteligjenca kosovare nuk e shtron këtë çështje, sepse tanët merren me glorifikime të miqve të vet dhe me zbritje të kundërshtarëve.
Pavarësisht se njeriu e sidomos personalitetet e njohura gabojnë me hapa e ndërmarrje të ndryshme, është koha që Kosova të krijojë një institucion për vlerësimin jo vetëm të vlerave të luftës, por edhe në fusha tjera. Nuk duhet lejuar që secili të shkruajë monografi për shokët apo familjarët e tyre, nuk duhet dhënë hapësirë disa sharlatanëve që nuk njohin as si historianë, as si veprimtarë, e as të përgatitur profesionalisht të shkruajnë libra për ta vlerësuar ndonjë figurë poltike të vdekur apo të gjallë. Të tillët e dëmtojnë vetën, e veçmas çështjen kombëtare.
Deri më sot askush nuk është marrë seriozisht dhe në mënyrë shkencore me luftën e fundit e me heronjtë e saj. Natyrisht, për këtë duhet mjete financiare të konsiderueshme, sepse duhet bërë hulumtime, verifikime, krahasime... për të ardhur deri të një vlerësim real i luftës sonë dhe heronjve të saj të gjallë apo të vrarë në altarin e lirisë.
Kryeministri aktual, Hashim Thaçi, ka dhënë mjaft prova se lufta e tij dhe vendimet e tij ishin të drejta dhe kombëtare. Pas luftës Hashim Thaçi ka evoluar si në qëndrim, në fjalor dhe shprehjet politike, po ashtu edhe në diplomaci ndërkombëtare dhe kombëtare. Vendimi i tij i fundit tregon maturinë, pjekurinë dhe më shumë atdhedashurinë. Duke e studiuar veprimtarinë e tij para dhe pas luftës, pa asnjë dyshim mund të konfirmohet se hapi i tij për ta shtrirë kontrollin në tërë hapësirën e Kosovës është hap i madh që mund ta marrin vetëm ata që kanë guxim dhe janë kombëtarisht të vendosur. Për personalitetet politike, historia është treguar gjithnjë e pamëshirshëm, kur ata zhvillonin aksione të gabuara, mirëpo tregohej zemërgjerë për vendimmarrjet e tyre kombëtare.
Vendimi i tij për të marrë nën kontroll pikën 1 & 31, është vendim historik dhe nëse qëndrimi i Thaçit do të vazhdojë me këtë tempo, pa asnjë dyshim Kryeministri ynë do të shënojë gjurmë në karrierën e tij politike që do ta radhisin në rangun e personaliteteve të shekullit.

vijon