Lajme ekonomike.

[Era1]

Ne kete teme mendoj te vendosim cdo te re qe lidhet me ekonomine dhe financat.


Ulet me 30 % gjoba maksimale e tatimeve ndaj biznesit

Ligji i ri për procedurat tatimore do të zbusë edhe vlerën e gjobës që një biznes do të marrë në rastet kur ka fshehur pagimin e taksave. Të dhëna nga Ministria e Financave thanë dje se, në ligjin e ri janë përcaktuar me detaje rastet dhe vlerat e gjobave, në përpjestim me vlerën e detyrimit tatimor të papaguar. Specialistë të kësaj ministrie thanë se, në rastet kur inspektorët e tatimeve do të gjejnë fshehje të detyrimit tatimor, subjektet e biznesit do të gjobiten në një vlerë që përafërsisht të jetë 30 % më e ulët sesa është parashikuar në ligjin e tashëm.

Kjo gjë vjen, sipas këtyre zyrtarëve, për shkak se, në ligjin e ri, tashmë është përcaktuar me afate dhe me detaje se kur do të paguhet një taksë dhe masat që merren në rast se ajo nuk paguhet. Në ligjin e ri janë qartësuar edhe afatet se kur bëhet një sekuestro, apo afatet se kur administrata e tatimeve mund të konfiskojë mall apo edhe asete të biznesit. Duke qenë se ligji i procedurave tatimore është shumë i detajuar dhe në fuqi ka hyrë edhe taksa e sheshtë, e cila mundëson një llogaritje më të lehtë të tatimeve, atëherë është menduar që të ulet vlera e gjobave. Në ligjin e tashëm, gjobat që administrata e tatimeve mund t’i vendosë biznesit shkojnë deri në pesëfishin e vlerës së detyrimit tatimor të papaguar. Me detyrim tatimor të papaguar kuptohet vlera e taksave që i janë fshehur shtetit me qëllim, të cilën e llogarisin inspektorët e administratës së tatimeve. Me fjalë të tjera, ky është edhe evazioni fiskal në rastin konkret. Ligji i ri i procedurave tatimore është një ligj i përgatitur me mbështetjen e agjencisë së qeverisë amerikane USAID dhe që është përpjekur të marrë praktikat më të mira të vendeve të BE-së. Në këtë ligj, duket se zyrtarët e administratës së tatimeve do të kenë një pushtet më të rritur, por megjithatë procedurat janë mjaft të qarta dhe të detajuara, gjë që e ngushton hapësirën e spekulimeve prej tatimorëve. Zbutja e vlerës së gjobave të parashikuara në ligjin tatimor për bizneset që kapen me evazion fiskal, nëse do të marrë fuqi ligjore, është një masë që do të pritet mirë nga biznesi. Biznesi, ligjin në fuqi e kundërshtoi me forcë, pasi e mendonte si një ligj, i cili mund të çonte në falimentim shumë biznese, për shkak se ai kërkonte që gjobat, në një pjesë prej 25 % të vlerës së tyre duhet të paguheshin paraprakisht. E vërteta është se tashmë, tre muaj pasi ligji është në fuqi, asnjë biznes nuk e ka ndjerë veten të kërcënuar nga ky ligj.


Gazeta Tema