Femrat kerkojn 50:50 perfaqsimin ne parlament,

Kërkojnë 50:50

Kada: Me barazi gjinore nënkuptohet përfaqësimi 50 me 50, e jo 30 me 70, apo 40 me 60 për qind

E diel 14 Gusht 2011 9:07
Përderisa gratë deputete të Kuvendit të Kosovës kërkojnë përfshirje në institucionet vendimmarrëse prej 50 për qind, aq sa janë edhe në përbërjen e popullatës, nga ana tjetër, ekspertë zgjedhorë konsiderojnë se edhe kuota prej 30 për qind duhet të hiqet. Eksperti për çështje zgjedhore, Xhavit Shala, thotë se gratë duhet të jenë aktive në politikë, por, sipas tij, nëse ato mendojnë vetëm te kuota më shumë do të jenë dekor i politikës sesa përfaqësim i drejtë.
Donika Kada-Bujupi, nga Grupi i grave deputete të Kuvendit të Kosovës, nuk pajtohet me faktin që gratë në politikë janë dekor. Atëherë, shtron pyetjen ajo, nëse gratë janë dekor atëherë çka janë burrat. Sipas saj, të gjitha hulumtimet e bëra dëshmojnë që aty ku janë gratë ka më pak korrupsion, krim të organizuar dhe më shumë përgjegjësi në punë. E, një gjë e tillë i duhet Kosovës.
Prandaj, siç ka thënë Kada-Bujupi, ajo çka kërkojnë gratë deputete është që të ketë një ndjeshmëri sa i përket barazisë gjinore dhe ajo të reflektojë në përbërje të të gjitha institucioneve edhe të Kuvendit, Qeverisë dhe të institucioneve tjera që nuk janë politike. “Natyrshëm jemi 50 për qind e popullatës dhe natyrshëm duhet të përfaqësohemi si të tilla kudo, ndryshe do të shkojmë kundër një balanci nacional i cili nuk do të prodhojë progres, por përkundrazi do të prodhojë regres”, ka thënë ajo.
Sipas saj, gratë deputete kërkojnë harmonizimin e Ligjit për barazi gjinore. “Jemi në disa fusha duke punuar dhe në mesin e tyre është edhe amendamentimi në Kushtetutë, ku do të kërkojmë të kemi një barazi gjinore”, ka thënë Kada-Bujupi.
Kada ka thënë se ende nuk kanë marrë vendim final se sa duhet të jetë kuota e përfaqësimit gjinor, mirëpo ka potencuar se janë shumë këmbëngulëse në kërkesat e tyre që gjatë amendamentimit të Kushtetutës të theksohet barazia gjinore.
“Me barazi gjinore nënkuptohet përfaqësimi 50 me 50, e jo 30 me 70, apo 40 me 60 për qind”, ka thënë ajo, duke shtuar se ashtu siç është tashti kuota, partitë politikë nuk janë të demokratizuara dhe gara për poste nuk është e barabartë.
Nga ana tjetër, eksperti për çështje zgjedhore, Xhavit Shala, thotë se vendet e rajonit nuk e kanë kuotën gjinore. Prandaj, sipas tij, kuota gjinore duhet të hiqet patjetër. Ai ka thënë se gratë deputete duhet të kërkojnë të jenë të barabarta dhe jo të jenë dekor i politikës. Ato, sipas tij, duhet të jenë aktive në politikë dhe të marrin pozita të merituara.
“Nuk është pasqyrë reale nëse ato shkojnë gjithnjë në bazë të kuotës, pasqyra reale është nëse ato shkojnë në bazë të votës. Ato duhet të shkrihen në parimin e votës dhe duhet të thirren në parimin e barazisë e jo në parimin e kuotës, sepse kjo sjell në parlament përfaqësim të pabarabartë”, ka thënë Shala.
Ai ka ilustruar faktin se nëse një mashkull i ka 10 mijë vota ai s’mund të jetë në parlament e në anën tjetër një femër me 2500 vota mund të jetë deputete. Atëherë, pyet Shala, ku është mesazhi i barazisë gjinore.
“Unë jam për atë që të ketë barazi në votë, barazi në vendimmarrje në pozitat partiake. Ato duhet të jenë aktive në politikë. Nëse ato mendojnë vetëm te kuota, ato më shumë do të jenë dekor i politikës sesa përfaqësim i drejtë”, ka thënë Shala.
Kreu i Komisionit për Reformën Zgjedhore, Haki Demolli, ka thënë se janë identifikuar të gjitha pikat ku do të mund të ketë ndryshime. Por, sipas tij, një gjë e tillë do të arrihet pas një debati të gjerë me të gjitha palët e përfshira në reformë e po ashtu edhe pas debatit me qytetarët./zeri/