Raportet: FMN/BB - Kosovë

[Zero Cool]

FMN-ja nuk pajtohet me tabelat buxhetore për vitin 2012





10:10 / 15.09.2011
Ekipi i ekspertëve të Fondit Monetar Ndërkombëtar (FMN), i cili ka përfunduar inspektimet buxhetore të mërkurën, nuk ia ka dhënë dritën jeshile Qeverisë së Kosovës që t’i procedojë më tej tabelat e buxhetit për vitin 2012.

Janë shpenzimet e larta në disa sektorë karshi të hyrave më të vogla financiare ato që kanë ndikuar në mospranimin nga FMN-ja të dokumentit me tabelat financiare të hartuara nga Qeveria. Në bazë të qarkores së dytë buxhetore, Qeveria për vitin 2012 ka paraparë deficit financiar prej afro 200 milionë eurosh, gjë që ka rezultuar me mospranim nga FMN-ja. Sipas të njëjtit dokument, shpenzimet e përgjithshme për vitin 2012 pritet të jenë në vlerën prej 1 miliard e 500 milionë eurosh, derisa të hyrat pritet të jenë më të vogla se 1 miliard e 300 milionë euro.

Ndonëse në Qeveri kanë paraparë që deri në gjysmën e muajit tetor të përfundojë hartimi i buxhetit për vitin e ardhshëm, javën e ardhshme Uashingtonin pritet ta vizitojnë krerët e politikave financiare të vendit. “Marrëveshje të plotë me FMN-në për momentin nuk kemi, sepse bisedimet me FMN-në do të vazhdojnë edhe javën e ardhshme, ku një delegacion nga Ministria e Financave, i kryesuar nga ministri Bedri Hamza, do të udhëtojë për në Uashington, ku edhe do të diskutohet për buxhetin 2012”, ka thënë Muharrem Shahini, zëdhënës i Ministrisë së Financave, shkruan Koha Ditore.

Sipas tij, dëgjimet buxhetore janë në mbarim e sipër, ndërkohë që pritet një harmonizim i qëndrimeve me FMN-në rreth shpenzimeve të parapara për vitin e ardhshëm. “Jemi në përfundim të harmonizimit të ndarjeve buxhetore, duke u bazuar në kërkesat e institucioneve të Kosovës. Në momentin që ndarjet buxhetore përfundojnë, atëherë do të dihet edhe shuma e buxhetit për vitin e ardhshëm 2012”, ka theksuar Shahini.

Ai nuk ka dhënë shifra se sa do të jenë më të larta shpenzimet e gjithëmbarshme vjetore karshi të hyrave financiare për vitin që vjen. Zëdhënësi Shahini ka theksuar se shpenzimet e përgjithshme do të paraqiten në qarkoren e tretë buxhetore, që pritet të publikohet gjatë muajit tetor.

“Në momentin e përfundimit të konsultave do ta përgatisim edhe qarkoren e tretë të buxhetit, kështu që të jemi gati për përfundimin e hartimin të buxhetit”, ka thënë Shahini.

[Zero Cool]

Nuk do të ketë marrëveshje të re me FMN-në





15:42 / 14.09.2011

Qeveria e Kosovës është duke diskutuar që prej dy ditësh çështjet e buxhetit, sipas burimeve të Telegrafit përveç buxhetit nuk pritet të arrihet ndonjë marrëveshje me delegacionin FMN-së i cili do të përfundojë vizitën të enjte.


Burimet kanë treguar se marrëveshje të re nuk do të ketë por vetëm diskutime për çështje buxhetore. Për ta “bindur” FMN-në se Qeveria me financat ësh të rregull javën e ardhshme ministri Bedri Hamza do të udhëtoj për në FMN ku do të diskutoj me zyrtarë të lartë.

Ndryshe, ministri i Financave, Bedri Hamza, ka takuar të mërkurën Brian Olden, këshilltar për financat publike për Evropën juglindore në Fondin Monetare Ndërkombëtar, i cili po qëndron për vizitë zyrtare në Kosovë.

Sipas një njoftimi të Ministrisë së Financave në këtë takim janë diskutuar tema të veçanta rreth ofrimit të asistencës teknike nga Fondi Monetar Ndërkombëtar në fushat ku edhe konsiderohet së janë të nevojshme.

Ndihma do të jetë si në statistika, planifikimin buxhetor si dhe decentralizimin fiskal nëpër komuna. Gjithashtu në këtë takim u diskutuan edhe tema të tjera me interes të veçantë.

[Zero Cool]

156 milionë, s’kthehen kurrë


Fondi Monetar Ndërkombëtar mund të arrijë marrëveshje të re me Qeverinë e Kosovës vetëm pas muajit shkurt të vitit 2012. Por, 156 milionët e humbur, si shkak i ndërprerjes së marrëveshjes SBA, nuk do të kthehen kurrë. Kjo, pasi që marrëveshja SBA përfundon në fund të këtij viti. Mësohet se institucionet vendëse janë duke iu përmbajtur me përpikëri rekomandimeve të FMN’së për projeksionet e reja buxhetore për vitin 2012.





Më 16 shtator 2011 në ora 09:03

Edhe nëse Qeveria e Kosovës arrin të nënshkruajë një marrëveshje të re me Fondin Monetar Ndërkombëtar, nuk do të mund t’i kthejë asnjëherë 156 milionë eurot e humbura nga programi i vitit të kaluar me këtë institucion.

Krejt kjo pasi që ndërprerja e marrëveshjes 18 mujore Stand By Arrangment përfundon në fund të këtij viti. Dhe pas kësaj, Qeveria e Kosovës në tremujorin e parë të vitit të ardhshëm mund të nënshkruajë një marrëveshje të re, por që nuk do të nënkuptojë kthimin e mjeteve të humbura si shkak i ndërprerjes së marrëveshjes SBA.

Përderisa pritjet e Qeverisë ishin që në fund të këtij viti të arrinte t’i zhbllokonte një pjesë të fondeve të ngrira. Kështu patën thënë në një prononcim për Express zyrtarë të Ministrisë së Financave.

“... gjatë vizitës brenda muajit nëntor, kur do të bëhet vlerësimi për pjesën e parë të marrëveshjes, gjegjësisht për të arriturat deri më 30 shtator 2011, ku ne si qeveri presim që të marrim një vlerësim pozitiv nga ana e FMN-së, gjë që do të mundësonte lirimin e një pjesë të ndihmës direkte buxhetore të premtuar për këtë viti”, pati thënë zyrtarja për informim në Ministrinë e Financave, Fatime Lumi.

Përveç se nuk do të arrijë t’i kthej këto fonde, Qeveria do të vazhdojë të jetë në programin “e monitoruar nga stafi”, duke qenë në një disiplinë maksimale financiare dhe ruajtje të stabilitetit makrofiskal. E respektimi i plotë i kësaj marrëveshjeje ua hap rrugën marrëveshjeve të reja me Fondin.

Më saktësisht, nëse shikohet me kujdes në detajet e marrëveshjes për program të monitoruar nga stafi, në muajin shkurt të vitit të ardhshëm do të jepet vlerësimi përfundimtar për stabilitetin fiskal nga stafi i FMN-së për Kosovë.

“Për të diskutuar performancën buxhetore të vitit 2011, stafi i FMN’së do të vijë sërish në javën e parë të shkurtit, ku më pastaj këtu edhe do të jepen vlerësimet për të vazhduar apo jo më tutje me një marrëveshje të re me Qeverinë e Kosovës”, është një detaj tjetër i marrëveshjes “monitor nga stafi”.

Mësohet se institucionet vendëse janë duke iu përmbajtur me përpikëri rekomandimeve të FMN-së për projeksionet e reja buxhetore për vitin 2012. Nëse vazhdohet kështu, sipas marrëveshjes që ka Qeveria e Kosovës tani për tani me këtë institucion, delegacioni nga FMN-ja që do të vij në nëntor do të jap rekomandime pozitive.

Ndërkaq, delegacioni i Fondit Monetar Ndërkombëtar që përfundoj vizitën në Kosovë të mërkurën, kishte për objektivë informimin për performancën financiare të vendit dhe më pastaj, të gjitha këto diskutime do të vazhdohen në takimet që ministri i Financave, Bedri Hamza do t’i ketë në takimin vjetor të FMN’së, në Uashington.

Fondi Monetar Ndërkombëtar deri në vitin tjetër, do ta monitorojë performancën financiare të Kosovës sa i përket ekzekutimin e buxhetit, ruajtjen e bilancit tregtar, stabilitetin e sektorit bankar dhe iniciativat e tjera që kanë të bëjnë me ligjet që kanë kosto të lartë financiare.

[Zero Cool]

Agani: Bisedimet me BB-në, i hapën rrugë reformës në shëndetësi


“Bisedimet me Bankën Botërore dhe Fondin Monetar Ndërkombëtar kanë qenë bisedime shumë të rëndësishme, të cilat me përfundimet e tyre, i kanë hapur qartë rrugën reformës së shërbimeve shëndetësore në vend, gjegjësisht miratimit të dy projektligjeve: Projektligjit për Shëndetësi dhe Projektligjit për Sigurime Shëndetësore”, tha ministri i i shëndetësisë Ferid Agani






16 shtator 2011
Ekonomisti

Ministri i Shëndetësisë i Republikës së Kosovës, Ferid Agani , tha se bisedimet e këtyre ditëve të ministrisë me delegacionet e Bankës Botërore dhe të Fondit Monetar Ndërkombëtar i kanë hapur rrugë reformës legjislative në shëndetësi, gjegjësisht procedimit dhe miratimit të dy projektligjeve reformuese: Ligjit për Shëndetësi dhe Ligjit për Sigurime Shëndetësore.
“Bisedimet me BB dhe FMN-në kanë qenë bisedime shumë të rëndësishme, të cilat me përfundimet e tyre, i kanë hapur qartë rrugën reformës së shërbimeve shëndetësore në vend dhe paraqesin momentin kur në fund të tunelit të errët ku gjendet shëndetësia kosovare, po e shohim një dritë”, tha Agani, në një konferencë për media, përmes së cilës ai njoftoi opinionin lidhur me rezultatet që MSh i ka pasur lidhur më bisedimet me Bankën Botërore dhe Fondin Monetar Ndërkombëtar gjatë kësaj jave.
Konkretisht, ka shpjeguar më tej Agani duke thënë se me Bankën Botërore ka pasur bisedime përmbajtësore përkitazi me aspekte të ndryshme të reformës shëndetësore në vendin tonë që është përkthyer në zgjidhje konkrete ligjore me Projektligjin për Shëndetësi dhe Projektligjin për Sigurime shëndetësore, dhe pas bisedimeve të shumta ne kemi ardhur deri të pajtimi i plotë përkitazi me atë që në Kosovë praktikisht duke filluar nga mesi i vitit që vjen me grumbullimin e kontributeve, të pagesave dhe të premiumeve në Fondin e Sigurimeve Shëndetësore dhe që nga viti që vjen të fillojë reforma e sistemit të institucioneve publike shëndetësore në një ndërmarrje shtetërore të shëndetësisë, pra , Shërbimi Shtetëror i Shëndetësisë.
Ai tha se këto janë koncepte unike reformuese për Kosovën, një model reformues i cili i reflekton nevojat e vendit, dhe paraqet momentin kur për herë të parë pas luftës në Kosovë po themelohet Sistemi i Sigurimeve Shëndetësore, i cili do të sigurojë një financim shumë më të mirë të shëndetësisë kosovare dhe një lëvizje të qartë nga pika zero.
“Me qëllim po e them nga pika zero, sepse gjatë këtyre gjashtë muajve të mandatit të gjithë kemi qenë koshientë me vështirësitë me të cilat gjendet shëndetësia kosovare , ato kanë vazhduar më mënyrë të pandashme, por ne, në mënyrë të vazhdueshme u kemi dhënë përgjigje këtyre vështirësive duke ofruar zgjidhje dhe perspektivë”, tha Agani, duke shtuar se është shumë i lumtur që sot mund të konkludohet që projeksionet ligjore të MSH-së, zgjidhjet reformuese, janë mbështetur nga Banka Botërore dhe nga FMN.
Ai foli edhe për dakordimin e hapave të mëtejmë të punës në reformën legjislative.
“Konkretisht, gjatë javës do të përfundojë drafti përfundimtar i dy projektligjeve, në dritën e bisedimeve që i kemi pasur me BB dhe FMN dhe ato do të dalin për miratim në Qeverinë e Kosovës deri në fund të shtatorit, dhe procedohen në Kuvendin e Kosovës, ku presim të miratohen në fund të muajit tetor ose në fillim të muajit nëntor”.
Agani shpjegoi se esenca e sistemit të ardhshëm të financimit të shëndetësisë kosovare do të bazohet në një model miks.

“Fondi i Sigurimeve Shëndetësore do të jetë institucioni që do t’i kontraktojë shërbimet shëndetësore si në sektorin publik ashtu edhe në sektorin privat të shëndetësisë sonë, do të plotësohet dhe financohet nga Buxheti i Kosovës për kategoritë e qytetarëve që janë në asistencë sociale, pra për ato kategori të qytetarëve që nuk kanë mundësi t’i paguajnë kontributet për të siguruar kartelën e të siguruarit shëndetësor dhe ky fond do të plotësohet nga pagesat e kontributeve të qytetarëve në bazë të anëtarëve të familjes që do të jetë në një vlerë të cilën do ta përcaktojë Qeveria e Kosovës në fillim të çdo viti varësisht nga gjendja ekonomike e shtetit dhe nevojat shëndetësore të popullatës. Fondi do të plotësohet nga tatimet e ndryshme dhe nga akcizat, një pjesë e tyre nga ta marrim nga të ashtuquajtura mallra luksoze si alkooli, duhani, ndoshta edhe karburantet , nga ndotësit e mëdhenj të ambientit… Pra, janë këto burimet kryesore nga të cilat do të plotësohet Fondi i Sigurimeve Shëndetësore”.
Agani tha se me aktivizimin e Fondit të Sigurimeve Shëndetësore, MSh pret që më 2013 ta dyfishojë buxhetin ekzistues që ndahet nga Qeveria e Kosovës për shëndetësinë.

[Zero Cool]

Drejtori i ri i BB për Kosovës rikonfirmon mbështetjen për Kosovën


Kryeministri i Republikës së Kosovës, Hashim Thaçi ka pritur sot drejtorin e ri të Bankës Botërore për Kosovë, Jan Peter Olters.





11 tetor 2011
Në takim është diskutuar për bashkëpunimin e deritanishëm të Qeverisë së Republikës së Kosovës dhe Bankës Botërore, si dhe për thellimin e këtij bashkëpunimi.

Kryeministri Thaçi me këtë rast uroi z. Jan Peter Olters për marrjen e detyrës së re në krye të Bankës Botërore, si dhe vlerësoi lartë mbështetjen që Banka Botërore i ka dhënë Kosovës në të gjitha fushat. Në këtë kontekst, kryeministri Thaçi ka potencuar rolin e rëndësishëm dhe mbështetës të drejtorit të deritanishëm të Bankës Botërore për Kosovë, Ranjit Nayak.

Në takim, kryeministri Thaçi njoftoi udhëheqësin e ri të Bankës Botërore për vizionin e Republikës së Kosovës për zhvillimin e qëndrueshëm ekonomik, implementimi i të cilit është i bazuar në katër shtylla kryesore: ruajtjen e qëndrueshmërisë makrofiskale; investimet, përkatësisht mjedisin investues dhe përkrahjen e sektorit privat; zhvillimin e infrastrukturës publike; rivitalizimin e sektorit të bujqësisë; dhe zhvillimin e kapitalit njerëzor.

Nga ana e tij, drejtori i ri i Bankës Botërore, Jan Peter Olters pasi falënderoi kryeministrin Thaçi për pritjen dhe theksoi përkushtimin e Bankës Botërore për të vazhduar mbështetjen e institucioneve të Republikës së Kosovës në implementimin e suksesshëm të projekteve zhvillimore të vendit.

[Zero Cool]

Rashiq: Presim aprovimin e FMN-së për Projektligjin pensional


Ministri Rashiq dha sqarime në lidhje me Projektligjin për skemën pensionale të financuar nga shteti si dhe për projektligjet e tjera që janë në procedurë


19 tetor 2011
Ekonomisti
Në mbledhjen e sotme të Komisionit për Shëndetësi, Punë dhe Mirëqenie Sociale të Kuvendit të Kosovës, të cilën e kryesoi kryetari Fikrim Damka, ministri i Punës dhe Mirëqenies Sociale, Nenad Rashiq, ka raportuar në lidhje me Projektligjin për skemën pensionale të financuar nga shteti dhe për projektligjet e tjera që janë në procedurë.
Ministri Rashiq tha se Projektligji për skemën pensionale të financuar nga shteti është ligj shumë i rëndësishëm dhe si i tillë, është marrë shumë seriozisht nga ministria që ai udhëheq. Ai foli në detaje për ecurinë e hartimit të tij dhe proceset pasuese, deri te marrja e pëlqimit teknik nga ana e Bankës Botërore (BB), përderisa aprovimin e fundit e jep Fondi Monetar Ndërkombëtar (FMN). Ai tha se BB-ja është faktor i pashmangshëm në zhvillimet e ardhshme të Kosovës dhe se sugjerimet e saj janë inkorporuar në këtë draftligj.
Duke folur për aspektet e brendshme të projektligjit, ministri i Punës dhe Mirëqenies Sociale theksoi se nuk ka ligj ideal, nëpërmjet të cilit do të zgjidheshin të gjitha problemet e një grupi shoqëror. Ai tha se fillimisht pensionet do të merren në mënyrë lineare, ndërsa më vonë mund të bëhet kategorizimi i tyre.
Anëtarët e komisionit, ndërkaq, ngritën një varg pyetjesh dhe shqetësimesh që lidheshin me aspekte të ndryshme të projektligjit. Në këtë kontekst, ata shtruan çështjen e kontakteve dhe bashkëpunimit me pensionistët dhe ekspertët gjatë hartimit të projektligjit, përparësitë që do të ketë pensionistët pas miratimit të tij, prezencës së deputetëve gjatë negociatave me FMN-në etj. Përkitazi me këtë të fundit, ministri garantoi se tash e tutje në çdo takim me këtë mekanizëm ndërkombëtar do të ftohen edhe anëtarët e komisionit. Duke u përgjigjur rreth çështjeve të ngritura, ai e cilësoi projektligjin si serioz dhe profesional, i cili, sipas tij, i rregullon të drejtat e pensionistëve dhe sferat e tjera që kanë qenë të paqarta deri më tash.
Në vazhdim, ministri Rashiq foli edhe për projektligjet e tjera që i përkasin fushëveprimtarisë së dikasterit qeveritar që ai udhëheq dhe të cilat janë në procedurë.
Deputetja Flora Brovina, njëherësh kryesuese e grupit punues për amendamentimin e Projektligjit për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave civile dhe familjeve të tyre, dha detaje rreth punës që po bëhet në amendamentimin e këtij projektligji, përfshirë edhe negociatat me institucionet relevante vendore e ndërkombëtare.