Lajme aktuale nga vendi !

[Zero Cool]

Serbi që skulpturon Adem Jasharin...!







Dragisha Andrijevic nga Lipjani, nuk e ka aspak të vështirë ta gravojë në dru e qelq kryeheroin e shqiptarëve Adem Jasharin, stemën e Ushtrisë Çlirimtare të Kosovës, apo ish-presidentin e ndjerë, Ibrahim Rugova.

Ai deri më tani ka bërë dhjetëra gravime të tilla me Adem Jasharin, UÇK-në, UÇPMB-në e Rugovën, pasi që ka hasur në interesim të madh të shqiptarëve nga Kosova për blerjen e veprave të tilla artistike.

“Nuk e kam aspak problem nëse një myshteri vjen dhe e kërkon që ta blejë të gravuar në dru, apo qelq Adem Jasharin. Shumë të tilla i kam bërë edhe me Ibrahim Rugovën, ish-presidentin amerikan Bill Clinton, Skënderbeun, Nënën Terezë, stemën e UÇK-së e të UÇPMB-së etj.”, shprehet Andrijevic për gazetën Zëri.

Ai thotë se kjo punë është biznes, nga e cila e siguron mbijetesën për të gjithë anëtarët e familjes dhe nuk i interesojnë çështjet politike, përderisa çmimi i veprave të tilla sillet prej 10 deri në 40 euro. “Këtë e kam biznes dhe nuk më intereson aspak politika”, shprehet i prerë ai.

Andrijeviq më herët gravimet në dru dhe qelq i kishte bërë në mënyrë mekanike, ndërsa biznesi i tij ka filluar të zhvillohet pasi Komisioni Evropian ia ka dhuruar si donancion një makinë të kompjuterizuar gravuese, e cila ka kushtuar 3800 euro.

[Zero Cool]

Diskutohet mbyllja e ICO-s pa e kryer punën






“Shtetet mike” të Kosovës kanë nisur të shfaqin mospajtime rreth asaj se si duhet ecur përpara në mbikëqyrjen e pavarësisë.

Derisa takimi i Grupit Drejtues Ndërkombëtar, që do të mbahet të martën në Prishtinë, shpresohet se do të rezultojë me gjetjen e një formule të përbashkët për të ardhmen e Zyrës Civile Ndërkombëtare dhe zbatimit të mandatit që ajo ka nga Pakoja e Ahtisaarit si mbikëqyrëse e pavarësisë, dallimet esenciale mes shteteve të ndryshme të GDN-së kanë të bëjnë me përmbylljen e mandatit dhe financimin e ICO-s, shkruan Koha Ditore.

Derisa një grup shtetesh duket qartë se tashmë kanë preferenca që ICO-ja të mbyllet sa më parë-deri në fund të këtij viti apo në mars 2012, me pretendimin se “nuk ka më punë për ICO-n”, disa shtete tjera janë të mendimit se derisa synim duhet të jetë mbyllja e ICO-s, një gjë e tillë nuk duhet bërë pa i kryer disa prej punëve të mbetura- para së gjithash decentralizimi në veri, që shihet si çelësi i fillimit të integrimit të kësaj pjese problematike të Kosovës.

Ndërkohë, të gjithë duket se e kanë problem çështjen e financimit të Zyrës Civile Ndërkombëtare, e cila përkundur faktit se tashmë ka reduktuar misionin janë mbyllur të gjitha zyrat rajonale, përveç asaj në Mitrovicë, edhe më tutje paraqet barrë financiare që edhe për disa vende nuk duket edhe aq e arsyeshme, sidomos duke marrë parasysh efektet e misionit.

[Zero Cool]

Vazhdojnë çarjet në LDK





sa Mustafa dhe Fatmir Sejdiu kanë vazhduar përplasjet për zhvillimet në LDK. Sejdiu e quan të padrejtë përsëritjen e zgjedhjeve në Degën e Gjakovës. Nga disa delegatë të Këshillit të Përgjithshëm, Mustafa u akuzua për ngulfatje të reformave dhe për vendime si në kohën e komunizmit. U përmendën edhe ekspertët në thonjëza të partisë.


Lideri i Lidhjes Demokratike të Kosovës, Isa Mustafa po vazhdon të përballet Fatmir Sejdiun dhe njerëzit e tij.

Në Mbledhjen e Këshillit të Përgjithshëm të kësaj partie, të hënën, Sejdiu ka kundërshtuar përsëritjen e zgjedhjeve në Degën e Gjakovës, shkruan Express.

Sejdiu, i cili është Kryetar Nderi i LDK-së, thotë se vendimi i Kryesisë së partisë është i padrejtë. Në këtë mënyrë, ai u doli në krah zyrtarëve të LDK-së, të cilët e kishin përkrahur edhe publikisht në garën për kryetar të LDK-së, të cilën e humbi në nëntor të vitit të kaluar.

“Është një vendim i padrejtë që është marrë ndaj Degës së Gjakovës për shkak se e kam përcjellë atë proces me kohë dhe si duhet. E di se ka pasur nevojë të bëhen plotësime të arsyeshme që kanë qenë qëndrime të Degës atje”, tha ai.

Ai nuk është që udhëheqësit e Degës së “vjetër” në Gjakovë të mbesin jashtë strukturave lokale. “Është çështje e zhvillimeve të mëtejshme. Unë mendoj që është me rëndësi të ketë rezon të gjithmonshëm që të ketë unitet të përgjithshëm në aktivizim të gjithë potencialit politikë që ka LDK-ja. Dhe, ka njerëz shumë të mirë”, ka thënë Sejdiu.

[Zero Cool]

Isufi thërret për bashkim të opozitës





Nënkryetari i Aleancës për Ardhmërinë e Kosovës (AAK), Ahmet Isufi, ka thënë se në Kuvendin e Kosovës duhet të krijohet një bllok i fuqishëm opozitar, i cili do ta detyronte Qeverinë e Kosovës të bëhet më e përgjegjshme karshi qytetarëve.

“Kur janë në pyetje interesat madhore të shtetit të Kosovës kemi treguar se jemi të gatshëm t’i bashkojmë forcat. Prej konstituimit të Kuvendit AAK-ja ka luajtur rolin e iniciues së ideve së bashku me LDK-në dhe Vetëvendosje!. Kur janë në pyetje interesat e mëdha të vendit duhet të jemi bashkë. Besoj se në rastin e dialogut jemi të bashkuar. Pra, komunikimi me LDK-në dhe VV-në është i mirë dhe jemi dakorduar që për shumë interesa të bashkëpunojmë”, është shprehur Isufi.

Në një intervistë për gazetën Epoka e re, Isufi ka vlerësuar se Qeveria është duke krijuar imazh të keq për Kosovën në arenën ndërkombëtare.

“Mendoj se funksionimi më i mirë brenda institucioneve të Kosovës është elementi garantues për shtimin e numrit të njohjeve. Elemente të tjera po aq të rëndësishme janë edhe zhvillimi ekonomik, siguria më e madhe për investitorët e huaj si dhe imazhi i krijuar nga institucionet e Kosovës dhe populli i saj në arenën ndërkombëtare. Në çështjen e njohjeve kanë ndikuar edhe lajmet e këqija për Kosovën në arenën ndërkombëtare”, ka thënë Isufi.

Ai ka folur edhe për zhvillimet brenda AAK-së. Isufi ka thënë se Grupi Parlamentar i AAK-së dhe strukturat e partisë janë të bashkuara si kurrë më parë, pavarësisht mungesës fizike të liderit Ramush Haradinaj.

Isufi ka bërë me dije se AAK-ja gjatë kësaj vjeshte do ta mbajë Kuvendin Zgjedhor me ose pa Ramush Haradinaj. Ai ka deklaruar se Haradinaj do të jetë kryetar i AAK-së, pavarësisht epilogut të rigjykimit ndaj tij në Hagë. Isufi beson se Kuvendi Zgjedhor do ta fuqizojë edhe më shumë AAK-në.

[Zero Cool]

Podujevë, dhjetëra gra në histeri kolektive: Na helmoi magjia e zezë





Dhjetëra gra nga Podujeva në Kosovë, nuk rezultuan të helmuara edhe pse u paraqitën në spital me simptoma të ngjashme.
E çuditshmja është se ato kërkuan ndihmën e mjekëve për shkak të një histerie kolektive që kanë përjetuar nga magjia e zezë teksa ishin mbledhur në një aheng, e që rezultuan me alivanosje.
Mjekët kanë konstatuar në QKUK se nuk bëhet fjalë për helmim, por një shqetësim kolektiv.

[Zero Cool]

I përgjigjet EULEX-it, imuniteti s’hiqet me rezolutë





Kryetari i Kuvendit të Kosovës, Jakup Krasniqi, i ka drejtuar një letër misionit evropian për sundimin e ligjit, EULEX, ku i është përgjigjur kërkesës së këtij misioni në lidhje me fillimin e procedurave për heqjen e imunitetit të disa deputetëve, ndaj të cilëve po zhvillohen hetime.

Përmes kësaj letre, Krasniqi i ka thënë shefit të EULEX-it, Xavier Bout de Marnhac, se nuk është përgjegjësi e Kuvendit që të merret me çështjen e imunitetit. Andaj, ai i ka sugjeruar EULEX-it që, bazuar në Kushtetutën e Kosovës, Qeveria vetë mund të kërkojë nga Gjykata Kushtetuese interpretim për imunitetin e deputetit.

“Në rastin konkret, do të ishte normale që Qeveria, e cila ka shprehur interes për një rezolutë të tillë, ta paraqesë këtë iniciativë në Kuvend dhe Kryesia e Kuvendit do ta trajtojë atë sipas rregullores së Kuvendit”, thuhet letrën e Krasniqit.

Në këtë letër, Krasniqi ka theksuar se nuk ka nevojë të miratohet një rezolutë në Kuvend, kur Qeveria me Kushtetutë i ka të përcaktuara të drejtat e saj në këtë drejtim.

“Është shqetësuese të vërejmë që Qeveria kërkon një akt jodetyrues si rezoluta që të ushtrojë një funksion të saj kushtetues. Nëse do të ishte nevoja e një rezolute të Kuvendit për ta vënë në lëvizje Qeverinë, që kjo e fundit ta vërë në lëvizje Gjykatën Kushtetuese, Kushtetuta do ta kishte përcaktuar një gjë të tillë. Për mendimin tonë, një rezolutë e tillë do të ishte në vetvete një akt antikushtetues, sepse do të shkelte të drejtën e Qeverisë për ta përdorur paragrafin 10 të nenit 93 në lirinë dhe diskrecionin e saj të plotë”, thuhet në letrën e Krasniqit.

Kjo letër ka marrë mbështetjen e Kryesisë së Kuvendit, përveç lëvizjes Vetëvendosje, e cila ka vlerësuar se nuk ka nevojë t’i njihet EULEX-it kjo e drejtë që e ka kërkuar. Ndërkohë, kryeministri, Hashim Thaçi nuk ka dashur ta komentojë kërkesën e EULEX-it lidhur me shqyrtimin e imunitetit të deputetëve të Kuvendit të Kosovës, të cilët janë nën hetime. Ai ka thënë se ende në zyrën e tij nuk ka shkuar ndonjë dokument zyrtar për këtë çështje, prandaj nuk dëshiron të komentojë.

[Zero Cool]

Mbikëqyrjes po i vije fundi





Kryeministri i Qeverisë së Republikës së Kosovës, Hashim Thaçi ka shtruar një drekë pune për ambasadorët e shteteve anëtare të Grupit Ndërkombëtar Drejtues. Në këtë drekë për ambasadorët e vendeve që e kanë njohur Kosovën, ka marr pjesë edhe ndërmjetësi i Bashkimit Evropian në dialogun në mes të Prishtinës dhe Beogradit, Robert Cooper dhe përfaqësuesi i BE-së në Kosovë, Fernando Gentilini.

“Unë e falënderojë z. Piter Faith për bashkëpunimin e shkëlqyeshëm që kemi pasur mes Qeverisë dhe Zyrës Civile Ndërkombëtare. Edhe në takimin e sotëm të Grupit Drejtues Ndërkombëtar, kamë prezantuar qëndrimet e Qeverisë së Republikës së Kosovës. Takim ka qenë shumë korrektë, shumë konstruktiv dhe mbështetës në procesin e konsolidimit dhe forcimit të shtetit të Kosovës”, ka thënë kryeministri përpara mediave.

“Qeveria e Kosovës do të vazhdojë me qeverisjen e mirë, efektive dhe efikase, sundimin e ligjit, qeverisjen transparente dhe me një ballafaqim të drejtpërdrejtë me të gjitha dukuritë negative. Do të vazhdojmë reformat e thella demokratike që duhet të përfshijnë vendin, reforma këto që do ta përshpejtojnë procesin e integrimit të Kosovës në strukturat e NATO-së e Bashkimit Evropian”.

“Tash kur jemi në prag të nxjerrjes së Raportit të Progresit, Kosova besojë se e meriton liberalizimin e vizave, marrëdhëniet kontraktuale dhe marrëdhëniet tregtare me Bashkimin Evropian. Kosova do të vazhdojë të ndërtojë raporte të shkëlqyeshme me të gjitha vendet e rajonit, dhe në kuadër të saj edhe në kuadër të përgjegjësive kushtetuese dhe ligjore edhe të dialogimit me Serbinë”.

“Është hera e parë që Kosova si shtet takohet në nivel të barabartë me përfaqësuesit e Serbisë. Tri konkluzione të cilat kanë dalë deri më tani, konkluzione këto që ndërlidhen drejtë për së drejti me jetën e qytetarëve dhe dy vendeve dhe popujve tanë”.

“Gjithashtu është shumë me rëndësi të theksojë se Qeveria e Kosovës është duke punuar ngushtë me z. Faith dhe me ICO-në në procesin e përmbylljes së pavarësisë së mbikëqyrur. Ne veç kemi përmbyllur mbi 90 për qind të kërkesave nga dokumenti i Presidentit Ahtisaari. Do të vazhdojmë të punojmë bashkërisht edhe në agjendën e mbetur shtesë, pra të asaj që ka mbetur për të përmbyllur”, ka thënë ndër të tjera kryeministri.

[Zero Cool]

Oto fon Habsburg, dikur u bojkotua, dje u nderua


Prishtinë, 12 korrik 2011 - Ministri i Punëve të Jashtme të Republikës së Kosovës, Enver Hoxhaj, dje mori pjesë në ceremonitë mortore për t'i dhënë nderimet e fundit pinjollit të familjes së fundit perandorake austro hungareze, Oto fon Habsburg, një mik i madh i shqiptarëve dhe i Kosovës, i cili vdiq më 4 korrik. Ishte ky një gjest i mirë dhe i duhur institucional. Madje Hoxhaj citohej të ketë folur me pietet, ashtu siç e meritonte i ndjeri Fon Habsburg. Por, duhet të kthehemi prapa për shtatë vjet, kur Partia Demokratike e Kosovës, së cilës i takon ministri Hoxhaj, bojkotoi një vizitë të Oto fon Habsburgut në shtator të vitit 2004. Ndonëse ishin në koalicion qeverisës me LDK-në, deputetët e PDK-së, bashkë me ata të AAK-së dhe të koalicionit serb Kthimi, për arsye që nuk u bënë të ditura, injoruan dhe bojkotuan seancën solemne të Kuvendit të Kosovës (18 shtator 2004) në të cilën foli Oto Fon Habsburg, atëbotë kryetar i Unionit Panevropian dhe eurodeputet shumëvjeçar. Fon Habsburg, atëherë 92 vjeçar, mbajti një fjalim inspirativ rreth dyzet minuta, në anglisht, pa lexuar. U prit me ovacione fjalimi i tij, por mbeti shija e hidhur për bojkotimin e kësaj seance nga ana e deputetëve të PDK-së dhe AAK-së, ndonëse fare nuk habiti bojkoti i Kthimit. Mes tjerash Fon Habsburg kërkoi që Kosova të bëhet e pavarur. Gjatë asaj vizite Presidenti i Kosovës Ibrahim Rugova i dorëzoi kryetarit të Unionini Panevropaian "Medaljen e Artë të Lirisë", me të cilin e kishte dekoruar me rastin e 5-vjetorit të çlirimit të Kosovës. Gjatë vizitës Fon Habsburg, bashkë me Presidentin Rugova, do të vendosin kurora lulesh para monumentit të Skënderbeut në Prishtinë si dhe do të vizitojnë Kompleksin e Lidhjes Shqiptare të Prizrenit. Pra ishte viti 2004, dhe vetëm katër muaj muaj më parë kishin ndodhur trazirat e njohura të marsit dhe dihen imazhet e këqija që shkonin në botë nga Kosova. Të rrallë ishin miqtë që na vinin në vizitë... Ç'është e vërteta, AAK pas një kohe do ta përmirësojë gabimin e vet. Gjatë vizitës së fundit të Oto fon Habsburgut në Kosovë në vitin 2007, në nderim të figurës së tij me propozim të AAK, komuna e Deçanit do ta emërtojë një rrugë me emrin e Oto fon Habsburgut.

[Zero Cool]

Dell Jakupit: Po i mbron miqtë e tu







Ambasadori amerikan, Christopher Dell del kundër Jakup Krasniqit, dhe qëndrimit të tij kundër heqjes së imunitetit të deputetëve nën hetime. Nëpërmjet Zërit të Amerikës Dell i ka çuar selam Krasniqit se me këtë akt po e sfidon komunitetin ndërkombëtare, dhe se SHBA do të rishqyrtojë partneritetin me të, në rast se nuk ndryshon qëndrim.

Në një intervistë ekskluzive për Zërin e Amerikës, ambasadori Dell tha se "me këtë qëndrim, kryetari i Parlamentit, Jakup Krasniqi ka zgjedhur të sfidojë komunitetin ndërkombëtar, të sfidojë miqtë më të mirë të Kosovës në emër të mbrojtjes së një apo dy miqve të tij. Përderisa zoti Krasniqi nuk dëshmon ndjenjë më të lartë të përgjegjesisë për të zgjidhur shumë probleme që ka pasur deri tash, do të jetë e pamundur për Shtetet e Bashkuara që të vazhdojnë të punojnë me të si partner”, ka thënë Dell në Ditarin që transmetohet nesër.

Kryeparlamentari Krasniqi ia ktheu letrën EULEX-it duke thënë se nuk është përgjegjësi e Parlamenti të merret me çështjen e imunitetit dhe se në bazë të Kushtetutës, qeveria mund të kërkojë nga Gjykata Kushtetuese interpretim për imunitetin e deputetëve.

[Zero Cool]

Hoxhaj kërkon Udhërrëfyesin për vizat


Ministri i Punëve të Jashtme i Republikës së Kosovës, Enver Hoxhaj, duke iu drejtuar Komisionit për Politikë të Jashtme të Parlamentit Evropian, ka kërkuar nga Brukseli që Kosova të mos mbetet një shtet i harruar në zemër të Evropës.


Në ditën e parë të vizitës në Bruksel, Hoxhaj, ka zhvilluar takime me përfaqësues të lartë të institucioneve të BE-së, si dhe i është drejtuar me një fjalim Komisionit për Politikë të Jashtme të PE-së, ndërsa ka kërkuar Udhërrëfyesin për liberalizimin e vizave dhe vendosjen e marrëdhënieve kontraktuale të Kosovës me BE-në.

"Nëse brenda këtij viti ne nuk do të marrim udhërrëfyesin për liberalizimin e vizave, ky do të ishte mesazhi më negativ për qytetarët e Kosovës. Ne jemi qytetarët e vetëm në rajon që nuk kemi të drejtën e lëvizjes pa viza në Evropë. Do të ishte shumë keq nëse përçohet mesazhi se kosovarët janë popull i harruar. Prandaj, ne kërkojmë udhërrëfyesin për liberalizimin e vizave, në mënyrë që të vazhdojmë përmbushjen e standardeve evropiane”, ka thënë Hoxhaj, gjatë fjalimit para eurodeputetëve, duke kërkuar po ashtu që Kosova të ketë marrëdhënie kontraktuale, marrëdhënie tregtare me Bashkimin Evropian.

Ndërkaq, në takimin me raportuesen për Kosovën në Parlamentin Evropian, Ulrike Lunacek është diskutuar për mënyrat e përmbushjes sa më të shpejtë të kritereve për liberalizimin e vizave, duke u pajtuar se Kosova duhet të marrë gjatë këtij viti, udhërrëfyesin dhe të vendos marrëdhënie kontraktuale me BE-në.

Hoxhaj gjatë ditës është takuar edhe me kryesuesin e delegacionit të PE-së në marrëdhëniet me Shqipërinë, Kosovën, Bosnjën dhe Hercegovinën, Malin e Zi dhe Serbinë, Eduard Kukan.

Me këtë rast, Kukan ka thënë se Kosova ka perspektivë evropiane, duke shtuar se Kosova duhet të ketë trajtimin e njëjtë me shtete tjera të rajonit edhe sa i përket liberalizimit të vizave.

“Pajtohem që qytetarët e Kosovës nuk po trajtohen njëjtë si qytetarët e tjerë të Ballkanit, sa i takon procesit të liberalizimit të vizave. Në këtë aspekt, BE-ja duhet të bëjë më shumë. I bëjmë thirrje Komisionit Evropian që mos të humbas kohë, por të fillojë dialogun për procesin e liberalizimit të vizave me Kosovën dhe të jap udhërrëfyesin për këtë proces”, tha Kukan.

Hoxhaj ka pasur një drekë punë edhe me Pierre Mirel, drejtor për Ballkanin Perëndimor në KE, gjatë të cilës është diskutuar për çështje konkrete që lidhen me proceset integruese të Kosovës në strukturat e Bashkimit Evropian, duke përfshirë edhe procesin e liberalizimit të vizave për qytetarët e Kosovës.

[Zero Cool]

PETICION NË MBËSHTETJET TË RAMUSH HARADINAJT





Rreth 300 personalitete nga fusha akademike kanë nënshkruar një peticion në mbështetjet të kryetarit të AAK-së, Ramush Haradinaj. ...



Peticioni do t’i dorëzohet presidentit të Tribunalit të Hagës Patrick Robinson dhe në të do të shprehet besimi ndaj pafajësisë së Haradinajt dhe bashkëluftëtarëve të tij. Gjykimi i pjesshëm i Ramush Haradinajt do të fillojë në muajin gusht.

[Zero Cool]

Zyrtarët komunalë vodhën peshqirët e hotelit





Një delegacion i komunës së Gjilanit në muajin maj kishte udhëtuar për në Durrës dhe ditën e kthimit, posa kanë hipur në autobusë për t’u nisur drejt Kosovës, janë ndalur nga personeli i sigurimit të hotelit. Ata kanë kërkuar që t’i hapin valixhet zyrtarët komunalë, dikush kishte lajmëruar se ky delegacion kishte vjedhur peshqirët e hotelit.


Kështu, sigurimi gjen se vjedhja ishte kryer dhe kthen prapa peshqirët në hotel. Ky udhëtim ishte organizuar nën patronazhin e kryetarit të kësaj komune, Qemaj Mustafa, i cili e pranon se ka dëgjuar në një debat publik se ka ndodhur një rast i tillë.

Mirëpo, ai ka thënë për gazetën Zëri se deri tani askush nuk e ka njoftuar zyrtarisht për këtë rast.

“Po të më vijë me shkrim se një gjë e tillë ka ndodhur, unë këtë rast do ta dënoj shumë rëndë, kushdoqoftë që ka tentuar ta bëjë një gjë të tillë”, ka thënë Mustafa.

Selver Xhelili, drejtor i Rinisë, Kulturës dhe Sportit në komunën e Gjilanit, e pranon të ketë ndodhur ky rast, i cili është edhe vëllai i pronarit të hotelit ku ka qëndruar ky delegacion. Ai thotë se nuk ka qenë prezent gjatë këtij problemi, dhe se nuk di më shumë lidhur me këtë gjë, përveçse janë konfiskuar peshqirët që kanë tentuar të vidhen.

“Ato tentime për vjedhje nuk e di a kanë qenë të qëllimshme apo jo, por sipas mendimit tim mund të jenë edhe të paqëllimshme. Duke marrë valixhet kanë mundur t’i ngatërrojnë, ndërsa kontraktori ka kërkuar mirëkuptim për ndonjë ngatërresë, ku janë kthyer peshqirët dhe gjithçka ka vazhduar në rregull më pas”, ka thënë ai.

Xhelili ka thënë se nga komuna është kontraktuar kompania e autobusëve “Merkatori”, e cila ka dërguar stafin e komunës së Gjilanit në hotelin e vëllait të tij.



muhahahahhahaha gjilani :P

[Zero Cool]

Rasti Haradinaj: Dëshmitarët kryesorë nuk dëshmojnë






Në dokumentin përmbledhës të para seancave gjyqësore të paraqitur nga mbrojtja e Haradinajt, bëhet e ditur se dy dëshmitarët kryesor, Shefqet Kabashi dhe Dëshmitari 80 sërish do të refuzojnë të dëshmojnë kundër Haradinajt, njofton radio Dukagjini. Nga ana tjetër, avokati mbrojtës Michael O’Reilly thekson se për shkak të procedurave i gjithë procesi ndaj Haradinajt mund të zgjas disa muaj.


Në pjesën hyrëse të dokumentit përmbledhës të para seancave gjyqësore të paraqitur nga mbrojtja e Haradinajt, thuhet se prokuroria ka kërkuar që të thirren dy dëshmitarë të cilët kanë qenë të ftuar të dëshmojnë edhe më parë, Shefqet Kabashi dhe Dëshmitari 80.

Mirëpo, që të dy këta refuzuan që të dëshmojnë në gjykim, ndërkohë që kanë deklaruar se do të refuzojnë edhe në rigjykim. Një gjë të tillë e konfirmon edhe avokati mbrojtës i Haradinajt, Michael O’Reilly.

“Dëshmitari i mbrojtur 80 është kontradiktor në shumë çështje, madje edhe në çështjet kyçe. Dëshmia e tij ka shenja të dallueshme trillimi. Për më tepër Dëshmitari 81, i cili sipas prokurorisë plotëson atë çfarë ka deklaruar dëshmitari 80, por e gjithë kjo ka efekt të kundërt. Dëshmia e tij dallon në aspektin faktik nga versioni që ka deponuar dëshmitari i ri i mbrojtur i quajtur 81, dhe kështu provat që ata përmendin bien në kundërshti me njëra tjetrën”, thuhet në këtë dokument.

Po ashtu në një deponim gojor të mëvonshëm, Dëshmitari 81 tërhoqi pjesë të rëndësishme të deklaratës së tij të parë dhe ka bërë një varg ndryshimesh nga ato që i ka thënë më herët.

Sipas mbrojtjes kjo dëshmi duhet refuzuar. “Kjo dëshmi nuk është e sigurt dhe në asnjë mënyrë nuk e bënë z. Haradinaj përgjegjës për krimet e supozuara në Jabllanicë”, thuhet në dokumentin përmbledhës.

Prokuroria poashtu kërkon që të përfshihen edhe dëshmitarët e tjerë të mbrojtur siç janë Dëshmitari 75 dhe 76 që deklarojnë se kanë qenë prezent në Jabllanicë, por asnjëri prej tyre nuk e ka parë Haradinajn në Jabllanicë dhe dëshmitë e tyre mund të konsiderohen të vjetruara.

Ndryshe, thuhet se i mbetet dhomës së apelit të vendos se cilët dëshmitar janë të pranueshëm e cilët jo, madje kjo edhe mund ta zgjas procesin ndaj Haradinajt në përgjithësi.

“Mendoj se do të zgjas disa muaj. Saktësisht procesi në gjykatë do të zgjasë vetëm disa javë por do të duhen disa muaj që të përfundojnë të gjitha procedurat”, ka thënë avokati.

[Zero Cool]

Daci dënohet “sa për sy e faqe”





Gjykata Supreme e ka vërtetuar dënimin ndaj ish kryetarit të Kuvendit të Kosovës, Nexhat Dacit për shpërdorim të detyrës si dhe dënimet e shqiptuara.

Bëhet e ditur se një trup gjykues i përzier me dy gjykatës kosovar dhe një të EULEX-it në Gjykatën Supreme, në aktvendimin e tyre lidhur me ankesën e parashtruar, kryesisht e kanë konfirmuar, ndërsa e kanë ndryshuar pjesërisht vendimin e shkallës së parë të Gjykatës së Qarkut në Prishtinë kundër Nexhat Dacit dhe Ahmet Alishanit të datës 10 nëntor 2010.

“Gjykata Supreme e vërtetoi dënimin e Nexhat Dacit për shpërdorim të detyrës si dhe dënimet e shqiptuara”, thuhet në njoftimin e EULEX-it.

Më tej pohohet se “Gjykata supreme e ka modifikuar aktgjykimin e shkallës së parë vetëm për arsye formale për sa i përket kontributit të Ahmet Alishanit, dhe i ka rishkruar pjesët përkatëse të dispozitivit, deri sa u vërtetua cilësimi i kontributit të Ahmet Alishanit si ndihmë në shpërdorim të detyrës të kryer nga Nexhat Daci. Po ashtu, Gjykata Supreme i urdhëroi të pandehurit që bashkërisht t’ia kompensojnë Kuvendit shumën prej 1.540 euro për dëmin e shkaktuar me këto vepra penale. Ndalimi për Nexhat Dacin që të ushtrojë funksione publike u anulua”.

Rasti kishte të bënte me blerje të pasurisë dhe shërbimeve me urdhër të Nexhat Dacit e që u paguan nga buxheti i Kuvendit të Kosovës, kurse u përdorën privatisht. Nexhat Daci në atë kohë ishte kryetar i Kuvendit, kurse Ahmet Alishani ishte këshilltar për Siguri i Kryetarit të Kuvendit.

Gjykata e Qarkut në vitin 2010 e shpalli Nexhat Dacin fajtor për shpërdorim të detyrës dhe e dënoi me një vit e 6 muaj burgim. Ahmet Alishani kishte ndihmuar në këtë vepër penale dhe u dënua me 6 muaj burgim.

Të dyja dënimet u patën pezulluar për një periudhë verifikimi prej 2 vitesh. Përveç kësaj, gjykata e kishte shqiptuar ndalimin e ushtrimit të funksionit publik për dy vite pas vuajtjes së dënimit.

Ky aktgjykim lidhur me ankesën është shpallur më 13 korrik 2011. Aktgjykimi i Gjykatës Supreme është përfundimtar. Kundër këtij vendimi nuk ka ndonjë masë ligjore.

[Zero Cool]