Gazeta elektronike sportive: "FUTBOLLI

[Mendjen]

Juventus i interesuar për Saviolan

Juventus thuhet se është i interesuar në sulmuesin e Real Madridit, Javier Saviola, i cili mund të largohet nga klubi spanjoll gjatë afatit kalimtar të verës.
27-vjeçari arriti në Bernabeu verën e kaluar nga Barcelona, duke shpresuar se do të jetë pjesë e formacionit startues të trajnerit Bernd Schuster, por arriti të sigurojë vend të qëndrueshëm në formacionin bazë dhe pritet të largohet gjatë verës, për një shumë më të vogël të parave.

Kjo mund të jetë në interes të biankonerëve, të cilët aktualisht janë në betejë me Real Madridin për të fituar shërbimet e mesfushorit brazilian të Werder Bremenit, Diego, por që ky i fundit duket se është më i interesuar të kalojë në Spanjë.

Kjo mund të jetë një rast që Saviola të transferohet në Itali, me qëllim që bardhezinjtë të zgjidhin problemin në sulm, si dhe të heqin dorë nga interesimi për brazilianin. Saviola do t’i kushtonte Juventusit, jo më pak se 4.5 milionë euro.

[Mendjen]

Chelsea fiton ndaj Arsenalit dhe ngjitet në pozitën e dytë

Didier Drogba ka shënuar dy gola për t’i sjellë fitoren prej 2-1 Chelseat në derbin ndaj Arsenalit të luajtur në Stamford Bridge, fitore që e ngrit ekipin e drejtuar nga trajneri Avram Grant në vendin e dytë të tabelës së Premierligës.
Pas një pjese të parë pa gola, topçinjtë kaluan të parët në epërsi në pjesë të dytë me golin e shënuar nga Bacary Sagna (58’), por Chelsea arriti të rikthehet dhe të fitojë falë dy golave të sulmuesit Didier Drogba (72’ dhe 81’).

Kjo fitore e ngrit Chelsean në pozitën e dytë me 68 pikë, derisa Arsenali, që pas katër barazimeve pëson humbje, e dyta për këtë sezon, zbret në vendin e tretë me një pikë më pak (67).

Manchester United, që më herët shënoi fitore ndaj Liverpoolit, kryeson tabelën e Premierligës me 73 pikë, pesë më shumë se Chelsea, derisa Arsenali mbetet gjashtë pikë prapa.

[Mendjen]

Benitez: Përjashtimi i Mascheranos na solli humbjen

Menaxheri i Liverpoolit, Rafael Benitez, ka shfaqur zhgënjimin për humbjen e ekipit të tij nga Manchester United, në ndeshjen e sotme të luajtur në Old Trafford, duke fajësuar kartonin e kuq për humbjen e të kuqve.
Manchester United fitoi me rezultat 3-0 derbin ndaj Liverpoolit, me golat e shënuar nga Wes Brown (34’), Cristiano Ronaldo (79’) dhe Nani (80’). Nga fundi i pjesës së parë (44’), Liverpool luajti me 10 lojtarë, pas përjashtimit të padrejtë të Javier Mascheranos.

“Çdokush mund të shihte dy ndeshje të ndryshme: para dhe pas përjashtimit. Kishte një diferencë të madhe. Ne kishim shanset tona, kornerët, dhe kemi sulmuar dhe luajtëm me kundërsulme, ishim të koncentruar në gol, por pasi që mbetëm me dhjetë lojtar, ishte një lojë ndryshe”, ka thënë Benitez.

“Askush nuk e kuptoi atë, sepse lojtari kërkonte çfarë ndodhi dhe referi tregoi kartonin e dytë të verdhë. Lojtari vërtet ishte i befasuar. Çdokush e din se ai është profesionist dhe shumë i sinqertë, andaj ai na thoshte neve, ‘pse’?”, ka shtuar trajneri i Liverpoolit.

[Mendjen]

Real humbet, Barcelona fiton thellë

Valencia ka ruajtur të hapur garën për titullin në La Liga, pas fitores prej 3-2 ndaj Real Madridit, ndeshje e luajtur në Santiago Bernabeu, derisa Barcelona ka shënuar fitore prej 4-1 ndaj Valladolid.
Kapiteni i Realit, Raul Gonzalez, ka shkëlqyer duke shënuar dy herë për Realin (35’ dhe 56’), por dygolësh ka shënuar edhe lojtari kundërshtar, David Villa (33’ dhe 67’), para se Arizmendi të shënonte golin e fitores për Valencian, dy minuta para fundit të kohës së rregullt të ndeshjes.

Valencia që eliminoi Barcelonën nga Kupa e Spanjës në mesjavë, kësaj here i ka dhënë një “dhuratë” ekipit të udhëhequr nga trajneri Frank Rijkaard, duke e mbajtur garën për titullin e Spanjës të hapur.

Barcelona, fitoi bindshëm si vendas ndaj Valladolin, falë golave të shënuar nga Samuel Eto'o (24’), Andres Iniesta (47’) dhe një dygolëshi të Bojan Krkic (62’ dhe 83’), derisa golin e vetëm të mysafirëve e shënoi Gonzalez nga penaltia (31’).

Real Madrid tash kryeson në La Liga me 62 pikë, vetëm katër më shumë se Barcelona, që mban 58 pikë. Villarreal që ka shënuar fitore 2-1 në fushë të Levantres, gjendet në pozitën e tretë me 56 pikë.

[Mendjen]

Trezeguet: Del Piero duhet të luajë për Italinë

Golashënuesi i Juventusit, David Trezeguet, ka deklaruar se bashkëlojtari i tij Alessandro Del Piero meriton të jetë pjesë e ekipit kombëtar të Italisë.
Gjasat që Del Piero të merr pjesë në Euro 2008 janë të vogla, derisa ai është lënë anash edhe për ndeshjen miqësore që Italia e zhvillon të mërkurën me Spanjën. Kjo është hera e fundit që italianët do të luajnë para se Donadoni të emërtojë 23 lojtarët të cilët do t’i marrë në Kampionatin Evropian që zhvillohet në Austri dhe Zvicër gjatë kësaj vere.

“Mendoj se ai ka luajtur një ndeshje të shkëlqyeshme. Ai i shkaktoi shumë presion Marco Materazzit dhe mendoj se meriton vendin në ekipin kombëtar, por ndoshta unë nuk jam personi më i mirë për ta vlerësuar këtë. Por ai ka dëshmuar se është një lojtar i shkëlqyeshëm për ne”, ka thënë sulmuesi francez.

Trezeguet, ndërkaq, ka pranuar një ftesë befasuese për Francën për dy ndeshjet e ardhshme kundër Malit dhe Anglisë. 30-vjeçari nuk është parë sy më sy me trajnerin Raymond Domenech, por ka pranuar një thirrje të vonshme telefonike pas lëndimit të yllit të Lyonit, Karim Benzema.