Ndryshime te Tarifave Doganore.

[Era1]

LIGJ

Nr.9715, datë 16.4.2007



PËR DISA SHTESA DHE NDRYSHIME NË LIGJIN NR.9461, DATË 21.12.2005 “PËR NOMENKLATURËN E MALLRAVE DHE TARIFËN DOGANORE”

Në mbështetje të neneve 78, 83 pika 1 dhe 155 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË



VENDOSI:

Në ligjin nr.9461, datë 21.12.2005 “Për nomenklaturën e mallrave dhe tarifën doganore”, bëhen këto shtesa e ndryshime:

Neni 1

Në titull, pas fjalës “tarifën” shtohet fjala “e integruar”.

Neni 2

Në nenin 1 bëhen ndryshimet dhe shtesat e mëposhtme:

a) Në pikën 1 fjalët “Këshilli i Ministrave miraton një nomenklaturë mallrash” zëvendësohen me fjalët “Këshilli i Ministrave miraton publikimin zyrtar të nomenklaturës”.

b) Në paragrafin e parë të pikës 3 fjalët “të nxjerrë vendimin përkatës për përditësimin e” zëvendësohen me fjalët “të miratojë botimin e përditësimit të”.

c) Në paragrafin e dytë të pikës 3 fjalët “Vendimi i Këshillit të Ministrave” zëvendësohen me fjalët “Botimi i miratuar nga Këshilli i Ministrave”.

Neni 3

Në nenin 2 fjalët “Këshilli i Ministrave miraton” zëvendësohen me fjalët “Këshilli i Ministrave publikon”.

Neni 4

Në pikën 1 të nenit 5 fjalët “për të cilin bën fjalë neni 28 i Kodit Doganor” zëvendësohen me fjalët “sipas përcaktimit të dhënë në nenin 28 të Kodit Doganor”.

Neni 5

Në nenin 7 bëhen ndryshimet dhe shtesat e mëposhtme:

a) Në fjalinë e parë të paragrafit të parë, fjala “miratohet” zëvendësohet me fjalët “publikohet një herë në vit”.

b) Në fjalinë e tretë të paragrafit të parë fjalët “përditësohet” dhe “çdo vit” shfuqizohen.

c) Në paragrafin e dytë, fjalët “dhe Drejtorinë e Përgjithshme të Doganave, ndërmerr, ndër të tjera, dhe këto hapa:” zëvendësohen me fjalët “bashkërendon punën për:”.

ç) Pas paragrafit të dytë shtohet një paragraf me këtë përmbajtje:

“Drejtoria e Përgjithshme e Doganave shërben si sekretari teknike e Komitetit të Nomenklaturës së Mallrave.”.

Neni 6

Neni 8 ndryshohet si më poshtë:

“Neni 8

Komiteti i Nomenklaturës së Mallrave kryesohet nga Ministri i Financave dhe ka në përbërje:

- Ministrin e Ekonomisë, Tregtisë dhe Energjetikës;

- Ministrin e Bujqësisë, Ushqimit dhe Mbrojtjes së Konsumatorit;

- Drejtorin e Përgjithshëm të INSTAT-it;

- Kryetarin e Dhomës së Tregtisë dhe Industrisë.

Këshilli i Ministrave miraton rregulloren e funksionimit të këtij komiteti.”.

Neni 7

Në nenin 10 bëhen ndryshimet e mëposhtme:

a) Në shkronjën “a” të pikës 1 fjala “zbatimin” zëvendësohet me fjalën “hartimin”.

b) Paragrafi i parë i pikës 2 ndryshohet si më poshtë:

“Hartimi i nomenklaturës bëhet në përputhje me:”.

Neni 8

Paragrafi i dytë i nenit 11 shfuqizohet.

Neni 9

Në nenin 12 bëhen shtesat dhe ndryshimet e mëposhtme:

a) Në paragrafin e parë, pas fjalëve “Këshilli i Ministrave” shtohen fjalët “brenda janarit”.

b) Paragrafi i dytë dhe i tretë shfuqizohen.

c) Pas paragrafit të parë shtohen dy paragrafë me këtë përmbajtje:

“Drejtoria e Përgjithshme e Doganave zhvillon procedurat për riprodhimin e versionit të plotë të Nomenklaturës së Mallrave, në përputhje me legjislacionin në fuqi.

Fondet për riprodhimin dhe procedurat e përcaktuara në paragrafin e dytë të këtij neni mbulohen nga Drejtoria e Përgjithshme e Doganave.”.

Neni 10

Ky ligj hyn në fuqi 15 ditë pas botimit në Fletoren Zyrtare.



Shpallur me dekretin nr.5290, datë 8.5.2007 të Presidentit të Republikës së Shqipërisë, Alfred Moisiu