Skënder luarasi

[petrol]

Uollt Uitman, Fije Bari (Walt Whitman: Leaves of Grass)
Shqipëroi nga origjinali: Skënder Luarasi (Translated by: Skender Luarasi)

SIKUR TË MATESHA DOT

Sikur të matesha dot me fuqinë e bardëve të mëdhenj,
Të skalitja tiparet e bukur e madhështorë,
Të thërrisja në duel Omerin me gjithë luftrat e luftëtarët -
Akilin, Ajaksin, Hektorin,
Të vizatoja si Shekspiri Hamletin, Lirin, Otellon të mbërthyer
në prangat e vuajtjes tronditëse,
Ose si Alfred Tenisoni të këndoja bukuroshet leshverdha,
Po të zotëroja mjeshtërinë e vargut
Dhe ritmin e përsosur - ëmbëlsinë e këngëtarëve -
Të gjitha këto së bashku, o det, unë do t’i falja me gëzim,
Po të doje ti të më kumtoje lëkundjen e njëzë vale, një teke
të saj vetëm,
Ose t’a frynte vala vargun tim me frymën e saj të njomë,
Duke i dhënë vjershës aromën detare.

PAQTIM

Fjala për mbi gjithë fjalët, e bukur posi vetë qielli,
Sa bukur qe lufta dhe gjithë puna e saj e gjaktë një ditë do të zhduket fare,
Që duart e motrave Vdekje e Natë të mos e lajnë vazhdimisht këtë dhé të njollosur;
Se armiku im vdiq, njeriu hyjnor si dhe unë, vdiq;
Vështroj ku dergjet me fytyrë të zbehtë dhe i qetë në qivur - i afrohem,
Krrusem dhe ia prek lehtë me buzët e mia ballin e bardhë në qivur.