Depresioni i baballareve ndikon te foshnjat meshkuj

[ARVANITI]

Depresioni i baballareve ndikon te foshnjat meshkuj


Megjithëse rastet e depresionit pas lindjes prekin zakonisht nënat, studiuesit besojnë që ky fenomen vërehet edhe te baballarët dhe kjo mund të ndikojë në sjelljen e fëmijës gjatë viteve të para të jetës, njoftuan sot një grup shkenctarësh britanikë. Sipas studiuesve foshnjat meshkuj ndikohen më së shumti nga gjendja e depresionit të baballarëve të tyre dhe kanë dy herë më shumë probleme sjelljeje në vitet e para të jetës krahasuar me fëmijët e tjerë. "Zbulimi ynë tregon se depresioni atëror ka një efekt të veçantë dhe të vazhdueshëm të dëmshëm në sjelljen dhe zhvillimin emocional të fëmijëve të tyre në fazat e para të jetës", deklaroi Dr. Paul Ramchandani nga Universiteti i Oksfordit. Në një raport të publikuar në gazetën mjeksore "The Lancet" thuhet që Ramchandani me ekipin e tij studiuan sjelljen dhe shëndetin mendor të 12 800 çifteve gjatë pak javëve të para pas lindjes së fëmijëve të tyre dhe pak kohë para se fëmijët të mbusnin dy vjeç. Gjithashtu ekipi shkencor studioi zhvillimin emocional dhe sjelljen e fëmijëve kur ata ishin tre vjeç nëpërmjet plotësimit të një pyetësori nga nënat e tyre.

"Lidhja midis zhvillimit emocional të djemve dhe depresionit që vuajnë baballarët e tyre është shumë i dukshëm", deklaroi Ramchandani. "Ndoshta në veçanti djemtë janë më të ndjeshëm ndaj efekteve të kujdesit prindëror nga baballarët për arsye të një lidhje të ndryshme midis babait dhe djalit", shtoi ai. Depresioni i prindërve pas lindjes së fëmijëve është një fenomen i njohur që prek rreth 13 për qind të nënave të reja. Simtomat e saj variojnë nga të mesme deri te më të rëndat. Një studim i mëparshëm kishte zbuluar se tre për qind e baballarëve shfaqnin shenja të depresionit pas lindjes së fëmijës së tyre. "Ndikimi i baballarëve në vitet e para të jetës së fëmijëve nuk është konsideruar i rëndësishëm në të kaluarën", theksoi Ramchandani. "Megjithëse studimi ynë duhet të vertetohet plotësisht dhe të zgjerohet me hulumtime të tjera, ne besojmë se gjendja e depresionit te të dy prindërit pas lindjes së fëmijës duhet të trajtohet seriozisht", shtoi ai.




****