Lajme nga ekonomia vendore dhe e jashtme !

[Zero Cool]

Turkish Airlines blenë Montenegro Airlines





10:47 / 15.09.2011
Qeveria e Malit të Zi bënë gati terrenin për privatizimin e kompanisë Montenegro Airlines, kurse tenderi do të shpallet shpejt. Ndërkaq, Turkish Airlines ka shprehur disponim që të zgjeroj afarizmin në Ballkan. Një tender para një viti kishte dështuar për shkak se askush nuk kishte dhënë ofertë.


Ende nuk është precizuar se qëndrimi i rabinit izraelit Jon Metzger në Mal të Zi është e ndërlidhur me shpalljen e tenderit, meqenëse kompania izraelite "El Al" ka shfaqur interes për te. Në tenderin e fundit ajo ka tërhequr dokumentacionin, sikurse edhe Arkia Airlines dhe Etihada nga Emiratet e Bashkuara Arabe dhe Innuenda nga Qipro, shkruan gazeta e Beogradit Novosti .

Për kompania malazeze është e interesuara edhe kompania ajrore Turkish Airlines,e cila është në ekspansion në Ballkan dhe ka në pronësi shumicën e aksioneve të kompanisë së Bosnjës.

Pas informatave jozyrtare,pas tërheqjes nga tenderi për JAT-in serb, në Turkish Airlines janë orientuar kah Podgorica. Sipas të dhënave nga faqja e saj e internetit vjet kompania kishte fitim 191 milionë euro, ka bartur 29 milionë udhëtarë. Sipas vëllimit të qarkullimit ajron, vjet ajo kishte vendin e tretë në Evropë.

[Zero Cool]

Wind-Power ndal gjeneratorët në Golesh





9:29 / 15.09.2011

Kur kompania gjermano-kosovare Wind-Power, prodhues i energjisë nga era, erdhi për të investuar në Kosovë, në përurim nuk mungonin asnjëri nga protagonistët e energjetikës kosovare. Madje, thureshin lavde se bëhej fjalë për njërin nga projektet më serioze të prodhimit të energjisë së pastër.


Nuk kaloi shumë kohë dhe gjeneratorët e kësaj kompanie, të vendosur në Kodrat e Goleshit, kanë ndalur punën. Krejt kjo si pasojë e një vendimi të Zyrës se Rregullatorit të Energjisë, me të cilin ia përgjysmoi tarifat e shitjes, që për menaxheret e kompanisë i bie të punohet me humbje. Investuesi, u ankua kundër vendimit dhe për më shumë se një vit nuk mori përgjigje nga ZRRE. Si pasojë, edhe Korporata Energjetike e Kosovës e shkyçi nga rrjeti deri në një marrëveshje për tarifat, Shkruan Express.

Para kësaj, menaxheri i projektit, Avni Hajrullahu, rrëfen përvojën e hidhur edhe me Ministrinë e Tregtisë dhe Industrisë dhe Administratën Tatimore të Kosovës. Thotë se i është dashur kohë e gjatë që ta kompletojë një grumbull dokumentesh dhe shumë ditë pritjeje deri te regjistrimi i biznesit.

Për burokracinë nuk është befasi nëse shikohet renditja e Kosovës në raportet e Bankës Botërorë për ambientin e të berit biznes. Paraqitet si vend me procedura të tejzgjatura dhe burokraci. “Pas të gjitha këtyre pengesave, investitori është duke e shqyrtuar seriozisht tërheqjen nga Kosova”, thotë menaxheri i projektit, Hajrullahu.

Sipas tij, situata për kompaninë u rëndua se tepërmi, kur Zyra e Rregullatorit të Energjisë vendosi t’i përgjysmojë tarifat e shitjes së kësaj energjie.

Në fillim, marrëveshja për blerje të energjisë mes kompanisë dhe KEK-ut kishte tarifat nxitëse 84 euro/MWh për energjinë e prodhuar nga era.

[Zero Cool]

Zbatimi i marrëveshjes, sjell implikime ekonomike





16:48 / 14.09.2011

Zbatimi i marrëveshjes për njohjen e vulave doganore dhe marrja nën kontroll e vendkalimeve kufitare në veriun e Kosovës, mund të pasohet me implikime në aspektin ekonomik. Kështu mendojnë njohës të çështjeve ekonomike dhe përfaqësues të komunitetit të biznesit.


Qeveria e Kosovës, tashmë ka paralajmëruar se të premten, do të fillojë zbatimi i marrëveshjes për njohjen e vulave doganore dhe vendosjen nën kontroll të pikave kufitare 1 dhe 31. Më këtë do të marrë fund edhe vendimi i 20 korrikut për ndalimin e importeve nga Serbia.

Agim Shahini, kryetar i Aleancës Kosovare të Biznesit, ka shprehur dyshimet se fillimi i zbatimit të marrëveshjes, që nënkupton heqjen e masave të reciprocitetit ndaj produkteve serbe, do të dëmtojë prodhuesit vendorë dhe ekonominë në përgjithësi. “Paragjykimet janë se këto do të ndikojnë mjaft keq për prodhuesit dhe ekonominë vendore. Pasi një kohë, pas 40 ditësh këto po vihen në situatë para masave të reciprocitetit. Me këtë do të ketë mundësi që të shfrytëzohen rrugët alternative, të zhvillohet kontrabanda e cila ka qenë kancer për ekonominë e Kosovës”, shprehet Shahini

Edhe ekspertë për çështje ekonomike, thonë se lejimi i importit nga Serbia do të dëmtojë bizneset kosovare, të cilat, sipas tyre, gjatë periudhës se aplikimit të masave reciproke, kanë qenë më të pranishme në treg.

Haki Shatri, ish-ministër i Ekonomisë dhe Financave, shprehet skeptik se në pikat kufitare në veriun e Kosovës, mallrat serbe do t’ iu nënshtrohen taksave doganore. “Kam dilema, nuk jam shumë i sigurt se gjithçka do të shkojë në rregull. Është pak vështirë të kontrollohet, duke marrë parasysh konfiguracionin, gjerësinë e terrenit, dhe rrethanat që mbizotërojnë atje. Nuk them se mungon vullneti as i doganierëve dhe as i institucioneve tona, për të pasur atë terren nën kontroll, por është tepër e vështirë, duke marrë rrethanat në përgjithësi dhe klimën e krijuar pas 25 korrikut”, thotë Shatri.

Në anën tjetër, Lekë Musa, kryeshef ekzekutiv në Odën Ekonomike Amerikane në Prishtinë, konsideron se kthimi i masave të tregtisë se lirë më Serbinë, do të sjell invazion për produktet serbe, ndërsa bilanc negativ tregtar për Kosovën.“Sigurisht se implikime do të ketë. Para zbatimit të masave të reciprocitetit, Kosova ka qenë një humbëse e madhe nga tregtia e lirë më Serbinë. Dhe shkaku kryesor i kësaj ka qenë një bilanc tregtar negativ në dëm të Kosovës, ndërsa me 95 për qind në favor të ekonomisë serbe. Kjo ndodh për arsye se ekonomia serbe është shumë me e fuqishme dhe shumë më e konkurrueshme se sa prodhuesit vendorë në Kosovë”, thekson Musa.

Ndryshe, që nga dhjetori i vitit 2008, Serbia ka ndaluar të gjitha mallrat kosovare, për shkak të ndërrimit të vulave nga ato të UNMIK-ut në vula të Republikës së Kosovës.

[Zero Cool]

Sparkes: Paratë nga dogana në veri, në buxhet të Kosovës






11:59 / 15.09.2011

Zëvendësshefi i EULEX-it, Andy Sparkes ka deklaruar se plani është që më 16 shtator të merren nën kontroll pikat doganore në veri. Ai ka thënë se në pikat doganore, Jarinje dhe Bërnjak, do të vendosen doganierë të EULEX-it dhe ata vendorë, dhe se, siç ka shtuar ai, Beogradi ka qenë i njoftuar për këtë veprim.


“Bashkimi Evropian vazhdimisht ka qenë, dhe do të jetë, në kontakt të vazhdueshëm me partnerët serbë, në të gjitha nivelet. Edhe ky hap i zbatimit të marrëveshjes së arritur gjatë dialogut, nuk do duhej të ishte befasi për askënd”, ka deklaruar Sparkes për “Vesti”.

Ai më tej ka theksuar se Kosova është një zonë doganore, dhe se misioni që ai drejton vetëm është duke e kryer punën e tij, duke marrë kështu kontrollin e plotë ndaj doganave.

“Kosova është një zonë doganore, dhe këtë e ka thënë në deklaratën e tij edhe sekretari i përgjithshëm i OKB-së. Nuk mendoj se këtu është fjala për statusin. Ne kemi biseduar me zyrtarët serbë, duke përfshi edhe takimet që i kemi pasur sot, mirëpo atë që ne e kemi bërë është se i kemi informuar për aktivitetet operative që do t’i ndërmarrim më 16 shtator. Këto s[kane qenë bisedime, por vetëm informata”, ka shtuar Sparkes.

Ndërkaq, i pyetur se ku do të shkojnë paratë e grumbulluara nga doganat në veri të Kosovës, ai ka thënë se ato do të shkojnë në buxhetin e konsoliduar të Kosovës.

“EULEX-i do t’i mbledhë paratë. Mirëpo, kjo do të bëhet për t’i derdhur ato në buxhetin e konsoliduar të Kosovës”, ka thënë zëvendësshefi i EULEX-it, Andy Sparkes për “Vesti”.

[Zero Cool]

Zvicër, UBS banka humb 2 miliardë dollarë





12:51 / 15.09.2011

Banka zvicerane UBS ka bërë të ditur se një transaksion i paautorizuar nga një punëtor i saj, ka shkaktuar humbje në vlerë prej dy miliardë dollarësh.

Banka me seli në Cyrih ka thënë se një gjë e tillë mund të çojë në humbje në tremujorin e tretë të 2011-ës.

I njëjti burim ka konfirmuar se asnjë llogari bankare e klientëve nuk është prekur nga incidenti, por nuk ka dhënë detaje të tjera. Pas njoftimit, aksionet në gjigantin bankar të Zvicrës kanë rënë për më shumë se 7 për qind.

[Zero Cool]

Naftëtarët dhe arkat fiskale


Naftëtarët po kushtëzojnë Qeverinë e Kosovës me kompensim të shpenzimeve të pajisjes me arkat fiskale, gjë të cilën e paskan negociuar me Administratën Tatimore të Kosovës dhe qenkan duke pritur vendim të favorshëm nga Ministria e Finansave?!

Naftëtarët me “nëntë shpirtra“ (shumë të aftë për” sallto mortale“ në biznes, me standarde e me ligje) morën guximin për t i kërkuar lëmoshë ATK-së, MF-së dhe Qeverisë së Kosovës, sepse qenkan buzë “falimentimit“!

Nga lindi ideja dhe arsyetimi për të kërkuar kompensimin (subvencionimin) e shpenzimeve që dalin nga procesi i pajisjes me arka fiskale? Ky guxim i tepërt (nuk po e them i pacipë) më bën të dyshoj se naftëtarët kanë krijuar aftësi tepër të madhe (mos të them marrëveshje, bashkëpunim, ja ortaki) me disa nga institucionet, disa nga zyrtarët qeverisës e me disa nga liderët politikë.

Kompensimi i shpenzimeve (subvencionimi) i kësaj branshe, i kësaj dege, i kësaj veprimtarie biznesore që ne konsumatorët e njohim si tejet profitabile, do të ishte tepër favorizues për naftëtarët (nëse do të miratohej), por do të ishte edhe tejet diskriminues ndaj të gjitha bizneseve tjera. Jam për zbatimin e ligjit, e jo për favorizim të naftëtarëve, që prodhon diskriminim mes bizneseve tjera. Kjo ngase ne konsumatorët kemi bindjen se naftëtarët janë të aftë financiarisht ta përballojnë këtë kosto. Po ashtu, ekziston mundësia që pagesa të bëhet me këste. Naftëtarët nuk janë dëshmuar aq të përkushtuar për këthimin e çmimeve të karburanteve kur ato ulen në bursat botërore. Ata ishin të dyshuar dhe u hetuan nga Komisioni i Konkurrencës për kartelizimin, monopilizimin e oligopolizimin e tregut. Konsumatori ende ka dyshime në cilësinë dhe vëllimin (sasinë) e karburanteve me të cilat furnizohet nga pikat shitëse, nga shumica e po këtyre naftëtarëve dhe aq më shumë është i pakënaqur edhe me çmimet e tyre. Cilësia e dobët e karburanteve, në veçanti prania tepër e lartë e sulfurit ende skajshmërisht ndotin mjedisin dhe rrezikojnë shëndetin e konsumatorit, duke ngritur së tepërmi koston e mirëmbajtjes (të shpenzimeve) të shëndetit, kosto kjo që ngarkon edhe xhepin e konsumatorit, por edhe buxhetin e shtetit. Ndaj, shteti i Kosovës duhet të sigurojë mjete shtesë për mirëmbajtjen e shëndetit të rrezikuar të konsumatorëve nga derivatet jocilësore të një pjese të madhe të naftëtarëve tanë.

Cilësia e dobët e derivative të naftës rrezikon jetën e pjesëmarrësve në trafik,
dëmton rëndë të drejtat e ngasësve të automjeteve nga mërgata jonë të cilët, nga kompanitë e sigurimeve të automjeteve në vendet ku jetojnë e punojnë, pengohen ta vizitojnë Kosovën (sepse iu prishet polica e sigurimit), për shkak të cilësisë së dobët të derivateve me të cilat i furnizojnë shumica e pikave shitëse të naftëtarëve në Kosovë.

Naftëtarët nuk janë realë, nuk janë të sinqertë dhe nuk janë korrektë. Përkundrazi, me këto sjellje ata po i “tradhtojnë“ edhe “dostat“ e tyre në instancat vendimmarrëse.
Ne ende nuk harrojmë aferat e naftëtarëve. Le ta kujtojmë vetëm rastin e importit të 98 autocisternave me naftë kancerogjene disulfurike, që për javë të tëra u bllokuan në brezin kufitar të Kosovës me Maqedoninë.

Po ashtu, nuk mjafton vetëm reagimi i Aleancës Kosovare të Bizneseve. Lidhur me këtë “marifet“ (të mundshëm) duhet të shprehen edhe asociacionet tjera biznesore dhe afariste, sepse nëse naftëtarëve u bëhet një benefit (lëshim) i këtij lloji, duhet të përgatitemi të shohim edhe lëshime të branshës dhe të natyrës tjetër.

Konsumatori në Kosovë - taksapagues dhe gjenerues kryesor i buxhetit të Kosovës (punëdhënës edhe për ATK-në, edhe për MF-në, edhe për Qeverinë, edhe për…) nuk është i gatshëm të shohë “marifete“ dhe lojëra e favorizime të tilla që prodhojnë diskriminim mes të gjithë bizneseve dhe mes afaristëve të tjerë. ATK, MF, Qeveria duhet obligativisht ta zbatojnë ligjin kudo dhe njësoj për të gjithë.

Konsumatori i Kosovës, për zbatimin e ligjeve në fuqi, në veçanti të fushës së financave, kërkon angazhimin aktiv dhe me kohë të të gjithë gardianëve të ligjit, duke nënvizuar prokuroritë, të cilat nuk mund të arsyetohen se nuk janë informuar ose nuk janë alarmuar.

[Zero Cool]

I kthehen bashkëpunimit


Biznesmenët kosovarë po u kthehen lidhjeve afariste me kompanitë serbe që i ndërprenë nga 25 korriku, kur u vendosën masat reciproke. Por, tash e tutje situata do të jetë më ndryshe. Periudha sa zgjatën masat reciproke duket se ka ndikuar që të bie kërkesa e qytetarëve për produkte nga Serbia.





Më 16 shtator 2011 në ora 08:56

Porositë janë bërë dhe kamionët me mallra nga Serbia po presin nga çasti në çast të mësyjnë Kosovën. Biznesmenët kosovarë po u kthehen lidhjeve afariste me kompanitë serbe që i ndërprenë nga 25 korriku, kur u vendosën masat reciproke. Edhe ai që njihet si importuesi më i madh i këtyre mallrave për Kosovë, pronari i kompanisë “Elkos”, Ramiz Kelmendi thotë se do ta vazhdojë bashkëpunimin me afaristët në shtetin fqinj.

Por, sipas tij, tash e tutje situata do të jetë më ndryshe. Periudha sa zgjatën këto masa reciproke duket se ka ndikuar që të bie kërkesa e qytetarëve për produkte nga Serbia.
“Ne nuk do të importojmë më asnjë produkt nëse ndonjë prodhues vendor ka potencial ta mbulojë tregun me produkte të njëjta. Kompania jonë është e gatshme ta flijojë atë pjesë të tregut për të përkrahur prodhimin vendor”, thotë Kelmendi.

Ai tregon se në dyqanet e ETC-së është rritur në masë të madhe konsumi i prodhimeve vendore. Nga 35 milionë euro sa ishte qarkullimi për këto produkte vjet në këtë periudhë, sivjet Kelmendi tregon se ka pasur qarkullim 50 milionë euro.

Por, ai kërkon nga institucionet e vendit që të ndihmojnë afaristët kosovarë me politika fiskale që të mos kenë nevojë të importojnë nga vendet e ndryshme pa nevojë.

Përfaqësuesit e biznesit pranojnë se me heqjen e masave reciproke do të ketë invazion të prodhimeve serbe, por nuk besojnë se ato do të konsumohen pasi qytetarët kanë arritur një nivel të lartë për konsum të prodhimeve vendëse.

Kreu i Aleancës Kosovare të Biznesit, Agim Shahini, thotë se do të jenë disa produkte që qytetarët edhe më tutje do t’i kenë nëpër shtëpitë e tyre, por pohon se kanë diskutuar me bizneset anëtare sa më shumë t’i shmangen importit të këtyre produkteve.

Sipas Shahinit, është në dorën e qytetarëve të vendosin çfarë të konsumojnë, por nga e enjtja ai do të dalë në terren bashkë me përfaqësues të institucioneve arsimore për të vlerësuar cilësinë e prodhimeve vendëse. Kështu thotë se do të ngritë edhe më tej vetëdijen e konsumatorëve për këto mallra.

Thirrje për të braktisur mallrat nga Serbia u ka bërë bizneseve dhe qytetarëve edhe kryetari i Odës Ekonomike të Kosovës, Safet Gërgjaliu.

“Duke respektuar parimet e ekonomisë së tregut dhe interesat e bizneset e Kosovës, OEK fton të gjithë qytetarët dhe bizneset të angazhohen fuqishëm në forcimin e biznesit vendës”, thotë Geqrgjaliu.

Madje ai kërkon që ndaj Serbisë të aplikohen masa në kuadër të marrëveshjes së CEFTA-s par paralajmërimit për subvencionim të produkteve që vinë për Kosovë nga ky vend.

Ndërkaq, kryetari i shoqatës për mbrojtjen e konsumatorit, Selatin Kaçaniku vlerëson se kompanitë serbe të stimuluara nga shteti po e shkatërrojnë tregun e Kosovës dhe për këtë Qeveria e Kosovës duhet të aplikojë masat anti-damping. Ndërkaq, arsyetimin e bizneseve se po importojnë nga ky vend për shkak të çmimeve të lira dhe mungesës së këtyre produkteve në treg e sheh si ta pa arsyeshëm.

“Kam kërku nga bizneset që mos të na sjellin produkte serbe dhe të mos na i imponojnë konsumin e tyre. Tregtarët mos të japin këso arsyetimi se Serbia është e përgatitur ta shkatërrojë tregun tonë”, pohon Kaçaniku. Tregtarët thonë se biznesi zakonisht kërkon tregje të reja dhe mundësi më të mira përfitimi.

[Zero Cool]

Po vijnë grekët


Dhjetëra afaristë nga Greqia ranë në Prishtinë për të parë mundësitë për investime në vendin që shteti i tyre ende nuk e ka njohur. Ata thonë se nuk u intereson çfarë bëjnë politikanët, por vlerësojnë se politika e dy vendeve duhet të orientohet në përkrahje të afarizmit dhe të mos bëhet pengesë e zhvillimit të bizneseve





Nga Zekirja Shabani më 17 shtator 2011 në ora 08:21
Babish Gianakidis me shokë nga Greqia erdhën në Prishtinë. Si biznesmen me nam nga ky vend që ende nuk e ka njohur Kosovën si shtet, shikuan se çfarë mundë të investojnë këtu. Interesimi i Giannakidis është të shtrijë rrjetin e shpërndarjes së produkteve ushqimore përmes kompanisë së tij “GKA Trade”, pavarësisht qëndrimit politik që ka vendi i tij ndaj Kosovës.

“Mua nuk më intereson politika. Qëllimi im është të sjell këtu produkte ushqimore të cilësisë së lartë dhe të themeloj një rrjet të shpërndarjes për t’u mundësuar qytetarëve çmime më të lira”, pohon Giannakidis.

Ai thotë se politika e dy vendeve duhet të orientohet në përkrahje të afarizmit dhe të mos bëhet pengesë e zhvillimit të bizneseve.

Pavarësisht përkrahjes, ai nuk e ka ndërmend të ndalet.

“Ne po shohim mundësit të ndërtojmë kapacitete për prodhimin dhe përpunimin e produkteve ushqimore në Kosovë”, thotë Giannakidis.

Si ai janë edhe dhjetëra biznesmenë të tjerë që po kërkojnë bashkëpunëtorë në sektorin farmaceutik, të ndërtimtarisë, të drurit dhe tekstilit në Kosovë.

Në këto fusha thonë se janë më të zotë dhe kanë çfarë t’i ofrojnë tregut të Kosovës.
Përfaqësuesi i delegacionit nga Greqia që vizituan të premten Odën Ekonomike të Kosovës, Jean Nini, tha se Kosova është dëshmuar si vend i sinqertë për bashkëpunimin ekonomik duke u munduar të krijojë kushte sa më të mira për bizneset që të zhvillojnë aktivitetet e tyre.

“Kjo nismë e tanishme ka një nivel të mirë bashkëpunimi në mes Kosovës dhe Greqisë, gjithashtu edhe në nivelin qeveritar në një takim pozitiv mes ministrit të jashtëm të Greqisë dhe kryeministrit Thaçi për mundësinë e bashkëpunimit ekonomik dhe bizneseve”, pohoi Nini.

Sipas tij, bizneset që ai ka marrë me vete në këtë vizitë janë shumë të interesuara të arrijnë marrëveshje me kolegët e tyre kosovarë. Për këtë çështje për orë të tëra ata kanë biseduar kokë më kokë me njëri-tjetrin.

Ndërkaq, nikoqiri Safet Gërxhaliu, kryetar i OEK-ut, u shfaq shumë i kënaqur me interesimin që grekët shfaqën për bashkëpunim.

Madje u tha mysafirëve se Kosova është shumë më e mirë përbrenda sesa që është prezantuar deri më tani nga të tjerët në Greqi. Tha se kanë shumë për të mësuar nga njëri-tjetri.

“Në rend të parë përvoja në zhvillimin ekonomik dhe sidomos ne sektorin e prodhimit që e ka Greqia, përvoja dhe transferi i teknologjisë është më se i mirëseardhur për realitetin kosovar dhe po ashtu për certifikim dhe përmbushje të kritereve në cilësinë e produkteve dhe të cilat po ashtu e kanë një përparësi”, theksoi Gërxhaliu.

Ai vlerëson se me bashkëpunim dhe lidhje të mira ekonomike, të dyja vendet do të kontribuojnë për integrim dhe stabilitet politik.

[Zero Cool]

Shumë më pak rrush sivjet






Nga Express më 17 shtator 2011 në ora 12:53
Përderisa vitin e kaluar ishin shfaqur shumë probleme, pasi që bodrumet nuk dëshironin të pranonin rrushin e fermerëve të Rahovecit, një problem i tillë nuk pritet të ndodhë edhe këtë vit, pasi janë krijuar disa bodrume shtesë. Vreshtarët shprehin shqetësimin se dukshëm janë rendimentet e rrushit më të vogla këtë vit, pasi që në pranverë kanë mbretëruar temperatura të ulëta.

Moti i keq pranveror ka bërë që sivjet në vendin tonë të shënohet niveli më i ulët i rendimenteve të prodhimtarisë së rrushit. Por, përveç motit gjendjen në sektorin e vreshtarisë në Rahovec vitin e kaluar e patën rënduar dhe dy bodrumet e verës, të cilat nuk morën asnjë kilogram rrush nga fermerët e asaj ane.

Këshilltari në Ministrinë e Bujqësisë, Pylltarisë dhe Zhvillimit Rural, Avdullah Isufi ka thënë se problemet e rrushit që janë shfaqur gjatë vitit të kaluar, nuk do të përsëriten, pasi që fermerët kanë gjetur alternativa të tjera. Përveç bodrumit të “Stone Castle”, janë hapur edhe disa bodrume të tjera të vogla që do të pranojnë rrushin.

“Ne si ministri kemi kontaktuar edhe me Shoqatën e vreshtarëve dhe me disa bodrume që kanë shfaq interesim për të grumbulluar sasinë e vjelë të rrushit për verë dhe unë mendoj në këtë drejtim nuk do të ketë probleme. Mos të harrojmë se Ministria e Bujqësisë sektorin e vreshtarisë e ka përkrahur më së tepërmi dhe vitet e fundit këtë sektor e ka mbështetur me 2.5 milionë euro dhe vetëm këtë vit janë miratuar 86 projekte të fermerëve në ri-konstruktimin e vreshtave”, ka theksuar Isufi.

Ndërsa rrushi i tryezës asnjëherë nuk ka pas ndonjë problem, sepse ka gjetur treg në Kosovë. Por Isufi vlerëson se koha që ka mbretëruar në sezonin pranveror ka bërë që rendimentet e rrushit këtë vit të jenë më të vogla deri në 30 për qind, sesa vitin e kaluar.

“Duhet theksuar, se sivjet rendimentet janë më të ulëta se vitet e kaluara dhe kjo si pasojë e motit të lig, i cili ka mbretëruar gjatë pranverës ku kemi pas temperatura të ulëta dhe këtë sektor temperaturat e ulëta e kanë goditur, kështu që sivjet planifikuar rreth 20 deri në 30 për qind rendiment më të ulët”, ka thënë Isufi.

MBPZHR gjatë vitit të kaluar ka mbështetur prodhuesit e rrushit, gjegjësisht të gjithë fermerët të cilët kanë pasur të mbjell mbi 20 ari vreshta, por më vonë për shkak të mungesës së evidencës kanë mbetur edhe 40 mijë euro pa u mbuluar prej Ministrisë së Bujqësisë.

Por, Isufi thotë se janë duke u bërë përpjekje që të gjenden fonde edhe për të mbuluar këtë pjesë të fermerëve që kanë marrë subvencione. Nga ana tjetër, Labinot Shulina kryetar i Shoqatës së Vreshtarëve ankohet për rendimente të ulëta të rrushit gjatë këtij viti.

“Nëse vjet për një hektar janë marr 10 mijë kg rrush, sivjet merren 1 mijë kg. 90 për qind është dëmtuar rrushi prej bore”, ka thënë Shulina përmes telefonit për Kosovapress.

Për më tepër ai ka shtuar se subvencionet e vitit kaluar janë përfunduar, por për këtë vit ende nuk ka asgjë. Sipas tij njerëzit janë të varur vetëm prej rrushit dhe kanë investuar në hardhi, por me këtë që ka dalë, vetëm kanë humbur.

Bodrumet sivjet e kanë pranuar rrushin, sepse ka një sasi të vogël, ndërsa kryetari i Shoqatës ankohet edhe në çmimin e ulët të shitjes së rrushit me shumicë, i sillet nga tetë deri në dhjetë centë për kilogramë.

Ndryshe, vitin e kaluar vreshtarët e Rahovecit kishin mbajtur protesta, të cilat madje edhe kishin eskaluar në dhunë, ku kishte edhe të lënduar, për shkak të pakënaqësisë me humbjet e shkaktuara nga prodhimi i rrushit, që sipas tyre shkonin deri në dhjetë milionë euro.

Vreshtarët e Rahovecit patën kërkuar nga Qeveria e Kosovës dhe kompania “Stone Castle” që t’u krijojnë një vend për grumbullimin e rrushit. Problemi ishte zgjidhur pasi që përfaqësuesit e fermerëve pranuan ofertën e Qeverisë me të cilën secili prej tyre do të merrte nga 1 mijë euro për çdo hektar të mbjellë me rrush, në këmbim të shpenzimeve për çdo hektar gjatë kultivimit të rrushit.

[Zero Cool]

Komuna e Prizrenit, 28 mijë euro për ueb-sajt





Komuna e Prizrenit e cila drejtohet nga Ramadan Muja, për hartimin e një ueb-sajti për komunën e Prizrenit, ia ka dhënë tenderin prej 28 mijë e 575 euro kompanisë “Gis D&A Center Kosovo” po ashtu nga Prizreni.
Kjo bën të ditur se abuzimi me paranë publike, si në nivel qendror, ashtu edhe në nivel lokal nuk ka të ndalur. Edhe më tej paratë e taksapaguesve kosovarë vazhdojnë të shpenzohen nga institucionet e shtetit në projekte jo të domosdoshme me çmime astronomike.
Sipas Komisionit Rregullativ të Prokurimit Publik në tenderin për krijimin e ueb-sajtit “Prizreni 360 shkallë” kanë konkurruar katër kompani, ku departamenti i prokurimit i komunës ka vendosur që tenderin t’ia japë kompanisë “Gis D&A Center Kosovo” nga Prizreni, e cila si aktivitet kryesor të sajin e ka riprodhimin e shënimeve të makinave llogaritëse.

[Zero Cool]

Paralajmërohet rikthimi i reciprocitetit






Nga Express më 17 shtator 2011 në ora 15:28
Kamionë me mallra komerciale nga Kosova nuk janë duke u lejuar të hyjnë në Serbi. Këtë e konfirmon për Radion Evropa e Lirë zëvendëskryeministrja e Kosovës, Mimoza Kusari Lila.

Sipas saj, mallrat nga Kosova nuk lejohen të hyjnë në Serbi, për shkak të dokumenteve përcjellëse, në të cilat shkruan “Republika e Kosovës”.

“Zyrtarisht jam e informuar nga udhëheqësit e Doganës se ka pasur disa tentime të kamionëve nga Kosova, që të hyjnë në Serbi, porse janë ndaluar nga ana serbe me pretekstin se dokumentet që ata i përmbajnë, nuk janë të njohura nga pala serbe”, thotë Kusari Lila.

Ndonëse kamionët nga Kosova nuk lejohen të hyjnë në Serbi, autoritetet kosovare kanë konfirmuar se Serbia ka filluar të eksportojë në Kosovë. Por, nëse një situatë e tillë do të vazhdojë, zëvendëskryeministrja Kusari Lila paralajmëron rikthimin e reciprocitetit ndaj produkteve të Serbisë.

“Në rast se nuk shohim gatishmëri nga pala serbe për të zbatuar marrëveshjen e arritur në Bruksel, më 2 shtator, për pranimin e vulave doganore dhe dokumenteve përcjellëse, atëherë Kosova nuk do të vazhdojë të ballafaqohet me situatën e njëjtë të para 25 korrikut, kur Serbia ka shitur mallra në Kosovë, ndërsa Kosova nuk ka mundur as transit të kalojë në Serbi”, thotë Kusari Lila.

Ajo bën të ditur se janë udhëzuar Doganat e Kosovës, që në bazë të marrëveshjes së arritur në Bruksel, të përgatisin dosje për të gjitha rastet e kthimit të mallrave nga doganierët serbë. Të njëjtat, thotë Kusari Lila, do të prezantohen të hënën para autoriteteve ndërkombëtare.

Edhe përfaqësuesit e bizneseve shprehin nevojën e rivendosjes së reciprocitetit, nëse Serbia nuk lejon eksportin e produkteve kosovare në këtë vend. Kryetari i Aleancës Kosovare të Biznesit, Agim Shahini, thotë:

“Duhet të kthehen para datës 16 shtator, kur ka qenë në fuqi bllokimi ndaj prodhimeve serbe. Duket se kjo po funksion në gjuhën, e cila nuk është gjuhë liberale ekonomike, por është gjuhë reciproke...”.

Masa e reciprocitetit ndaj produkteve të Serbisë është vendosur më 25 korrik dhe është ndërprerë më 16 shtator.

Në vendkalimin kufitar në Jarinë nuk kanë hyrë mallra as pas 16 shtatorit, për shkak të infrastrukturës së djegur nga serbët lokalë, ndërkohë që në Bërnjak kamionët nuk kanë mundur të kalojnë për shkak të barrikadave që kanë vënë serbët përreth, në shenjë kundërshtimi ndaj vendosjes së doganorëve dhe policëve kosovarë. (REL)

[Zero Cool]

BE: Tregjet financiare duhen taksuar


Në përfundim të takimit të tyre në Wroclaw, ministrat e financave të BE-së vendosën të nxisin futjen e taksave mbi transaksionet financire. Gjermania ushtron presion, Britania e madhe mbetet skeptike.





18 shtator 2011
Ministri gjerman i financave Volfgang Shojble kërkon të bëjë një përpjekje të re. Pas dështimit vitin e kaluar të futjes së një takse globale mbi transaksionet e tregjeve financiare, Shojble së bashku me kolegun francez Francois Baroin, kërkojnë të bëjnë një përpjekje për të futur këtë taksë të paktën në nivel evropian. SHBA kanë kundërshtuar në mënyrë kategorike taksimin e tregjeve financiare. Këtë e bëri të qartë edhe një herë ministri amerikan i financave Timothy Geithner gjatë vizitës së tij të papritur në takimin evropian të ministrave të financave që u mbajt në Wroclaw (Breslau).

Megjithatë Evropa kërkon të paraprijë, tha ditën e shtunë (17.09.2011) ministri Shojble. "Nuk ishte e paparitur që Tim Geithner tha në mënyrë jospontane se ideja është se të gjitha problemet mund të zgjidhen". Por është e qyrtë se BE është duke punuar me presion të mafh për taksat, tha Shojble. Që në muajin tetor, Komisioni i BE-së paraqiti një projektligj përkatës. Ministri britanik i financave, George Osborne është skeptik për taksimin e transaksioneve financiate. Ai druhet se ajo do të sjellë pasoja për Londrën si vend financash. Edhe Polonia dhe Italia kanë rezerva.

Në përfundim të takimit të tyre në Wroclaw, ministrat e financave të BE-së vendosën të nxisin futjen e taksave mbi transaksionet financire. Gjermania ushtron presion, Britania e madhe mbetet skeptike.
Ministri gjerman i financave Volfgang Shojble kërkon të bëjë një përpjekje të re. Pas dështimit vitin e kaluar të futjes së një takse globale mbi transaksionet e tregjeve financiare, Shojble së bashku me kolegun francez Francois Baroin, kërkojnë të bëjnë një përpjekje për të futur këtë taksë të paktën në nivel evropian. SHBA kanë kundërshtuar në mënyrë kategorike taksimin e tregjeve financiare. Këtë e bëri të qartë edhe një herë ministri amerikan i financave Timothy Geithner gjatë vizitës së tij të papritur në takimin evropian të ministrave të financave që u mbajt në Wroclaw (Breslau).

Megjithatë Evropa kërkon të paraprijë, tha ditën e shtunë (17.09.2011) ministri Shojble. "Nuk ishte e paparitur që Tim Geithner tha në mënyrë jospontane se ideja është se të gjitha problemet mund të zgjidhen". Por është e qyrtë se BE është duke punuar me presion të mafh për taksat, tha Shojble. Që në muajin tetor, Komisioni i BE-së paraqiti një projektligj përkatës. Ministri britanik i financave, George Osborne është skeptik për taksimin e transaksioneve financiate. Ai druhet se ajo do të sjellë pasoja për Londrën si vend financash. Edhe Polonia dhe Italia kanë rezerva.

[Zero Cool]

Shqipëri, 3 milionë turistë gjysma kosovarë





16:20 / 17.09.2011

Pavarësisht se Shqipëria ka shënuar rritje të numrit të turistëve që vizitojnë këtë vend, për këtë vit sërish janë shfaqur problematikat në këtë drejtim.
Në mbyllje të sezonit turistik veror, ministri i Turizmit Kulturës, Rinisë dhe sporteve Aldo Bumçi ka dalë në konferencë për media, ku deklaroi se problematika e sezonit turistik për këtë vit qëndron në informalitetin e të dhënave të vendqëndrimit të turistëve, në ekzistencën e disa plazheve të ndotura, çështje për të cilën qeveria ka ngritur një task-forcë të posaçme.

Të dhënat e turizmit flasin për një rritje të ndjeshme të numrit të atyre që kanë vizituar Shqipërinë këtë vit. Ministri i Turizmit tha se vetëm gjatë këtij viti kanë hyrë në këtë vend më shumë se 300 mijë shtetas, më shumë se në të njëjtën periudhë të vitit të shkuar.

Po ashtu Bumçi tha se vetëm gjatë këtij viti kanë hyrë rreth tre milionë turistë të huaj apo edhe shqiptarë rezidentë në vendet e BE, sipas tij rreth gjysma e tyre janë turist nga Kosova.

Prioritet i Ministrisë së Turizmit, sipas Bumçit do të mbetet zhvillimi i kësaj fushe, sa i përket turizmit malor, me gjithë shifrat në rritje, turizmit kulturor dhe i ruajtjes e zhvillimit të trashëgimisë kulturore.

[Zero Cool]

Bosnja konfirmon pranimin e vulave doganore të Kosovës





13:45 / 17.09.2011

Ministria e Tregtisë dhe Industrisë, ka njoftuar zyrtarisht se edhe Bosnjë e Hercegovina kanë pranuar vulat doganore të Kosovës.
MTI konfirmon se të premten presidenca e Bosnjë e Hercegovinës ka aprovuar propozimin e qeverisë së saj për pranimin e vulave doganore të Kosovës. “Pranimi i vulave nga ana e Bosnjë e Hercegovinës vjen pas takimeve të zhvilluara ndërmjet zyrtarëve të MTI-së dhe zyrtarëve përgjegjës nga Ministria e Tregtisë së Jashtme dhe Marrëdhënieve Ekonomike të BeH dhe javën e kaluar në kuadër të takimit të CEFTA-s në Bruksel”, thuhet në komunikatë.

Bosnja e Hercegovina deri më tani ka aplikuar taksën doganore prej 10 për qind për produktet kosovare, ndërkaq me aplikimin e vendimit të Qeverisë së Kosovës për masat e reciprocitetit edhe me këtë vend, ka ndikuar që institucionet e BeH të marrin vendim për njohjen e vulave doganore të Kosovës.

Duke pasuar këtë vendim shumë shpejt MTI-ja do të lëshojë vendimin për heqjen e masës së reciprocitetit edhe me shtetin e Bosnjë e Hercegovinës.

[Zero Cool]

IPKO shpërblen konsumatorët





Nga Express më 19 shtator 2011 në ora 08:15
Përveç ofrimit të shërbimeve më të përshtatshme të komunikimit mobil në Kosovë, telefonia mobile IPKO tani synon që t’i shpërblejë konsumatorët e saj dhe miqtë e tyre më të afërt.

Përmes një komunikate për media, IPKO-ja njofton se tash me programin e ri të shpërblimit, konsumatorët ekzistues të telefonisë mobile IPKO, të cilët sjellin miqtë e tyre për të blerë një numër 049, fitojnë 3 euro kredi në telefonin e tyre mobil.

Në anën tjetër, edhe konsumatorët e rinj, të ftuar nga miqtë e tyre, do të fitojnë nga 1 euro kredi falas, për çdo mbushje në vlerë të 3 € e më shumë që ata bëjnë, për 6 muajt e ardhshëm. Për të pranuar 3 euro kredi falas nga operatori i tyre mobil, konsumatorët e telefonisë mobile IPKO duhet ta ftojnë shoqërinë e tyre që t’i marrin benefitet, duke blerë një numër në njërin nga 17 dyqanet zyrtare të kompanisë.

“Komunikimi i shpeshtë me miqtë dhe familjen është i domosdoshëm dhe ne synojmë që t’i shpërblejmë të gjithë konsumatorët tanë, të cilët i duan më të afërmit e tyre rreth vetes”, ka thënë Robert Erzin, drejtor ekzekutiv në IPKO. Gjatë blerjes, konsumatori duhet të tregojë numrin, emrin dhe mbiemrin e personit të cilin e referon dhe më pas ta pranojë bonusin e dhënë nga IPKO-ja.

Ky operator mobil, me rrjetin e vet mbulon 98.5 për qind të territorit, duke u bërë kështu transmetuesi me shtrirjen dhe stabilitetin më të madh të sinjalit të telefonisë mobile në Kosovë.