Balena gri shfaqet serish.Per here te fundit eshte pare me vitin 1700

[~AnnA~]

Gjendet në Izrael dhe në Spanjë balena gri, e cila nuk ishte parë që në vitin 1700. Mendohej ishin zhdukur të gjitha

Enigma e shfaqjes së balenës gri

Çështja, e cila në fillim ishte vështirësisht e shpjegueshme, nisi më 8 maj të vitit 2010. Ishte pikërisht kjo datë kur u gjet një balenë gri përgjatë bregut mesdhetar të Izraelit. Disa ditë më pas, saktësisht njëzet e dy, e njëjta lloj balene u gjet përsëri, por këtë herë në ujërat spanjolle, përsëri në ujëra mesdhetare. Enigma qëndron në faktin se që nga viti 1700, nuk ishin parë më kurrë në ujërat mesdhetare balena të këtij lloji (Eschrichtius robustus). Mendohej se balenat gri ishin zhdukur të gjitha. Kuptohet që eventi i papritur ka ngjallur habi të jashtëzakonshme dhe një entuziazëm të madh mes studiuesve dhe shkencëtarëve, të cilët fantazonin rreth faktit që një specie e zhdukur ishte ringjallur mrekullisht përsëri.

E gjitha kjo ka ndodhur një vit më parë pasi në ditët e sotme, "çështja e balenës që nuk duhet të ekzistonte" ka gjetur fatkeqësisht një shpjegim më të logjikshëm. Një shpjegim më të logjikshëm, por edhe më alarmant në fakt. Nëse rishfaqja, apo ringjallja siç ju pëlqente ta quanin disa shkencëtarë, e një popullsie që mendohej e zhdukur përgjithmonë do të kishte qenë një lajm shumë i mirë, hipoteza tjetër negative tregon se rishfaqja e papritur e balenës me origjinë atlantike i atribuohet vetëm ndryshimeve klimatike. Është pikërisht ky shpjegimi që propozohet nga Aviad Scheinin dhe kolegët e tij të qendrës Marine Mammal Research të Izraelit, të cilët kanë publikuar në revistën "Marine Biodiversity Records" artikullin me titull "Balena gri në Mesdhe: Event anormal apo shenjë e herët e shpërndarjes lidhur me ndryshimet klimatike?".

Hipoteza negative

Balenat gri i kalojnë muajt e verën duke u ngopur me ushqim në Oqeanin Arktik dhe kështu nisin, me ardhjen e stinës dimërore, atë që quhet si migrimi më i gjatë i kryer nga gjitarët. Në këtë mënyrë, ato kapërcejnë detin Chukchi, më pas atë të Beringut, duke arritur në fund të Oqeanit Paqësor. Duke ndjekur më pas brigjet e Alaskës, ato të Kanadasë dhe në fund atë të Shteteve të Bashkuara, duke arritur në brigjet e Kalifornisë dhe të Meksikës ku ndodhet edhe territori i tyre riprodhues. Pasi mbaron periudha dimërore, rikthehen në veri. Kryejnë në këtë mënyrë një zbritje riprodhuese drejt jugut dhe më pas një ngjitje trofike drejt veriut...

Përgatiti: KLARITA BAJRAKTARI