Kryetarët e PDK-së

[Guri i madh]

Limaj: Mjerë ai pushtet që kërkon votat me kërcënime

23 Shtator 2013 - 01:25





(18:00) Shumë qytetarë të Malishevës, kishin dalë ta presin heroin e tyre Fatmir Limajn, të cilën e quajnë jo vetëm hero të Malishevës, por gjithë Kosovës. Limaj para qytetarëve të shumtë tha se tashmë ai është i lirë dhe do ta vazhdojë punën e tij aty ku e kishte lënë në gjysmë. Në këtë takim, Limaj tha se e përkrahë edhe Iniciativën Qytetare të Malishevës, ku dhe bëri thirrje për ta votuar atë.
Ai, po ashtu, tha se është koha që qytetarët me votën e tyre t’i ndëshkojnë të korruptuarit dhe ata që shkelin ligjin dhe të kthehet besimi i humbur ndaj shtetit. Limaj, i cili ia kishte mësy vendlindjes të hënën, tha se ai do të vazhdojë të punoj në shërbim të atdheut.
Kam dashur që nga këtu, nga vendlindja ime, t’i drejtohem jo vetëm komunës së Malishevës, por gjithë Kosovës. T’i drejtohem nga vendlindja ime Kosovës me meazhin se as s’kam pushuar, as sjam ndalur , por do të vazhdoj punën time në shërbim të atdheut tonë“, tha ai.
Limaj, po ashtu, falënderoi të gjithë ata, që në kohë të vështira dhe sfiduese, patën besim tek ai dhe besuan në fitore dhe në vlerat e UÇK-së. Andaj, siç tha ai, që nga sot, së bashku me bashkëpunëtorët e tij, do të vazhdojnë aty ku kanë mbetur, me qëllim që ta çojnë përpara shtetin e Kosovës. Ai foli edhe për bashkëluftëtarët e tij, duke pohuar se Malisheva di t’i nderojë dëshmorët dhe heronjtë e kombit dhe se nuk do të lejojë që të përdhoset lufta e UÇK-së.
Ndërsa pohoi se vendi ynë po ballafaqohet me mijëra probleme dhe se është momenti i fundit që popullit t’i kthehet shpresa e humbur për jetë dhe besimin tek shteti.
Ai kishte edhe një mesazh për udhëheqësit e institucioneve, duke ia rikujtuar se shteti nuk është pronë private e askujt.
Mesazh për ata që drejtojnë institucionet, komuna, shkolla, administratë, shteti, nuk është pronë private e askujt, ato janë të qytetarëve dhe funksionojnë sipas rregullave ligjore. Andaj, jemi në kohën kur së shpejti do të mbahen zgjedhjet lokale dhe ky është momenti kur populli merr vendime se kënd ta votoj. Para se të shkoni tek kutitë e votimeve, të nderuar bashkëqytetar, kthehuni mbrapa dhe vlerësoni punën e tyre që kanë bërë deri tani dhe analizoni mirë ata të cilët pretendojnë të vijnë. Dita e votimit është dita kur ju mund t’i dënoni të gjithë ata të cilët nuk kanë pasur sjellje demokratike, apo qeverisjen që ju e keni pritur. Ju e keni rastin që ata t’i largoni dhe t’i sjellni njerëzit e rinj në atë qeverisje. Vetëm tek kutitë e votimit, populli ka rastin që t'iu tregojë gjithë atyre, të cilët shteti i ka bërë arrogant, i'u ka mbyllur sytë. Populli, atë ditë, do t'iu tregoj atyre, se vetëm populli është sovrani në kutitë e votimit dhe ai vendos”, ka thënë ai.
Ai, po ashtu, tha se do të vazhdojë të angazhohet për një shtet ligjor dhe një qeverisje demokratike, duke pohuar se do t’i mbështes vetëm ata njerëz që punojnë për nevojat dhe në shërbim të popullit dhe jo ata që dëshirojnë t’i privatizojnë institucionet.
Unë i respektoj dhe i mbështes ata njerëz, të cilët nuk e përdorin pushtetin për hakmarrje. Unë do t’i mbështes edhe njerëzit, të cilët nuk shantazhojnë me pushtetin. Unë do t’i mbështes ata njerëz, të cilët nuk i kërcënojnë qytetarët, arsimtarët, profesorët me pushtetin. Kam një mesazh posaçërisht për arsimtarët, administratën dhe për nxënësit. E di që jeni në presion. E di kam dëgjuar që jeni edhe të kërcënuar. Kam dëgjuar që jeni larguar edhe nga puna, për shkak që mendoni ndryshe. Askush nuk do të lejohet ta bëjë një gjë të tillë në Malishevë. Mos harroni se as Malisheva, as çdo komunë e Kosovës, le ta dinë mirë atë komunë nuk e ka lënë baba, por e ka bërë populli. Askush nuk ka të drejtë që njerëzve me kërcënime që t'iu ndryshojë mendimin. Mjer ai i mjeri. I mjerë ai pushtet, i cili kërkon t’i fitoj votat me kërcënime. Lum ai që punon për popullin dhe e do populli”, tha Limaj.
Limaj, ndër të tjera, ftoi intelektualët e komunës së Malishevës, arsimtarët dhe profesorët, që mos të vazhdojnë të ndikohen nga kërcënimet, por përgjigjen e tyre ta japin tek kutitë e votimit me tre nëntor.
Andaj ju që jeni në administratë, arsimtarë, ditën me 3 nëntor, duhet me dhanë mesazhin me i'u kallxu që nuk pranojmë diktator .Malisheva ka qenë vendi ku gjithmonë është shprehur mendimi lirshëm dhe ashtu duhet të mbetet gjithmonë ”, tha ai.
Limaj, ndër të tjera u tha bashkëvendësve të tij se ai tashmë është kthyer dhe do të jetë zëri i tyre mbrojtës, jo vetëm në këtë komunë, por në gjithë Kosovën. Ndërsa u shpreh haptas se përkrah tashmë Iniciativën qytetare në Malishevë, duke kërkuar nga qytetarët që të votojnë për atë. Limaj tha se do t'i mbështet të gjitha iniciativat qoftë në Malishevë apo vende tjera, të cilat kanë si qëllim ndryshimin e jetës për të mirë të qytetarëve të këtij vendi.
Të nderuar qytetarë të Komunës së Malishevës, unë kam vendosur që ta mbështes Ragip Begaj dhe Iniciativën për kryetar të komunës së Malishevës. I ftoj qytetarët e Komunës së Malishevës, që me 3 nëntor ta japin shembullin për Kosovën, ashtu siç ka dhënë shembull Hani i Elezit, që ne dimë të votojmë për ndryshime pozitive, në shërbim të demokracisë dhe mirëqenies së qytetarëve tonë. Prandaj, Malisheva duhet të votojë për Ragip Begaj dhe iniciativën e tij”, pohoi ndër të tjera Limaj.
Ai, po ashtu, u bëri thirrje qytetarëve, që të mos bien pre e provokimeve dhe kërcënimeve. Ai pati dhe një mesazh për komisionarët, që të mos i'u binden urdhërave për vjedhje, sepse në fund vet do të përfundojnë në burg./Kosovapress/

* * *
(10:00) Fatmir Limaj sot do të mbajë një tubim me qytetarë, në Palestrën Sportive në Malishevë. Tubimi ku ai do të marrë pjesë fillon në orën 12:00.

“Dua t’ju njoftoj se me kënaqësi do t’i përgjigjem ftesës së qytetarëve të Malishevës në tubimin që ata kanë paraparë. Për një kohë të gjatë më ka munguar komunikimi me qytetarët. Do ta kem kënaqësinë që tani t’u drejtohem me një fjalim të gjithë atyre që u kam munguar. Shihemi atje!”, ka shkruar Limaj në Facebook.

Ai ka thënë se do të jetë aktiv në politikë. “Patjetër, do ta vazhdojë punën time për vendin”, ka thënë Limaj. Ai këtë koment e ka bërë në Kleçkë në pritjen që ishte organizuar për qytetarët, vetëm disa ditë pasi është shpallur i pafajshëm në rastin “Kleçka”.

Limaj pritet që së shpejti ta bëjë publik qëndrimin për të ardhmen e tij, nëse do të vazhdojë me PDK-në apo do t’i thotë lamtumirë asaj.