Familja e Presidentit Ibrahim Rugova falënderon për mesazhet e ngushëllimit

[Arb]

Familja e Presidentit Ibrahim Rugova falënderon për mesazhet e ngushëllimit

Prishtinë, 21 mars - Familjes së Presidentit të ndjerë Ibrahim Rugova, i cili u nda nga jeta më 21 janar 2006, i kanë arritur shume telegrame e mesazhe ngushëllimi nga personalitete të shquara botërore, kryetarë shtetesh e qeverish, ministra e diplomatë të njohur, nga liderë të partive të ndryshme politike, si dhe nga personalitete, institucione, organizata dhe asociacione të njohura të cilat kanë shprehur ngushëllimet e thella e të sinqerta.

Po ashtu mesazhe ngushëllimi i kanë arritur edhe nga shumë individë, bashkatdhetarë tanë nga të gjitha viset shqiptare, si dhe nga diaspora që nga Evropa, Amerika, e deri nga Australia dhe Zelanda e Re e largët, duke ia lehtësuar sadopak dhembjen dhe pikëllimin për humbjen e më të dashurit të tyre.
Në pamundësi që t'i përgjigjet secilit veç e veç, Familja e Presidentit Rugova i falënderon të gjithë për ngushëllimet e tyre të sinqerta.

Familja e Presidentit Rugova falënderon veçanërisht Zyrën amerikane në Prishtinë dhe posaçërisht i shpreh mirënjohje shefit të saj, Z.Filip Goldberg, për kujdesin dhe interesimin e vazhdueshëm që ka treguar për gjendjen shëndetësore të Presidentit Ibrahim Rugova.

Familja e Presidentit Rugova falënderon Spitalin Ushtarak amerikan në Kampin Bondstill në Kosovë dhe Qendrën Mjekësore Ushtarake amerikane në Landshtul të Gjermanisë, e posaçërisht Dr. Guillermo Tellez, Dr. Joseph Flynn dhe teknikun Kenny Davis të cilët u kujdesën për Presidentin Rugova deri në çastet e fundit të jetës së Tij.

Familja e Presidentit Rugova po ashtu falënderon mjekët e Qendrës Klinike Universitare të Prishtinës e posaçërisht Dr. Afrim Gashin dhe teknikun Gëzim Krasniqi të cilët ishin gjithnjë pranë Presidentit Ibrahim Rugova dhe u kujdesën për shëndetin e Tij.

Familja e Presidentit Rugova gjithashtu falënderon institucionet e Kosovës dhe të UNMIK ut dhe ato të komunës së Prishtinës, KFOR in, SHPK në, TMK në për organizimin me dinjitet të ceremonive të përmortshme që nga 21 e deri më 26 janar dhe deri në përcjelljen për në banesën e fundit.

Familja e Presidentit Rugova posaçërisht falënderon dhe u shpreh mirënjohje të thellë gjithë qytetarëve të Kosovës për pjesëmarrje masive, civilizuese dhe dinjitoze në ceremonitë e përmortshme, për homazhe si dhe për përcjellje madhështore në ditën e funeralit. Gjatë atyre ditëve në sytë e botës u pa një Kosovë e vërtetë evropiane për të cilën ka punuar tërë jetën i dashuri ynë Presidenti Ibrahim Rugova dhe për të cilën insistonte që të njihet sa më parë si shtet i pavarur.