Republika e Gabonit njeh shtetin e Kosovës

**Zero Cool** · 09-09-11, 10:32

Republika e Gabonit njeh shtetin e Kosovës

Zëvendëskryeministri i parë i Qeverisë së Republikës së Kosovës, Behgjet Pacolli konfirmon zyrtarisht, ardhjen e njohjes së re për shtetin e Kosovës, nga Republika e Gabonit.

Njohja zyrtarisht i është konfirmuar zëvendëskryeministrit Pacolli, në orët e vonë të mbrëmjes së kaluar, në Gabon, nga udhëheqësit më të lartë të këtij shteti, thuhet në njoftimin për media të Zyrës së zëvendëskryeministrit Pacolli.

Më tej në njoftim thuhet se gjatë ditës do të ketë informata më të detajuara.

Në ueb faqen zyrtare të Ministrisë së Punëve të Jashtme figurojnë 81 shtete që kanë njohur pavarësinë e Kosovës, mirëpo pas keqkuptimit që ka ndodhur me njohjen nga Omani, Gaboni del të jetë shteti i 81-të që ka pranuar pavarësinë e Kosovës, e jo i 82.

Gaboni është një ndër shtetet e Afrikës së Mesme.

**Zero Cool** · 10-09-11, 13:51

Pacolli: Omani njeh pasaportat e Kosovës

Zëvendëskryeministri Behgjet Pacolli, pas kontakteve të fundit me përfaqësuesit e Sulltanatit të Omanit, sqaron se ky vend, është i gatshëm të vazhdoj thëllimin e marrëdhënieve diplomatike dhe ekonomike me Kosovën.

Sipas një njoftimi për medie dërguar nga zyra për informim e Zëvendëskryeministrit Pacolli, thuhet se “i është rikonfirmuar mbështetja e Omanit për popullin dhe Institucionet e Kosovës”.

“Sulltanati i Omanit njeh pasaportat e Republikës së Kosovës, duke mundësuar lëvizjen e lirë të qytetarëve, të mallrave, të ideve dhe bashkëpunimin ndërbiznesor”, thuhet mes tjerash në njoftim.

Ndërkaq, Pacolli thekson se çështja e njohjes nga Sulltanati i Omanit, po trajtohet me kujdes, pasi ky vend, sipas njoftimit, “edhe zyrtarisht pranon thëllimin e bashkëpunimit me Republikën e Pavarur të Kosovës”.

Ndryshe, Pacolli gjendet aktualisht në Afrikë në kuadër të angazhimeve lobuese për njohje të reja për shtetin e Kosovës. Mirëpo, zyra për informim thekson se emrat e vendeve të cilat do t’i vizitojë Pacolli gjatë ditëve në vijim, në këtë turne lobues, “tani për tani nuk do të bëhen publik”.