Policia nuk tërhiqet pa e marrë edhe 1-n

[Gloss]

05:08 Përfundojnë bisedimet ndërmjet EULEX-it dhe përfaqësuesëve të Serbisë. Priten vendime për tërheqjen ose jo të barrikadës

04:49 Ministri i Brendshëm, Bajram Rexhepi konfirmon për KTV se një polic është plagosur me granatë dore në këmbë. Zëdhënësi Brahim Sadria thotë se ai është jashtë rrezikut për jetën

04:23 AP e Reuters raportojnë për përpjekjet e Prishtinës për të marrë nën kontroll pjesën e saj veriore të kontestuar

04:01 Komandanti i KFOR-it, Erhard Buhler ka nisur një takim me shefin e ekipit negociator serb, Borko Stefanovic

03:49 KIM Radio raporton se Njësia Speciale po çarmatos policët serbë të Policisë së Kosovës

03: 43 Bogdanovic dhe Stefanovic që kanë mbërritur në veri janë në bisedime me përfaqësues të EULEX-it

03: 39 Një helikopter i KFOR-it vazhdon të fluturojë në pjesën veriore të vendit

03: 31 Portali Indeksonline mëson se Njësia Speciale e Policisë së Kosovës ka tentuar sërish zhbllokimin e rrugës dhe marrjen nën kontroll të Pikës 1, por nuk ia ka dalur.

03:24 Serbia ka "alarmuar" BE-në, NATO-n dhe OKB-në për aksionin e Policisë në veri të Kosovës

03:07 Rreth 200 serbë vazhdojnë të jenë të mbledhur tek pika 31, duke kërkuar largimin e forcave të Njësisë Speciale të Policisë së Kosovës

02: 49 EULEX: Hapat e njëanshëm janë të dëmshëm - Komunikata e plotë
"Është e rëndësishme që situata aktuale të zgjidhet në mënyrë të qetë dhe paqësore. EULEX po bashkëpunon ngushtë me KFOR-in për ta bërë këtë dhe për ta ruajtur sigurinë. EULEX nuk ka qenë në asnjë formë i përfshirë në aksionin e ndërmarrë nga Njësitë Speciale të Policisë së Kosovës. EULEX-i dhe Bashkimi Evropian në Bruksel e kanë bërë të qartë se çështja e vulave doganore duhet të zgjifhet nëpërmjet dialogut ndërmjet Prishtinës dhe Beogradit. Veprimet e njëanshme nga cilado palë nuk ndihmojnë aspak. Problemet duhet të zgjidhen në mënyrë paqësore”

02: 41 Karabinierët italianë janë ende në përkrahje të Policisë së Kosovës, në Rudare tek Pika 1, dhe pritet të ndihmojë marrjen nën kontroll edhe të kësaj pike.

02: 31 Komandanti i KFOR-it, Buhler dhe trupat e tij janë tërhequr nga Rudarja, duke u thënë serbëve që të shkojnë të flenë. Aty kanë mbetur forcat e Njësisë Speciale të Policisë së Republikës. Ato kanë marrë urdhër nga lart që të mos largohen, pa e marrë nën kontroll Pikën 1.

02:07 Policia e Kosovës ka arrestuar 4 serbë në Brnjak, tek pika 1, pas një përleshje me serbët lokalë

01 : 43 Një polic i Njësisë Speciale është lënduar lehtë gjatë aksionit në veri, dhe është evakuuar nga atje, raporton ARTA.
01: 26 Ka shkuar në 1500 numri i serbëve të mbledhur afër pikës kufitare 1, që janë të vendosur të mos lejojnë kalimin e Njësisë speciale për të marrë kontrollin e kësaj pike. KFOR-i po vazhdon negociatat me ta.

01:21 I ashtuquajturi ministër për Kosovën në qeverinë e Serbisë, Goran Bogdanovic bashkë me shefin e ekipit negociator, Borko Stefanoviq kanë ardhur me urgjencë në veri të Kosovës
01:16 KFOR-i ka dërguar një komunikatë, ku shefi i tij, Erhard Buhler ka bërë thirrje që të mos ketë eskalim të dhunës, dhe që të tregohet maturi, sepse KFOR-i është i gatshëm të veprojë për të ndaluar dhunën
01:10 Serbët kanë nisur të mblidhen tek ura kryesore në Mitrovicë, ku ka forca të KFOR-it dhe tashmë edhe të Njësisë Speciale të Policisë së Kosovës

01:04 RTK pohon se ushtarët e KFOR-it janë sulmuar me gurë në pikën 1, teksa Buhler po provon të bindë serbët që të lirojnë rrugën

00:51 RTV 21 raporton se serbët e mbledhur tek Pika 1, nuk po lëshojnë pe, dhe me kamionë, traktorë e buldozerë kanë bllokuar rrugë. Komandanti i KFOR-it, Buhler po negocion me Policinë e Kosovës dhe me përfaqësuesit serbë për ta liruar rrugën

00:51 Kuçi në KTV : "Nuk duam që me këtë aksion të frikësojmë serbët tanë në këtë pjesë dhe ky është një aksion normal. U bëj thirrje qytetarëve për qetësi e maturi"

00:44 Po vazhdon operacioni në veri të vendit, dhe sipas KTV-së ka makina të thyera të Policisë. Operacioni po udhëhiqet nga ana e Shpend Maxhunit, zv/drejtor i Operativës

00:34 Raportohet se në drejtim të veriut është nisur edhe vetë Komandanti i KFOR-it, Erhard Buhler

00: 26 Dhjetëra serbë kanë filluar një marsh drejt pikës 31. RTK njofton se bëhet fjalë për rreth 100 serbë me makinë. Ndërkohë në anën tjetër, njësitë speciale të Policisë janë në gjendje gatishmërie.

00: 16 Rexhepi: “E kami marrë nën kontroll 31, por nuk do të provokojmë situatën, dhe për shkak të bllokadës nuk do të mund të marrim njëherë pikën 1. Po provojmë të ruajmë edhe qytetarët dhe policinë”

00:13: Rexhepi: “Nuk ka pasur fare koordinim me EULEX-in. Kemi tentuar, por ata nuk kanë pasur gatishmërinë për të ndihmuar aksionin”

00:04: Bajram Rexhepi: “Kemi forca shtesë në rast nevoje. Policia e Kosovës nuk tërhiqet”

23:51 Korrespodenti i Kohës Ditore në Mitrovicë raporton se serbët e tubuar kanë gjuajtur me armë në drejtim të Policisë së Kosovës, ndërkohë që MUP-i ka bërë thirrje për mobilizim të serbëve për të bllokuar rrugët.

23: 48: Drejtorit të Policisë nuk iu kërkua mendimi për aksionin në veri, dhe ky ishtë një vendim i ministrit Rexhepi. Ai tha në KTV se nuk u lajmërua fare për dorëheqjen. Ish-drejtori Maliqi tha se ai ishte i gatshëm që vetë të udhëheqë në veri aksionin për marrjen e dy pikave kufitare. “Nuk qëndron. Unë kam pasur gjithmonë gatishmërinë për të treguar përkushtimin për vendin”, ka thënë Maliqi.

23:46: Megjithëse pika 31 është vënë në kontrollin e Policisë së Kosovës, pika 1 ende nuk është në duar të Policisë. Banorë serbë lokalë raportohet se e kanë bllokuar rrugën për në pikën 1. Forca të mëdha të Policisë po tentojnë që të bisedojnë me banorët serbë për ta zhbllokuar rrugën, por ende nuk është gjetur asnjë zgjidhje.

23:34: Oliver Ivanoviq: “Është vendim i pamenduar, që mund ta eskalojë situatën ndeshjëm në veri. Situata veç është e tensionuar"

23:29: Zv/kryeministrja Kusari – Lila – “ Duhet të kuptohet se Kosova është një njësi territorial dhe ligjet vlejnë në krejt territorin. Nuk mund të ketë dy zona doganore. Vendimi është në përputhje me Kushtetutën e Kosovës. Kemi shkuar atje për ta implementuar në tërësi vendimin për reciprocitetin."

23:12 Pika 1 tashmë është marrë nën kontroll, njofton RTK. Policia e Kosovës e ka njoftuar EULEX-in se është aty me urdhër të Ministrit të Brendshë, dhe ka për detyrë të ndalojë kamionët që hyjnë nga Serbia. Situata është e qetë.

23:04 Disa serbë në fshatrat e Leposaviqit kanë tentuar të bllokojnë kalimin e Njësisë Speciale në pikat kufitarë në veri.

22: 54 Forca të shumta të Njësisë Speciale janë nisur me urgjencë për në veri të vendit, me urdhër të kryeministrit Thaçi. Transmetuesi publik, RTK, bën me dije se policia ka shkuar për të marrë nën kontroll total pikat 1 dhe 31 të kufirit me Serbinë. Aksioni i Thaçit vjen për të respektuar reciprocitetin me Serbinë, vendim i marrë para pak ditësh. Në këto momente, raportohet se kryeministri Thaçi është duke zhvilluar takime me ndërkombëtarët.



Burimi: http://www.indeksonline.net/?page=1,2,5475

[Zero Cool]

Pika 1 dhe 31 nën kontroll të Policisë së Kosovës





Zëvendëskryeministri i vendit, Hajredin Kuçi konfirmoi të martën për Telegrafin se edhe pika doganore 1 është vendosur nën kontroll të autoriteteve të shtetit të Kosovës. Derisa, pika doganore 31 është vendosur mbrëmë nën kontroll, pika 1 është vendosur sot në orët e mëngjesit dhe në këtë pjesë të vendit pritet të arrijnë forca shtesë.
Ndërsa, gjatë një interviste në RTK, Kuçi theksoi se ky realisht është një aktivitet i rëndomtë që e ka policia e vendit për vënien e sundimit të ligjit, mirëpo sipas tij, kjo mund të duket ndryshe për situatën që ka qenë vendi.

Ai tha se duhet kuptuar si një aksion kushtetues, që për qëllim vënien e rendit dhe ligjit në këto dy pika. Sipas tij, një aksion i tillë ishte menduar të bëhet edhe në shtator të vitit të kaluar, por është shtyrë për shkak të zgjedhjeve.

Zëvendëskryeministri vlerësoi se aksioni është i menduar mirë dhe i konsultuar, megjithëse është vendim kryekëput i kryeministrit dhe në këtë rrjedhë institucionet e vendit janë linjën e parë.

Kuçi më tej vlerësoi se nuk duhet të ketë panik dhe të frikësohen serbët e asaj pjese, pasi sipas tij, e tëra po bëhet për vënien e sundimit të ligjit dhe shumë shpejt edhe qytetarët e asaj ane do të shohin se janë çliruar nga një pjesë e njerëzve që thirren në patriotizëm të rrejshëm.

Ai tha se aksioni i mbrëmshëm mund t’i pengojë vetëm atyre që merren me kontrabandë dhe jo atyre që dëshirojnë stabilitet dhe sundim të ligjit.

Zëvendëskryeministri konfirmoi se Policia e vendit ka bërë përgatitjet e duhura dhe qëllim do të jetë vendosja e doganierëve tanë. Ai tha se derisa pika 31 është marrë menjëherë në kontroll, në pikën 1 ka pasur pengesa për shkak të perceptimeve, mirëpo edhe kjo pikë është arritur në jetë nën kontroll në orët e mëngjesit të së martës.

Kuçi duke folur rreth aksionit tha se ka qenë vendor, ndërsa duke folur rreth bashkëpunimit tha se aksioni ka qenë mirë i menduar dhe i konsultuar, edhe pse sipas tij EULEX-i ndoshta nuk ka qenë ndihmues në këtë proces, por autoritetet vendore e kanë marrë barrën.

Ai tha se KFOR-i është duke e kryer punën e vet, ndërsa shprehu besimin se edhe EULEX-i do të ketë aktivitet shtesë. Sipas tij, edhe ata që kanë qenë hezitues të këtij aksioni do t’i shohin rezultatet pozitive.

Zëvendëskryeministri i ftoi qytetarët të jenë bashkëpunues me autoritetet vendore dhe ndërkombëtare, dhe shprehu besimin edhe KFOR-i edhe EULEX-i do ta kryejnë punën si duhet.
Sipas tij, institucionet e vendit nuk janë duke u ndeshur me askënd, por është aksion që ka për qëllim shtrimin e sovranitetit.

Ai tha se janë të vendosur që vendimin ta qojnë deri në fund dhe t’i kryejnë detyrat kushtetuese ashtu si duhet, por pa pasoja.

[Zero Cool]

REAGON SERBIA


Për aksionet e njësiteve të Policisë së Kosovës dhe marrjes nën kontroll të pikave 1 dhe 31 të doganave në veri të vendit, kanë reaguar edhe institucionet e Serbisë. ...


Presidenti i Serbisë, Boris Tadic dhe kryeministri, Mirko Cvetkoviq kanë kontaktuar menjëherë Komisionin Evropian, OKB-në, NATO-n dhe institucionet tjera ndërkombëtare, pas intervenimit të Policisë së Kosovës në veri për të marrë kontrollin në pikat kufitare me Serbinë.

[Zero Cool]

Serbët bllokojnë rrugën, situata e menaxhueshme


Serbët e veriut kanë bllokuar rrugën që shpie për në pikën doganore 1, si dhe bllokadë të rrugës ka edhe në rrugën për në pikën doganore 31. Megjithatë, Policia e Kosovës duke i mbajtur nën kontroll pikat doganore 1 dhe 31, ndërsa situatën në veri e konsideron të qetë dhe të menaxhueshme.
Korrespondenti i Telegrafit njofton se serbët e veriut kanë bllokuar rrugën në fshatin Rudar, që shpie për në pikën doganore 1.

Bllokadë të rrugës ka edhe në fshatin Zhazh, ku serbët kanë shkarkuar zhavorr mes rrugës për të pamundësuar qarkullimin e mjeteve në atë pjesë, gjegjësisht për në pikën doganore 31.

Pjesëtarë të KFOR-it shihen aktiv në këtë pjesë, ndërkohë më të rrallë janë kontrollet nga Policia e Kosovës.

Megjithatë, Policia e Kosovës duke i mbajtur nën kontroll pikat doganore 1 dhe 31, ndërsa situatën në veri e konsideron të qetë dhe të menaxhueshme.

[Zero Cool]

Vetëvendosje: Kurrsesi s’bën të zmbrapsemi tash


Lëvizja Vetëvendosje përmes një komunikate për media aksionin e Policisë së Kosovës për marrjen nën kontroll të pikave doganore 1 dhe 31 e quajti vendim të kuptueshëm, të drejtë dhe të arsyeshëm.
Sipas Vetëvendosjes vendimi për moslejimin e mallrave prej Serbisë në Kosovë, në kuadër të reciprocitetit karshi Serbisë, është praktikisht i pamundur të zbatohet pa i marrë nën kontroll këto dy pika doganore, “prandaj, vendimi i fundit i Qeverisë është i kuptueshëm, i arsyeshëm dhe i drejtë”.

“Me këtë rast, shpresojmë që nuk është menduar vetëm hapi i parë. Shpresojmë që qeveria ka nisur me zbatimin e një plani e një strategjie më të gjerë për ta bërë Kosovën sovrane e me integritet territorial. Nëse është menduar vetëm hapi i parë, atëherë mund të bëhet edhe më keq seç ka qenë deri më tash. Nëse nuk vazhdohet me ofensivë të vendosur deri në fund, pikat e marra nën kontroll mund të mos mbrohen gjatë...”, thuhet në komunikatë.

“Sidoqoftë, edhe nëse qeveria e Kosovës nuk ka menduar më shumë e më gjatë se këtë hapin e parë që e ndërmori, mungesa e planit dhe strategjisë duhen kompensuar me thirrjen e domosdoshme që qeveria dhe Presidentja duhet t’ia bëjnë gjithë popullit dhe shoqërisë sonë në mbrojtje të Kosovës në këto momente të jashtëzakonshme. Populli dhe qytetarët e Kosovës, qeveria dhe organet më të larta shtetërore, duhet të jenë në gjendje gatishmërie për njëri-tjetrin dhe së bashku të gatshëm për Kosovën. Ajo çfarë ndodh ose nuk ndodh brenda disa ditëve në kohëra si kjo, kollaj mund të përcaktojë periudha të tëra prej disa dekadave më pastaj”, thuhet më tej në komunikatën e Vetëvendosjes.

Sipas tyre, shteti i Kosovës kurrsesi nuk bën të zmbrapset tash. “Populli dhe institucionet e Kosovës tash duhet të jenë vigjilentë dhe të organizuar për ta mbrojtur Kosovën, për ta mbështetur pa kursim policinë e Kosovës që e mbron Kosovën. Organizimi i përbashkët i popullit, institucioneve dhe subjekteve politike e shoqërore do ta përshpejtonte dhe lehtësonte fitoren. Lëvizja VETËVENDOSJE!, me të gjithë aktivistët dhe anëtarët e saj, është e gatshme dhe shumë e interesuar që të kontribuojë për këtë. Tash është koha që institucionet më të larta shtetërore të mos administrojnë teknikisht por të prijnë politikisht”.

[Zero Cool]

AAK inkurajon Qeverinë për aksionin në veri



Aleanca për Ardhmërinë e Kosovës inkurajon Qeverinë e Kosovës që me vendosmëri të përfundojë operacionin policor në veri të Kosovës.
AAK është e bindur se situata e krijuar për vite me radhë në veri të Kosovës është problem i mungesës së sundimit të ligjit dhe meriton trajtim të tillë nga institucionet vendore dhe ndërkombëtare.

“Aleanca për Ardhmërinë e Kosovës (AAK) po përcjellë me kujdes zhvillimet e fundit në veri të Kosovës. Duke pasur parasysh nevojën jetike për rivendosjen e kontrollit shtetëror legjitim në atë pjesë të Kosovës dhe posaçërisht në pikat kufitare-doganore 1 dhe 31, vlerësojmë se operacioni i Policisë së Kosovës duhet të rezultojë me krijimin e mundësisë për zbatimin e Kushtetutës dhe ligjeve në veri të vendit”, thuhet në komunikatë.

AAK inkurajon Qeverinë e Kosovës që me vendosmëri të përfundojë operacionin policor në veri të Kosovës, në mënyrë që atje të vendoset siguria publike dhe qytetarëve të asaj pjese t’u sigurohet të drejtat e njeriut.

“Kujdesi i shtuar dhe profesionalizmi në realizimin e operacionit është tejet i rëndësishëm për ruajtjen e jetës së qytetarëve të Kosovës në atë pjesë dhe oficerëve policorë. Ne çmojmë vullnetin e oficerëve të Njësive Speciale të Policisë për detyrën ndaj vendit, duke qenë të bindur në përgatitjet e larta fizike dhe profesionale të tyre”, thuhet në komunikatë.

Në të njëjtën kohë, AAK fton Qeverinë e Kosovës që të koordinojë plotësisht aktivitetet e veta me KFOR-in, si garantues i sigurisë së përgjithshme të vendit.

AAK thotë se ka insistuar që nga pjesa e parë e vitit 2008 që autoriteti i shtetit të përdoret për të vendosur rendin dhe ligjin në tërë territorin e Kosovës, si e drejtë e pakontestueshme sovrane e Republikës së Kosovës.

“Dëmet e deritashme që i janë shkaktuar shtetit dhe popullit të Kosovës kërkojnë adresim shtetëror, prandaj angazhimi i trupave speciale të Policisë së Kosovës ka qenë i pashmangshëm”, thuhet në komunikatën e AAK-së.

[Arb]

Ngushellime familjes se te ndjerit!

Ngushellime edhe kolegeve te tij!

[uck_aksh]

Prishtinë, 26.07.2011(23.00) Nga QKUK-ja u bë e ditur, se megjithë përpjekjet e mëdha që u bën për t’ia shpëtuar jetën, nga plagët e marra në veri të Kosovës, ka vdekur pjesëtari i Policisë së Kosovës, Enver Zymberi (1979), baba i tre fëmijëve, nga Dubovci i Vushtrrisë


ngushllime familjes farefisit kolegeve edhe mbar popullit Shqiptar

[Zero Cool]

Enver Zymberit, Heroit të Sovranitetit Dardan

Ngushllime familjes, te afermeve te tij dhe te gjithe atyre qe ndjejne dhembje.

[Zero Cool]

ROSU është tërhequr nga veriu





Njësitet speciale të Policisë së Kosovës ,“ROSU” kanë përmbushur detyrat e tyre dhe janë tërhequr nga veriu i Kosovës, bëjnë të ditur Zyrtarët e Policisë së Kosovës.

Zëdhënësi i kësaj policie, Brahim Sadriu, i ka thënë Radios Evropa e lirë, se në vendkalimet kufitare tashmë janë njësitet kufitare të policisë së Kosovës dhe doganierët.

“Mund të them se njësitet speciale e kanë kryer detyrën e tyre, për të cilën ishin ngarkuar. Kanë shkuar në vendkalimet kufitare, e kanë vënë situatën nën kontroll dhe ua kanë mundësuar që ta kryejnë detyrën e tyre njësive kufitare dhe doganave të Kosovës”, ka thënë Sadriu.

Ai gjithashtu ka theksuar se gjatë natës, por edhe tash, situata e sigurisë në veri është e qetë.

[Neferta]

Presidentja Jahjaga dekoron Enver Zymberin me urdhrin "Hero i Kosovës"

Prishtinë, 27 korrik 2011 - Presidentja e Republikës, zonja Atifete Jahjaga, ka marrë sot vendim që Enver Zymberi, polic i njësisë speciale të Policisë së Kosovës, i vrarë në krye të detyrës, të dekorohet me urdhrin "Hero i Kosovës", me motivacion "për trimërinë dhe përkushtimin e treguar deri në flijim për vendosjen e sundimit të ligjit në tërë territorin e Republikës së Kosovës". Vendimi u mor në bazë të Kushtetutës së Republikës së Kosovës, neni 84, pika 28, si dhe në bazë të Rregullores për Dekoratat, Urdhrat dhe Titujt e Nderit të Kosovës, që i jep Presidentja e Kosovës dhe Procedurat e Dhënies së tyre, nenet 3 dhe 5. Urdhri "Hero i Kosovës" u jepet qytetarëve të Republikës së Kosovës dhe të huaj, të kohëve moderne, nga Lidhja e Prizrenit e këndej, që kanë bërë vepra trimërie për lirinë dhe pavarësinë e Kosovës. Varrimi i policit Enver Zymberi do të bëhet me të gjitha ceremonitë dhe nderimet që janë të parapara për Heroin e Kosovës. Presidentja Jahjaga medaljen do t'ia dorëzojë familjes Zymberi në një ceremoni të veçantë.