UÇK zanafilla

[Zero Cool]

BOTA SOT(reviale) 13 tetor 1996

DOKUMENTE TË TERRORIT GJYQËSOR NË KOSOVË

Më datën 4 tetor 1996 Gjykata e instaluar serbe në Prishtinë, në vazhdën e fushatës së saj antishqiptare, ka lëshuar aktvendimin mbi zhvillimin e hetimeve kundër 15 qytetarëve të Republikës së Kosovës për kinse përkatësinë e tyre në një organizatë (të paemër) “terroriste“ shqiptare, të cilës policia dhe gjyqësia e okupatorëve përpiqet t’ia atribuojë një varg aksionesh të armatosura që kanë ngjarë në Kosovë viteve të fundit. Më poshtë po japim pa ndryshime këtë Aktvendim:

“GJYQTARI HETUES I GJYKATËS SË QARKUT NË PRISHTINË,
Danica Marinkoviqi, në lëndën penale të të pandehurit Besim Rama etj., për shkak të veprës penale terrorizmi, nga neni 125 i LPJ, lidhur me nenin 19 të LPJ, duke vendosur sipas kërkesës për zbatimin e hetimeve të PPQ në Prishtinë PP. nr. 139/96 nga data 4.X.1996 me datën 6.X. 1 996 merr këtë:

AKTVENDIM MBI ZBATIMIN E HETIMEVE KUNDËR:

1. Besim Ramës, i biri i Sokolit dhe i nënës Hanife, e lindur Abdullahu, i lindur më 13.VII.1965 në fshatin Prekaz i Epërm, komuna e Sërbicës, shqiptar, shtetas i RFJ, i martuar, baba i një fëmije, ka të kryer shkollën fillore, përkohësisht i liruar nga shërbimi ushtarak, mbahet i evidentuar në EU-KK Sërbicë, më parë i gjykuar, në paraburgim gjendet nga data 29. IX.1996,

2. Avni Nura, i biri i Ismajlit dhe nënës Halime, e lindur Istogu, i lindur më 20.l.l974 në fshatin Prellovc, komuna e Sërbicës, ku edhe jeton, shqiptar, shtetas i RFJ, i pamartuar, me profesion bujk, ka të kryer 2 vjet të shkollës së mesme, shërbimin ushtarak të parregulluar, më parë kinse i pagjykuar, në paraburgim gjendet nga data 29. IX.1996.

3. Adem Jashari, i biri i Shabanit, i lindur më 28.XI.1955 në Prekazin e Ulët, komuna e Sërbicës, shqiptar, i martuar, bujk, gjendet në arrati.

4. Jakup Nura, i biri i Ismajlit dhe nënës Halime, e lindur Istogu, i lindur më 13. II.1966, në fshatin Prellovc, komuna e Sërbicës, shqiptar, shtetas i RFJ, i martuar, bujk, gjendet në arrati.

5. Fadil Kadriu, i biri i Shaqirit, i lindur më 19.XI.1965, në Prekazin e Ulët, komuna e Sërbicës, shqiptar, shtetas i RFJ, i pamartuar, gjendet në arrati.

6. Nuredin Lushtaku, i biri i Jetullahut, i lindur më 27. II.1967 në fshatin Prekaz i Ulët, komuna e Sërbicës, shqiptar, shtetas i RFJ, gjendet në arrati.

7. Sahit Jashari, i biri i Hamitit, i lindur më 9. II.1963, në Prekazin e Ulët, komuna e Sërbicës, shqiptar, shtetas i RFJ, i martuar, bujk, gjendet në arrati.

8. Rafet Rama, i biri i Osmanit, i lindur më 5.XII.1971, në Prekazin e Epërm, komuna e Sërbicës, shqiptar, shtetas i RFJ, gjendet në arrati.

9. Sami Lushtaku, i biri i Milaimit, i lindur më 20. II.1961, në Prekazin e Ulët, komuna e Sërbicës, shqiptar, shtetas i RFJ, bujk, gjendet në arrati.

10. Iljaz Kadriu, i biri i Ismajlit, i lindur më 3.V.1966 në Prekazin e Ulët, komuna e Sërbicës, shqiptar, shtetas i RFJ, i pamartuar, gjendet në arrati.

11. Rexhep Selimi, i biri i Destanit, i lindur më 15. III.1971 në Ovçarevë, komuna e Sërbicës, shqiptar, shtetas i RFJ, student, gjendet në arrati.

12. Hashim Thaçi, i biri i Haxhiut, i lindur më 24. IV.1968 në fshatin Broçna, komuna e Sërbicës, shqiptar, shtetas i RFJ, gjendet në arrati.

13. Zenun Kadriu, i biri i Feratit, i lindur më 10. IX.1963 në Prekazin e Ulët, komuna e Sërbicës, shqiptar, shtetas i RFJ, gjendet në arrati.

14. Ali Jonuzi, i biri i Sabitit, i lindur më 28. II.1956 në fshatin Pasush, komuna e Vuçitërnës, jeton në Vuçitërnë, rruga VJ. nr. 13, shqiptar, shtetas i RFJ, gjendet në
arrati.

15. Idriz Asllani, i biri i Halitit, i lindur më 2. I.1954 në fshatin Tërstenë, komuna e Mitrovicës, jeton në Vuçitërnë, rruga Sutjeska nr. 15, shqiptar, shtetas i RFJ, gjendet në arrati (Sipas mjeteve të informimit ndërkohë Idriz Asllani është arrestuar (vërejtje e Red së ZiK).

SEPSE
Ekziston dyshimi i bazuar se në gjysmën e dytë të vitit 1992, pas qëndrimit të tyre në Republikën e Shqipërisë, ku së bashku ushtarakisht janë stërvitur me pjesëtarët e armatës shqiptare nën komandën e eprorëve të tyre, në territorin e komunës së Sërbicës kanë formuar grupin terrorist armiqësor dhe së bashku me shumë persona ende të paidentifikuar janë bërë anëtarë të të njëjtit grup, kanë filluar armatosjen e grupit dhe për këtë qëllim kanë siguruar sasi të madhe të armëve, municionit dhe të mjeteve eksplozive, pushkë, automatikë, pushkë me snajper, revolverë, bomba dore, mina të trombllonës dhe pajisje të ndryshme ushtarake, prej tyre një pjesë e kanë sjellë nga Republika e Shqipërisë, pastaj rregullisht, nga gjysma e dytë e vitit 1992 e deri në fund të shtatorit të vitit 1976, në mal, në afërsi të fshatit Prekaz i Ulët, kanë stërvitur shkathtësitë ushtarake, përdorimin e armëve të zjarrit, rregullisht kanë stërvitur në gjuajtjen e tyre në shenjë, kanë mbajtur mbledhje ilegale, më së shpeshti në Prekazin e Ulët, në të cilat mbledhje janë marrë vesh dhe kanë planifikuar kryerjen e aksioneve terroriste në territorin e komunës së Gllogovcit, Pejës, Vuçitërnës dhe Mitrovicës dhe pas këtyre pregatitjeve të bëra me qëllim të rrezikimit të rregullimit kushtetues dhe sigurimit të RFJ kanë ndërmarrë aktet e dhunës në territoret e këtyre komunave, sipas marrëveshjes paraprake, në të njëjtën kohë dhe në bashkëveprim me grupet e tjera terroriste, të cilat këto akte në mënyrë kontinuive i kanë kryer në territorin e Kosovës, me ç’rast me dashje kanë privuar nga jeta 4 persona dhe kanë tentuar që t’i privojnë edhe 16-të persona të tjerë, me çka te qytetarët kanë krijuar ndjenjën e pasigurisë, ashtu që:

1. BESIM RAMA, JAKUP NURA, HASHIM THAÇI DHE AVNI NURA

Sipas marrëveshjes paraprake, natën në mes të datës 13 dhe 14.5.1993 të pandehurit Besim Rama, Jakup Nura dhe Avni Nura janë takuar në shtëpinë e të pandehurve Jakup dhe Avni Nurës në fshatin Prellovc dhe pas marrëveshjes së shkurtër, me automjetin e Jakup Nurës, Opel-Monta, kanë shkuar deri në Gllogovc, e pastaj i pandehuri Avni Nura automjetin e përmendur e ka kthyer në fshatin Prellovc, që sipas marrëveshjes, pas aksionit në shtëpinë e vet të sigurojë pranimin, fshehjen dhe vendosjen, ndërsa të pandehurit Besim Rama dhe Jakup Nura, po ashtu sipas marrëveshjes paraprake me të pandehurin Hashim Thaçi, janë takuar në afërsi të kalimit hekurudhor në afërsi të Gllogovcit dhe të armatosur, të pandehurit Hashim Thaçi dhe Besim Rama me pushkë automatike, ndërsa i pandehuri Jakup Nura me pushkë automatike, revolver dhe bomba dore, kanë vënë pritën në afërsi të rrugës në kalimin hekurudhor, me qëllim që në momentin e kalimit të automjeteve të MPB-së të hapin zjarr nga pushkët automatike dhe t’i privojnë nga jeta personat në automjet, mirëpo deri te kjo nuk është ardhur për shkak se në periudhën prej afër një ore derisa kanë qenë në pritje nuk ka kaluar asnjë automjet i policisë, pastaj janë tërhequr, i pandehuri Hashimi ka shkuar në drejtim të shtëpisë së vet, ndërsa të pandehurit Besimi dhe Jakupi në Prellovc, në shtëpinë e të pandehurve Jakup dhe Avni Nura, të cilët kanë bërë roje para shtëpisë së tyre derisa kanë pushuar Besim Rama dhe Jakup Nura, me këtë në bashkëveprim kishin për të kryer veprën penale të terrorizmit me tentativë nga neni 125 të LPJ, lidhur me nenin 19 të LPJ.