[Lona]

Në një sulm të Al Kaidës në Bagdad, vriten të paktën 18 njerëz

Bagdad, 23 nëntor - Luftëtarë të grupit terrorist të Al Kaidës kanë rrëmbyer në jug të Bagdadit dy automjete të blinduara të forcave irakiane të sigurimit dhe me to pastaj kanë sulmuar një bazë të milicëve sunitë, të cilët bashkëpunojnë me ushtrinë amerikane. Sipas të dhënave të policisë, në këtë sulm janë vrarë të paktën 18 njerëz. Në luftime janë përfshirë edhe avionë dhe helikopterë amerikanë. Në mbrëmje, disa granata kanë rënë në zonën e sigurisë në Bagdad, ku ndodhen edhe ambasada amerikane dhe selia e kabinetit qeveritar irakian. Nga grantat janë plagosur disa persona.

Në Shkup u përurua Instituti për Trashëgimi Kulturore dhe Shpirtërore të Shqiptarëve

Shkup, 23 nëntor - Me rastin e 99-vjetorit të Kongresit të Alfabetit Shqip, dje në Shkup në prani të përfaqësuesve të jetës politike, kulturore dhe diplomatike, dhe personaliteteve akademike nga mbarë hapësira shqiptare, solemnisht u përurua Instituti për Trashëgimi Kulturore dhe Shpirtërore të Shqiptarëve "Pjetër Bogdani". Instituti, selia e të cilit ndodhet në Çarshinë e Vjetër të Shkupit, do të përbëhet nga sektori për Histori Shqiptare, Demografi, Etnologji, Histori e Artit dhe Histori për lidhje Kulturore dhe Gjuhësore. Instituti do të financohet nga buxheti shtetëror, ndërsa mbështetje profesionale është paraparë të ketë edhe nga Instituti i Kosovës dhe ai Shqipërisë. Me hapjen e institutit dhe organizimin e një tribune shkencore kushtuar Kongresit të Manastirit , në Maqedoni filluan "Ditët e Kulturës Shqiptare" të cilat deri më 28 nëntor në Ditën e Flamurit, do të shoqërohen me një varg aktivitetesh kulturore dhe shkencore. Me vendim të Qeverisë, dita e sotme që shënon 99 vjetorin e Kongresit të Alfabetit Shqip është shpallur festë shtetërore.


Pas 10 dhjetorit, patjetër do të shpallet pavarësia, thotë Ekipi i Unitetit

Prishtinë, 23 nëntor - Ekipi i Unitetit tha se nuk mund të ketë zvarritje të tjera për statusin e Kosovës, sepse pas 10 dhjetorit, hapi i parë i palës kosovare patjetër do të jetë shpallja e pavarësisë dhe kërkesa zyrtare për njohjen e shtetit të Kosovës. Ekipi i Unitetit po ashtu ka konfirmuar se çfarëdo marrëveshje që nënkupton më pak se pavarësi dhe lidhje strukturore më Serbinë do të jetë të papranueshme. Zëdhënësi Skënder Hyseni tha se Ekipi i Unitetit të dielën do të udhëtojë për në takimin e fundit negociator i cili zhvillohet në Baden të Austrisë. Gjatë dy ditëve do të zhvillohen një seri takimesh bilaterale në mes treshes dhe delegacioneve përkatëse të Prishtinës dhe Beogradit si dhe do të ketë dy takime trepaleshe në mes treshes dhe delegacioneve përkatëse të Prishtinës dhe Beogradit. Hyseni shprehu qëndrimin e EU së se çfarëdo marrëveshje që nënkupton më pak se pavarësi dhe lidhje strukturore më Serbinë çfarëdo qoftë ajo, për palën kosovare do të jetë e papranueshme. Sipas tij, pas 10 dhjetorit do të ketë një vendim për Kosovën, i cili do të jetë i koordinuar ngushtë më faktorët kyç ndërkombëtarë dhe ata që përkrahin pavarësinë e Kosovës "10 dhjetori do të vijë dhe pas kësaj date do të ketë vendime të duhura për hapin e parë që duhet bërë, siç është shpallja e pavarësisë së Kosovës dhe kërkesa zyrtare për njohjen e saj", shpjegoi Hyseni. Ai tha se Kosova është e përkushtuar që çdo veprim të saj ta koordinojë ngushtë më faktorët kyç ndërkombëtarë dhe faktorët kyç përkrahës të pavarësisë së Kosovës pas rekomandimeve të Ahtisarit. "Nuk mund të ketë zvarritje mas 10 dhjetorit. Ekipi i Unitetit e ka bërë të qartë se deri më 10 dhjetor do të bashkëpunojë dhe do të jetë shumë konstruktiv, ku pas kësaj date institucionet e vendit do të marrin vendimet e duhura", bëri të ditur Hyseni. Ai shtoi ndër tjera se pala kosovare është e interesuar të ketë një rezolutë në OKB, duke qenë këmbëngulëse që çështja e pavarësisë të mos mbetet peng e dëshirës apo mungesës së një pale për të kaluar një rezolutë në përkrahje të pavarësisë së Kosovës. Ky do të jetë takimi i fundit në kuadër të bisedimeve shtesë për statusin dhe është planifikuar të zgjasë 3 ditë.

Nëse s'ka zgjidhje deri më 10 dhjetor, duhet rikthyer planit të Ahtisarit, tha Reinar

Prishtinë, 23 nëntor Shefi i deritashëm i Zyrës franceze në Prishtinë, ambasadori Thieri Reinar, tha sot se në rast se nuk gjendet një zgjidhje për statusin e Kosovës, atëherë bashkësia ndërkombëtare do t'i rikthehet planit të ndërmjetësit Marti Ahtisari, i cili rekomandon pavarësi me mbikëqyrje ndërkombëtare. Pas takimit lamtumirës me Presidentin e Kosovës, Fatmir Sejdiu, Reinar vlerësoi pozitivisht arritjet gjatë këtyre tri viteve në vendin tonë. Diplomati francez lavdëroi punën e Ekipit të Unitetit në procesin negociator për zgjidhjen e statusit të Kosovës dhe ka rikujtuar se ishte ideja e Presidentit Sarkozi në muajin korrik, kur kishte dështuar arritja e marrëveshjes për Kosovën në KB të, që të shkohet me negociata shtesë 120 ditore për t'i dhënë palëve negociuese edhe një rast që të arrijnë marrëveshje. "Ne shpresojmë ende se ka gjasa që të arrihet një marrëveshje për statusin e Kosovës dhe do të shohim se çfarë do të ndodhë pas 10 dhjetorit. Por, nëse nuk do të ketë zgjidhje deri më 10 dhjetor, duhet t'i kthehemi planit të Ahtisarit, i cili është kompromisi më i mirë në tavolinë", u shpreh Reinar. Ai ka shtuar se Franca është duke u munduar që të marrë ndryshime pozitive nga Rusia dhe Serbia dhe të pranojnë dokumentin e fundit të Treshes ndërkombëtare. Reinar tha se propozimi i Ishingerit ka pasur një bazë mjaft të mirë dhe shpreson se do të arrihet një zgjidhje deri në fund të këtij procesi, takimi i fundit i të cilit do të mbahet nga 26 28 nëntor në Baden të Austrisë. "Qëndrimi i Francës është që BE duhet të dërgojë misionin diplomatik që të përgatisë monitorimin nga ana e misionit të BE së në sektorin e gjyqësorit dhe policisë. Gjatë kësaj kohe lidershipi kosovar duhet të qëndrojë i bashkuar dhe të punojë në koordinim me bashkësinë ndërkombëtare për gjetjen e zgjidhjes për statusin e Kosovës", porositi diplomati francez. Në anën tjetër, Presidenti i Kosovës, Fatmir Sejdiu, vlerësoi se Tieri Reinar ka qenë, është dhe do të mbetet një mik i Kosovës, popullit dhe i vizionit të saj për pavarësi. Sejdiu tha se në këtë kohë të definimit të statusit të Kosovës, Franca gjatë gjithë kohës ka dhënë një mbështetje të fuqishme dhe këtë do të vazhdojë ta japë. "Për tri vjet sa ka qenë në këtë detyrë, me ambasadorin Reinar, kemi pasur kontakte të mira, e sidomos në dy vitet e fundit të bisedimeve", tha Sejdiu, duke shtuar se Reinar ka qenë jashtëzakonisht i angazhuar që të përcjellë mesazhet e qarta të Francës në përkrahje të procesit të Ahtisarit dhe të gjithë proceseve që kanë të bëjnë me përfundimin sa më të shpejt të statusit të Kosovës. Ndërkaq, në interesimin e gazetarëve lidhur me pozicionin e Presidentit të Kosovës pas zgjedhjeve të nëntorit, Sejdiu tha se po pret certifikimin e rezultatateve finale. "Është me rëndësi që të respektohet çdo gjë që duhet të respektohet në kuptimin e dispozitave ligjore dhe kushtetuese. Është me rëndësi që institucionet e Kosovës të bëhen dhe ndërtohen sa më shpejt. Unë insistoj që të jem në mandat dhe të kryej detyrën time derisa të mos ketë një vendim tjetër", shpjegoi Presidenti Sejdiu dhe shtoi: "Është dëshirë imja që të jem në funksion të së ardhmes së mirë të Kosovës në këtë kohë dhe të punoj në mandatin që kam".