[Lona]

Nga shpërthime bombash në Irak, vriten ose plagosen mbi 60 njerëz

Basra, Irak, 12 dhjetor – Nga shpërthime bombash në kryeqytetin shiitë Basra, të provincës Majsan, në jug të Irakut janë vrarë ose janë plagosur sot (e mërkurë) mbi 60 njerëz, kanë bërë të ditur burime spitalore, njofton Rojter. Bombat shpërthyen në një parking automjetesh dhe në një treg në qytetin Amara. Një televizion irakian ka thënë se kanë qenë tri shpërthime. Ndërkaq, BBCVorld bën të ditur se sipas policisë irakiane në tri shpërthime me makina bombë në qytetin irakian Amara, 350 km në jug të Bagdadit, janë vrarë rreth 30 njerëz dhe janë plagosur 47 të tjerë.

Tribunali i Hagës dënon ish-gjeneralin serb me 33 vjet burg për granatimin e Sarajevës

Hagë, 12 dhjetor – Tribunali i Kombeve të Bashkuara ka dënuar sot (e mërkurë) ish-gjeneralin serb të Bosnjës me 33 vjet burg për urdhërimin e granatimit të përgjakshëm të Sarajevës dhe terrorizimin e civilëve gjatë luftës në Bosnjë në vitet 1992-1995, njofton Rojter. Gjykatësit e shpallën fajtor Dragomir Milosheviqin për krime që përfshijnë përgjegjësinë për terror, vrasje dhe sulme kundër civilëve.

Nga një zjarr në një ndërtesë 28-katëshe në Kinë, vdesin të paktën 19 njerëz

Pekin, 12 dhjetor – Nga një zjarr që ka shpërthyer në një shitore në katin përdhesë dhe pastaj flaka është ngjitur në bllokun e apartamenteve të epërme, kanë vdekur sot (e mërkurë) të paktën 19 njerëz, kanë bërë të ditur mediet, njofton Rojter. Nga shpërthimi kanë mbetur të ngujuar shumë njerëz në një ndërtesë 28-katëshe në qytetin Venzhou në provincën bregdetare Zhejiang. Mbi 100 njerëz janë shpëtuar deri tash, kurse puna për shpëtimin e të tjerëve po vazhdon.

Nga një shpërthim i një makine bombë afër Bejrutit, vritet një gjeneral i armatës libaneze

Bejrut, 12 dhjetor – Nga një shpërthim i një makine bombë në periferinë e pasur të krishterë afër Bejrutit është vrarë sot (e mërkurë) një gjeneral i armatës libaneze, i cili pritej të merrte postin e shefit të armatës nga gjenerali Mishel Suleiman, i cili është bërë president, njofton Rojter. Në këtë sulm është vrarë gjeneral brigade, Francois al-Haxh, udhëheqës operativ i armatës dhe disa truproje. Shpërthimi, që ndodhi në Bakuba, goditi makinën e tij, thuhet në kumtesën ushtarake.