[Guri i madh]

E shtunë, 28. Dhjetor, 2002 Dr. RUGOVA:"KËRKOJMË NJOHJEN E DREJTËPËRDREJT TË PAVARËSISË..."



Intervistë e Radios Evropa e Lirë me kryetarin e Kosovës, Dr. Ibrahim Rugova

RFE/RL: Zoti president, kohët e fundit është ngritur çështja e statusit përfundimtar të Kosovës dhe standardet që duhet të përmbushen për të mundësuar fillimin e diskutimeve mbi këtë status. Sa ka baza reale për përmbushjen e këtyre standardeve, duke pasur parasysh kompetencat që keni Ju, institucionet vendore?

Dr. Ibrahim RUGOVA
Ju e dini se unë insistoj që pavarësia e Kosovës të njihet drejtpërdrejt nga Shtetet e Bashkuara, nga Bashkimi Evropian dhe nga OKB-ja që do ta formalizonte. Ka mendime të ndryshme se duhet bërë sërish diskutim për statusin, do të thotë për pavarësinë e Kosovës. Ju e dini se ne i kemi kryer një palë diskutime në Paris dhe atëherë pala tjetër nuk ka pranuar dhe është ndëshkuar, pastaj intervenimi i NATO-s, situata e re e krijuar qe tri vjet e gjysmë në Kosovë, pra progresi, realiteti i ri, të gjitha, pra, janë parakushte që të njihet drejtpërdrejt Kosova. Sa u përket standardeve, ne qe tri vjet e gjysmë punojmë në këto standarde. Tash kohët e fundit, kryeadministratori Steiner i ka reduktuar në pesë-gjashtë pika, që, “de facto” janë të gjitha ato në të cilat kemi punuar qe tri vjet e gjysmë. Them se më përpara duhet të njihet pavarësia e Kosovës ose nëse shkojmë me këto terma që po thonë statusi para standardeve, ose pas standardeve, UNMIK-u do të vazhdonte atëherë me një formë më të reduktuar, ndërsa NATO-ja do të kishte baza këtu përgjithmonë, pasi do të jemi anëtar i NATO-s, anëtar i Bashkimit Evropian dhe do bënte sigurinë e Kosovës dhe ne sigurisht do të forcoheshim në planin e sigurisë.

RFE/RL: Zoti president, ndërkohë që Ju vazhdimisht keni kërkuar njohjen formale të pavarësisë së Kosovës, siç thatë edhe tash, tani kanë filluar të përmenden edhe afate kohore për zgjidhjen përfundimtare të statusit. Kur mendoni Ju në fakt se do të përcaktohet statusi i Kosovës?

Dr. Ibrahim RUGOVA
Unë mendoj sa më shpejt, sot ose nesër, me njohjen e drejtpërdrejtë. Ndërkohë, ka spekulime të ndryshme se mund të fillohet vitin e ardhshëm ose më vonë, ose më herët etj., por unë më shumë i marr këto si spekulime pozitive. Por, është me rëndësi që tash po flitet për këtë çështje, pra që duhet të njihet Kosova edhe në planin ndërkombëatr dhe kjo është pozitive, me të gjitha spekulimet dhe parashikimet e ndryshme.

RFE/RL: Kur flasim për kompetencat, zoti president, Ju keni emëruar ish-senatorin Bob Dol ambasador nderi të Kosovës në Shtetet e Bashkuara të Amerikës, emërim ky që është kontestuar nga misioni i Kombeve të Bashkuara në Kosovë. Cila duket të jetë zgjidhja për këtë problem?

Dr. Ibrahim RUGOVA
Ka pasur keqkuptime këtu. Natyrisht, po e them edhe për ju se, ne dy vite kemi punuar me UNMIK-un bashkë, nëse ju kujtohet KPA, qeveria e përbashkët dhe një këshill i vogël. Ndërsa, prej fillimit të këtij viti, me konstituimin e institucioneve të Kosovës, tash punojmë në dy vija, pra janë institucionet e Kosovës dhe UNMIK-u. Në këtë plan duhet të krijojmë forma më produktive të bashkëpunimit edhe të komunikimit. Sa i përket emërimit të senatorit Dol, ky ishte një nder për mua dhe për popullin e Kosovës që ta emërojmë. E kam bërë në bazë të kompetencave të mia. Është një pikë atje ku flitet se presidenti i Kosovës ka të drejtë në mirënjohje, falënderime dhe emërtime të ndryshme, ndërsa pika tjetër, sa i përket anës zyrtare në planin ndërkombëtar, kam të drejtë të marr masa në planin ndërkombëtar dhe të hap zyra të reja të përfaqësimit të Kosovës, në bashkëpunim me administratorin Steiner. Gjithsesi, është i plotfuqishëm ai vendim dhe zoti Dol të vazhdojë të punojë. Këto, më shumë ishin keqkuptime, në përgjithësi. Sa u përket kompetencave që i përmendët, duhet që gradualisht të barten kompetencat tek institucionet e Kosovës. Përndryshe, nëse ngadalësohen, atëherë mund të shkojmë në dy binarë, ne edhe UNMIK-u. Ai konflikt i interesave duhet të zgjidhet, prandaj të mos mbetemi pushtet moral, por gradualisht duhet të barten kompetencat, të mos e harrojmë këtë.

RFE/RL: Në funksion të përcaktimit të këtij statusi, Ju keni propozuar që Kosova të ketë simbolet e veta. A mendoni se simbolet që Ju keni propozuar do të jenë të pranueshme për të gjitha palët?