[AbdylHabib]

Veriu – pak gjasa të kthehet nën qeverisjen e Kosovës

Analisti britanik, Tim Judah ka vlerësuar se gjendja në veri të Kosovës tash 10 vjet është një konflikt i ngrirë dhe sipas tij me pak gjasa të integrimit të plotë në sistemin qeverisës të Kosovës. Në një intervistë për Radion Evropa e Lirë, Judah ka thënë po ashtu se, “bashkësia ndërkombëtare nuk do të lejojë këmbim territoresh”.

Judah është i mendimit se gjërat në veri të Kosovës, do të vazhdojnë të zhvillohen pak a shumë ashtu siç janë tani. “Mendoj se është mjaft e mundshme që të gjendet një formë më e mirë e ‘modus vivendit’ pas një viti, veçanërisht nëse ka rënie të ndikimit të njerëzve siç është Marko Jakshiq’, ka thënë ai.

Sidoqoftë, Judah nuk është aq optimist për integrimin e plotë të veriut në sistemin e qeverisjes së Kosovës. “Nuk besoj se veriu papritur do të bëhet pjesë që ndjen, frymon dhe jeton në Kosovë, ashtu siç bëjnë pjesët tjera. Kjo qartazi nuk do të ndodhë”, tha ai.

Ndërkaq i pyetur për disa ide që janë shfaqur së fundi për shkëmbim territoresh midis një pjese të veriut të Kosovës dhe jugut të Serbisë, Judah nuk mendon se është e pranueshme, të paktën jo për një të ardhme të afërt.

“Jo, nuk mendoj se është e pranueshme, të paktën jo për një të ardhme të afërt. Dhe, jo për shkak të Kosovës. Po të ekzistonte Kosova dhe Serbia në një lloj vakumi ose po të ishin të dyja në një ujdhesë, mbase do të ishte e mundshme. Problemi në këtë kuadër, siç e dinë të gjithë, nuk është Presheva dhe as veriu, problemi qëndron në Maqedoni dhe në Bosnjë. Prandaj, deri në një të ardhme të afërt, nuk mendoj se kjo është e mundshme, por kush e di se ç’mund të ndodhë me kalimin e viteve”, ka thënë ai. /Telegrafi/