[Antika]

Akti i një individi nuk ndikon në miqësinë e thellë SHBA-Kosovë

Ambasada e Shteteve të Bashkuara i bashkohet Qeverisë dhe popullit të Kosovës në dënimin e sulmit të të mërkurës në Frankfurt të Gjermanisë, që mori jetën e dy amerikanëve dhe plagosjen e dy të tjerëve- thuhet në një deklaratë të lëshuar nga kjo ambasadë.
“Mendimet tona janë me ata që u plagosën dhe familjet dhe miqtë e të gjithë atyre që u preken nga kjo tragjedi. Ne u shprehim ngushëllimet tona më të thella familjeve për këtë humbje”, thuhet në deklaratë.

Ambasada e SHBA-ve në Prishtinë, në emër të popullit amerikan ka falënderuar Qeverinë dhe presidentin e Kosovës për deklaratat e tyre të ngushëllimit dhe të përkrahjes në këto çaste, duke thënë se janë “të vetëdijshëm se populli i Kosovës është gjithashtu i tronditur me këtë krim neveritës që është një fyerje për vlerat dhe traditat e popullit shqiptar”.

“Akti i një individi të vetëm nuk do të ndikoje në asnjë mënyrë në miqësinë e thellë dhe të qëndrueshme mes dy vendeve tona, ose në marrëdhëniet jashtëzakonisht të ngrohta dhe të ngushta të popujve tanë dhe qeverive”, thuhet më tej, ndërsa gjatë të enjtes dhe të premtes ftohet popullata për të nënshkruar librin e ngushëllimit në ambasadën e SHBA-ve në Prishtinë. /Telegrafi/