[Zero Cool]

Ortaku i Qemajl Mustafës, përfiton miliona nga “Termokosi”





Qe dy sezone tenderët milionësh të “Termokosit” për furnizon me mazut i fiton kompania private “Compact Group”, pronari i së cilës, Mustafë Shala, është edhe ortak i kryetarit të Komunës së Gjilanit, Qemjal Mustafa në kompaninë tjetër private “Frutta Viva”, e njohur edhe si fabrika e barnave në Kosovë.
Po në këto dy sezone, “Termokos” ka pasur vazhdimisht telashe me mazut, me procedura të prokurimit deri në përzgjedhjen e kompanisë, dhe mbi të gjitha, në këto dy sezone Zyra e Auditorit ët Përgjithshëm (ZAP) gjen shkelje në këta tenderë, shkruan Zëri.
Ndonëse që nga viti 2006, Qemajl Mustafa dhe Mustafë Shala bëjnë biznes bashkë, duke qenë ortakë në “Frutta Viva”, kryetari i Gjilanit thotë se nuk ka lidhje me tenderët milionësh në ndërmarrjen publike “Termokos”, që deri pak ditë më parë udhëhiqej nga Fëllënza Pula.
Mustafa thotë që s’ka pasur ndikim
“Asnjëherë në asnjë rast nuk jam i involvuar në punët e pronarit të “Compact Group”. Kam dëgjuar nga mjetet e informimit në një prononcim të drejtoreshës Pula të ‘Termokosit”, se kompania ‘Coompact Group” të kishte kinse mirëkuptim, edhe pse borxhet ndaj saj ishin rreth 2 milionë euro. Pra, kjo nuk ka të bëjë absolutisht asgjë me mua”, ka thënë për ‘Zërin”, Qemajl Mustafa, aktualisht kryetar i Komunës së Gjilanit.
Derisa në kompaninë “Compact Group” nuk duan të flasin për këtë çështje, Mustafa thotë se natyra e ndryshme e bizneseve tregon se ai nuk ka pasur lidhje me tenderët milionësh të “Termokosit”.
“Aksionet e mia në “Frutta Viva” janë 15 % dhe kjo është një natyrë krejt tjetër e biznesit, që nuk ka të bëjë asgjë me institucionet, sepse ato nuk blejnë e as nuk shesin banane”, ka thënë Mustafa.
Shpërblimin me tenderë publikë të kompanive të ortakëve të politikanëve, Avni Zogiani nga OJQ-ja “Çohu” e sheh vetëm si njërën nga format e përfitimit të zyrtarëve nga paraja publike.
“Format e përfitimit të zyrtarëve nga fondet publike janë ose nëpërmjet kompanive të afërta me to, ose duke shpërblyer financuesit e fushatave zgjedhore. E keqja e madhe është se këto, në Kosovë janë bërë të zakonshme, dhe me as që paraqesin lajm. Madje edhe shoqëria civile, por edhe mediet, sikur janë bërë imunë ndaj reagimeve për këtë formë të përfitimit të zyrtarëve, dhe jemi bërë vendi nga vendet e transicionit, që më së keqi jemi duke e pësuar në këtë drejtim”, thotë Zogiani për “Zërin”.
Rastin e “Compact Group” e “Frutta Viva”, ai e sheh si rast tipik të fenomenit në fjalë, dhe thotë se duke pasur parasysh pozitën e Mustafës dhe vlerën e fondeve publike që ka përfituar ortaku i tij në biznes, duhet të fillojnë hetim.
Dy vjet me shkelje
“Compact Grup” qe dy sezone furnizon me mazut ‘Termokosin”. Gjatë vitit 2010 kjo kompani është paguar nga “Termokos” në shumë prej 3.110.532 urosh, kurse shuma e borxhit të papaguar për të ishte për vitin 2011 ishte 1.598.587€ dhe kjo kompani ka ngritur padi gjyqësore ndaj “Termokos”-it.
Në këtë tender, ZAP ka gjetur se “Termokos” ishte furnizuar me mazut në sasi prej 7511 tonë, ndërsa ishin shpenzuar gjithsej 7500 tonë. Sipas rishikimit të kontratës që e kanë bërë auditorët, të nënshkruar më 30.09.2010, kanë vërejtur se çmimi i ofruar në ofertë ishte çmimi sipas bursës plus premia 17.68€ për tonë, kurse kontrata dhe pagesat për mazut ishin bërë sipas çmimit prej 26 euro plus premi për ton.
Edhe në vitin 2009, në po të njëjtin tender dhe me po të njëjtën kompani, auditorët gjetën shkelje të shumta. ZAP-i në 2009 gjeti se “Compact Group” ka furnizuar me mazut “Termokos”-in me çmimin për ton më të lartë sesa kompanitë tjera që kanë importuar mazut në Kosovë, ku ishte shkaktuar një dëm në vlerë prej 307.497€.
Ky institucion i pavarur pati gjetur edhe se përfaqësuesi i “Compact Group” nuk ka pasur as licencën e lëshuar nga Ministria e Tregtisë dhe Industrisë për furnizim me mazut dhe derivate të naftës, siç është kërkuar me dosje të tenderit.
Për më shumë, në vitin 2010 kur “Compact Group” mori edhe një herë tenderin e mazutit procedura për zgjedhjen e kompanisë ishte anuluar dy herë.