[Zero Cool]

Selimi: Kosova nuk është e kryeministrit





Deputeti i Lëvizjes “Vetëvendosje”, Rexhep Selimi, ka thënë se Kosova menjëherë duhet t’i ndërpresë bisedimet me Serbinë, pasi që nëse ato vazhdojnë, sipas tij, vendi do të pësojë humbje të tjera.

Në një intervistë për të përditshmen Zëri, Selimi ka deklaruar se marrëveshjet e arritura në Bruksel mes Kosovës dhe Serbisë kanë qenë një “lajm i pritshëm i keq”, duke shtuar se ky “nuk do të jetë rezultati më i keq nëse këto bisedime vazhdojnë”.

Selimi e ka akuzuar kryeministrin Hashim Thaçi duke thënë se ai po mundohet t’i përvetësojë meritat për çdo gjë në Kosovë dhe se po sillet si pronar i luftës dhe pavarësisë.

“Është shumë e kuptueshme. Ju e keni parë kryeministri i një vendi duhet të jetë në shërbim të atij vendi. Është ekzekutivi, është ai njeri i cili e ka kërkuar një mandat që t’iu shërbejë qytetarëve. Në rastin tonë konkret, kryeministri vërtet ka vazhduar të sillet si pronar i luftës çlirimtare, sepse ai më shumë se një herë është deklaruar se ‘unë e bëra luftën’, ka folur në veten e parë. Pastaj, ‘unë e shpalla pavarësinë’, e bëra autostradën, pastaj për çdo të mirë që ka ardhur në vend ai ka folur në veten e parë dhe po ashtu pretendon të thotë se ‘unë do ta çoj Kosovën në integrime Evropiane’”, ka thënë Selimi.

Më tej, ai ka deklaruar se Kosova ka nevojë për një qeveri të përgjegjshme që e udhëheq vendin në këto situata mjaft të ndejshme, ndërsa nuk ka nevojë që askush të sillet si ‘pronar’.