[Neferta]

Kufizimet e Tadiqit
Presidenti i Serbisë, Boris Tadic, ka ftuar sërish KFOR-in dhe EULEX-in që të përmbahen nga, siç i ka quajtur ai, aksionet e njëanshme dhe përdorimi i dhunës në veri të Kosovës, dhe ka theksuar se është e domosdoshme që në afatin më të shkurtër të mundshëm të mundësohet furnizim normal për njësitet e KFOR-it dhe lëvizje të papenguar të tyre.
Ai po ashtu i ka ftuar sërish qytetarët që të përmbahen nga çfarëdo aktesh të dhunës dhe reagimet ndaj provokimeve të mundshme që do të arsyetonin përdorimin dhunës kundër tyre.
Tadic ka theksuar se “shteti i Serbisë konsideron që është e nevojshme të mundësohet lëvizje e papenguar e EULEX-it nëpër rrugët në veri të Kosovës, me kusht që të mos transportojnë pjesëtarë të institucioneve të Prishtinës”, njofton Fonet, transmeton Koha.
Sipas tij, furnizimi dhe lëvizja e KFOR-it garantohet me marrëveshjen e Kumanovës, si dhe me Rezolutën 1244 të KS të OKB-së. Edhe lëvizja e EULEX-it, sipas tij, është e lejuar me Planin gjashtë pikësh të sekretarit të përgjithshëm të OKB-së, Ban Ki-moon, e që është miratuar edhe nga Këshilli i Sigurimit. /Telegrafi/