[King Street]

Luani pak vendit, mos e leni vetëm derën hapur

“LDK është e hapur për të gjithë!”, “Në LDK mund të vijnë e të rikthehen të gjithë ata që frymojnë me programin e saj!”, “LDK është shtëpi e madhe për të gjithë!” etj. Këto janë disa prej parollave më të shpeshta të dëgjuara kohëve të fundit të thëna nga zyrtarët më të lartë të kësaj partie politike. Deklarimet e tilla janë bërë në momente të caktuara kur individë apo grupe politikë kanë aderuar në LDK apo janë rikthyer në LDK pas një periudhë të “hidhërimit” të përkohshëm me ish-lidershopin e kësaj partie politike.
Por, a kanë mjaftuar vetëm këto ftesa publike për t’u rikthyer përsëri në LDK gjithë ajo armatë e simpatizantëve dhe e votuesve të LDK-së të cilët për katër herë rresht, në dy palë zgjedhje lokale dhe në dy palë zgjedhje nacionale të pasluftës, LDK-në e nxorën partinë e parë, partinë fituese, madje partinë dy herë më të madhe se sa të gjitha partitë e tjera politike të Kosovës së pasluftës!
Përgjigja është e ditur: Jo nuk kanë mjaftuar vetëm ftesat me fjalë!
Çështë e vërteta pavarësisht faktit të rikthimit të një pjese të anëtarësisë dhe të aktivistëve të LDD-së në LDK, kohëve të fundit pati edhe individë e personalitete të cilët “rrëshqitën” në partitë e tjera politike, kryesisht në AAK, sepse kjo parti i “strehoi më ngrohtësisht” se sa ata pritnin apo dëshironin të akomodoheshin në LDK.
Me Anton Berishënm, ish- shefin e ART-së kam biseduar vetëm pak javë para se ai të aderonte në AAK.
Me Rrsutem Berishën, ish-komandantin e Koshares kam pirë kafe jo më shumë se 10 ditë në mes të sheshit të Prishtinës.
Që të dy kanë qenë me zemër me LDK-në!
Që të dy kanë shprehur zhgënjimin e tyre se nuk kanë gjetur mirëseardhjen e merituar në LDK.
Që të dy kanë thënë se nuk kanë mbetur rrugëve sa për të gjetur një “strehë” në LDK por se e meritojnë një pritje më të dinjitetshme në LDK.
Por, që të dy u bënë me libreza partiake të AAK-së?
Nuk i arsyetoj aspak veprimet e tyre ashtu siç marr guximin t’i gjykoj e aq më pak t’i akuzoj?! Fundja anëtarësimi në një parti politike bëhet me vullnet të lirë të çdo individi!
Por pse Anton Berisha “iku” nga LDK-ja dhe pse Rrustem Berisha nuk u anëtarësua në LDK?
Këto pyetje do të duhej të përbënin shqetësim për lidershipin e LDK-së? Që të dy janë personalitete të njohura për opinionin. I pari ka qenë shef i ART-së i emëruar për herë të parë nga presidenti Ibrahim Rugova. I dyti ka qenë komandant i lavdishëm i Brigadës 138 Agim Ramadani, strukturë kjo ushtarake nën komandën e Ministrisë së Punëve të Brendshme të Republikës së Kosovës. Që të dy institucionalit me bindje e me veprime. Logjikisht që të dy do të duhej të ishin pjesë e strukturave dhe pse jo edhe të hierarkisë së LDK-së!
I pari, Anton Berisha e ka “lënë keq” LDK-në sepse ka qenë pjesë e kuadrove të LDK-së, I dyti Rrustem Berisha, do t’ia shtonte votat LDK-së, së paku përmes ish-bashkëluftëtarëve dhe familjarëve të bashkëluftëtarëve të tij të Koshares!
Por ata sot nuk janë fare në LDK!
Por sikur të ishin në LDK, sigurisht se do të kontribuonin me vota në ngritjen e shkallës së fitores eventuale të LDK-së në zgjedhjet lokale.
Prandaj, një pjesë të përgjegjësisë, së paku për largimin nga LDK-ja të këtyre dy kuadrove (nuk po përmend edhe të tjerë të cilët po presin të jenë pjesë e LDK-së por që nuk trokasin si rrugëtarë të rrugëve në dyert e LDK-së “duke kërkuar strehim!, në stilin: “Më falni a është kjo selia e LDK-së? A bon mu anëtarësu unë sot në LDK! Ju faleminderit!”) e mban i gjithë lidershipi i LDK-së, përkatësisht Kryesia Qendrore e LDK-së!
Në këtë drejtim nuk mjaftojnë vetëm ftesat verbale: “LDK është e hapur për të gjithë!”, “Në LDK mund të vijnë e të rikthehen të gjithë ata që frymojnë me programin e saj!”, “LDK është shtëpi e madhe për të gjithë!”.
Është në traditën e mikpritjes shqiptare që kur dikush të vjen në shtëpi, madje edhe i zoti i shtëpisë qohet në këmbë ose lëviz pak prej vendit. Të sapoardhurit i bëhet vend pak më afër ballit të oxhakut!
Në LDK ka vite, madje më shumë se sa një decenie që disa janë ulur afër “ballit të oxhakut” dhe nuk luajnë vendit, e do të duhej të luajnë pak vendit që t’ua lëshojnë edhe të tjerëve. Ndërkaq selinë e LDK-së nuk duhet ta konsiderojnë si “shtëpi të tyre” të madhe. Jo le ta marrin të gjithë ata por edhe të tjerët LDK-në me vete e la të dërgojnë nëpër shtëpitë e tyre, besa le ta “shpërndajnë” LDK-në edhe të fqinjtë e tyre, te miqtë e tyre, te rrethi i gjerë familjar, se kështu ka qef LDK-ja, të rritet, të bëhet e madhe, të bëhet shtëpi e madhe për të gjithë.
Ndryshe, karriga e disave që janë ulur tash e sa vjet në postet e LDK-së një ditë do të thyhet, do të rrëzohen ata, e bashkë me ata edhe LDK-ja.
Prandaj luani pak vendit, ju që jeni tash e sa vjet në LDK, nuk mjafton vetëm ta leni derën e hapur!


Shkruan Bajrush Morina / Botasot